Read Kahua HAGARAHENGA 17 Bible Online

HAGARAHENGA 17 - Kahua bible

HAGARAHENGA 17

¹Na Araha ki bonasia o Moise,

²ki hagatarêngenigi na ramata ngegê tangara o Aroni, o karena ma na Isiraelita hato.

³Manga na Isiraelita ma ki nahuia na puruka, se na sipi, se na goti i rarona na tênga se i metara,

⁴ma ki pe torea râ tanga na maani ruma na ruma na gahu iana na Araha manga na vogasiha tanga, ngaia ki aharêngia na ramata. Ngaia ki manga i nahuia na enoni ki hura na gapu. Ngaia ka paia hura nga tenira na kariana God.

⁵Na Araha ki naka na ramata ngekê, suria i pe obania, vi na Isiraelita ke vogasi renigi na ganiani igê na agua mavê manga bani hanana. I tuguhira hete, viga torera tanga na mane ni vogasiha igê na maana na maani ruma na gahu iana na Araha, hanana i nahuira igê tanga na vogasiha ni tonganiha.

⁶Na mane ni vogasiha ki tuguhia, vi kamusigi na apanini ge he heri na bea ni vogasiha i maana na ruma na gahu iana na Araha. Ki tuguhia, vi sungigi na êbeni, hanana na vanahuni ki hagakoro obana God. Na Isiraelita ki tuguhira, viga tototo suria na Araha. Tahema ki apu tangara, vige nahuira na ganiani igê na agua mavê, hanana vige vogasira na ataro.

⁷Na Isiraelita ki tuguhira, viga marupea na ramata ngekê tare, ki bê ki arâ.

⁸Manga na Isiraelita se vi na mahuara i berarogata ma ki susu tanga na Araha,

⁹se i vogasia i na agua mavê, nga noga ma i maana na ruma na gahua iana na Araha, ngaia ka page paia hura nga tenira na kariana God.

¹⁰Manga na Isiraelita se na mahuara i berarogata ma ki ngaua na ganiana i gagapuga mênga, na Araha ki page mangariaga tanga ma ki page paia hura tenira na kariana.

¹¹Suria na gapu ki na mêrihata na ara ni marâ hato, tahema na Araha ki naka na ramata, viga karangigi na gapu igê na bea ni vogasiha, hanana God ki bonotenigi na tasi iata. Na gapu ki na mêriha tahema i tananigi râ na tasi.

¹²Tahema na Araha ki hagapêpura na Isiraelita ma na mahuara i berarogata, vi siana ka ngaugi na ganiani i gagapuga mêngagi.

¹³Manga na Isiraelita se na mahuara i berarogata ma ki nahuia na ganiana se na manu na rotu ki manimania vige ngêra, ki tuguhia, vi karangigi râ na gapuna i ano, ma ki ahunigi renigi na mako.

¹⁴Na gapu ngaia ki na mêrihata na ara ni marâ hato ga mauri. Tahema na Araha ki hagapêpura na Isiraelita, vi siana ka ngaugi na ganiani i gagapuga mêngagi. Na anima na enoni i katokato vikana, na Araha ki paia hura tenira na kariana.

¹⁵Manga vi na Isiraelita se na mahuara ma ki ngaua na ganiana i me suri parongana, se ga garahunia na marâ vasiga, ki tuguhia, vi tananigi na gahu iana, ki mamanu ma ki kahu matarotaro hete matena i susu na arito.

¹⁶Manga vi ngaia ma ki pe katokato vikana, ngaia ki hagaratena marena tanga na hagaitangiha.