Read Kahua HAGARAHENGA 18 Bible Online

HAGARAHENGA 18 - Kahua bible

HAGARAHENGA 18

¹Na Araha ki hagatora o Moise, ki hagatarêngenia na tamasinga iana tangara na Isiraelita.

²God ki vi: “Inê nga ki na Araha God iami.

³Siana kamu amaka surigi na bagatauhata na ai ni Esipito, na agua mu oga igê i nago, se vi surigi na bagatauhata na ai ni Kanani, na agua gê bêngenigamu tanga.

⁴Mu marupegi nga na ramata iaku ma kamu têtê viteaku. Inênga ka na Araha God iami.

⁵Mu arâ surigi na ramata ma na hagesuringa, gê vategamu renigi. Manga mu arâ surigi, igamu kamu page tahitahi. Inênga ka na Araha God iami.

⁶Inê na Araha kê nakagi tangagamu na ramata igê. Siana kamu merarongo era na goami.

⁷Siana kamu hagamakira o vaemami, suria vigamu merarongo era kenami. Siana kamu hagamakira kenami igê na tarana vikana.

⁸Siana kamu hagamakira o vaemami i heroga, suria vigamu merarongo era tani na gete iana.

⁹Siana kamu merarongo era kesimi se keogami tonge se kesimi se keogami râ ma, naka ma vi ngaia kamu tage raha i ruma gi tage.

¹⁰Siana kamu rongo era henira ka kareta na karemi, i era ma kamu hagamakigamu maremi.

¹¹Siana kamu rongo era henira ka karena na hitangita na gete iana o vaemami, i heroga, suria ka karena ngegana nikâ kani kesimi se keogami.

¹²Siana kamu rongo era henira keogana se kesina o vaemani, suria ngaira ka na gapu gi tage.

¹³Siana kamu rongo era henira keogana se kesina kenami, suria ngaira ka na gapu gi tage.

¹⁴Siana kamu rongo era henira na gete iata o vaemami hagareha, suria ngaira nikâ kani kenami hagareha.

¹⁵Siana kamu rongo era henira ka hungâmi, suria ngaira kani kaniata o karemi.

¹⁶Siana kamu rongo era henira na gete iata o veogami se o vesimi, i era ma kamu hagamakira.

¹⁷Siana kamu rongo era henira na gete ma ka kareta. Ki apu nikâ, vigamu auragia ka karena na karena na gete ngekana, suria ngaira ka na gapu haku. Na tarana ngekê ki era ngavê manga na kavaniha.

¹⁸Manga mu heroga, siana kamu auragira me nikâ kehami, manga viga tahitahi mêngara keogata se kesita mu bani êragira.

¹⁹Siana kamu mauru henira na gete, matena i tahataha na obata, suria ga pe matarotaro suria na hagesuringa igê na rotu.

²⁰Siana kamu rongo era henira na gete iata na mane getera, suria i katogamu kamu pe matarotaro.

²¹Siana kamu nakara na karemi ka voravora re na êrâ tanga na vogasiana o Moleki na ataro, suria inê na Araha kê God iami. Tahema siana kamu gâga erasiê i maata na enoni.

²²Igamu na mane, siana kamu rongo era henira na tamani na mane. Inê God kê kitenia ngavê na tarana ngekana.

²³Igamu na mane ma na gete siana kamu rongo era henira na o se na goti ma na marâ vigana. Na tarana ngekana ki katogamu kamu pe matarotaro ngavê.

²⁴Siana kamu katogamu maremi, kamu pe matarotaro renigi na tarani ngegana. Na enoni ga hagarapera na ataro ka katora mareta vikana. Ngaira ka bani oga hagenago tarami igê na agua, ma inê na Araha kê tarigenira hura tarami, kamu banu me.

²⁵Na bagatauhata ka katoa na agua ki pe matarotaro. Tahema inê na Araha kê hagaitangia na agua ma kê katoa, ki kasira hura na enoni, ga oga igê.

²⁶Ngaira ka katogi na tarani era hato ngegana ma ka katoa na agua i pe matarotaro. Ma igamu, siana kamu katokato vikana. Igamu hato, na Isiraelita se na mahuara i berarogami, igamu ki tuguhigamu, vigamu marupegi na ramata ma na tamasinga iaku.

²⁸Vikana na agua ki asa, vi ge page kasigamu hura, manga i bani kasira hura na enoni ga hagarapera na ataro, ga bani oga hagenago tarami igê.

²⁹Igamu kamu bani girara, vi na enoni ma ki katogi na ani mavê na tarani era ngegana, ka page paia hura tenira na kariaku.

³⁰Mu marupegi na ramata, gê nakagi tangagamu inê na Araha. Siana kamu arâ surigi na bagatauhata na enoni ga bani oga hagenago tarami. Siana kamu katogamu maremi kamu pe matarotaro renigi na tarani era ngegana. Inênga ka na Araha God iami.”