Read Kahua HAGARAHENGA 20 Bible Online

HAGARAHENGA 20 - Kahua bible

HAGARAHENGA 20

¹Na Araha ki vi tanga o Moise,

²ki tamasi vikê tangara na Isiraelita. “Na anima na hitangimi se na mahuara i berarogami ma ki tagarenia na hitangita na karena tanga na vogasiana o Moleki na ataro, na haku hagenani iami ki arihahunia nga ki meme.

³Na anima na enoni i tagarenia na hitangita na karena tanga o Moleki na ataro ma ki katoa na ruma na gahu apuna ki pe matarotaro ma ki hagaerasia na ataku apuna, inê be merongasia ma be kasia hura tenira na kariaku.

⁴Manga vi na haku iami ma ki pe botage renia na bagatauhana na enoni ngekana ma ki pe nahuia ke meme,

⁵hoi, inê mareku be merongasia na mane ngekana henia na ahemata hato iana ma na enoni hato ga amake suria, ka pe toto suriê ma ka vogasia o Moleki, inê be kasira hura tenira na kariaku.

⁶Manga vi na enoni ma ki garigari tara i pasita na enoni ga matu, inê be merongasia ma be kasia hura tenira na kariaku.

⁷“Mu bâsigamu kamu tototo suriê, hanana mu apuna, suria inê nga ka na Araha God iami.

⁸Vikana mu marupegi nga na ramata iaku, suria inê nga ka na Araha ma kê hagapunarigamu tangê inê mareku.”

⁹Na Araha ki ramata vikê. Na enoni i arangenia o vaemana se kenana ka nahuia nga ki meme. Ngaia ki hagaratena marena vikana.

¹⁰Manga vi na mane ma ki gamogamo henia na gete iana na tamana na Isiraelita, ka nahuirerua nga karu meme, ngaia ma na gete.

¹¹Manga vi na mane ma ki rongo era henia na hitangita na gete iana o vaemana, ngaia ki hagamakia o vaemana ma ka nahuirerua nga karu meme ngaia ma na gete. Ngairerua karu hagarateterua mareterua vikana.

¹²Manga vi na mane ma ki rongo era henia ka hungâna, ka nahuirerua nga karu meme. Ngairerua karu bagatauhaterua ngavê ma karu hagarateterua mareterua vikana.

¹³Manga vi na mane ma ki rongo era henia na tamana na mane, ngairerua karu bagatauhaterua ngavê ma ka nahuirerua nga karu meme. Ngaireru karu hagarateterua mareterua vikana.

¹⁴Manga vi na mane ma ki herogarerua kahenana, ka sungira nga ka meme. Ngaira hato gi oru ka bagatauhata ngavê. Siana hagetage ki akê me na tarana vikana i berarogami.

¹⁵Manga vi na mane ma ki rongo era henia na o se na sipi ma na marâ vigana, ka nahuirerua nga karu meme.

¹⁶Manga vi na gete ma karu gunahia vigaru rongo era vikana, ka nahuirerua nga karu meme. Ngairerua karu hagarateterua mareterua vikana.

¹⁷Manga vi na mane ma ki êragia keogana se kesina se keogana râ ma se kesina râ ma, ka hagamakirerua nga i maata na enoni ma ka kasirerua hura tenira na hakuta ni nuni, suria ngaia ki rongo era henia keogana se kesina ma ki hagaratena marena vikana.

¹⁸Manga vi na mane ma ki memêru na gete i taha na obana, ka kasirerua hura tenia na hakuta ni nuni, suria garu aharêngia na ramata i vi pusia na mane vi siana ke memêru na gete i tahataha na obana.

¹⁹Manga vi na mane ma ki merongo era kenana hagareha, ngairerua karu hagarateterua mareterua renia garu bagatauhaterua ngavê.

²⁰Manga vi na mane ma ki merongo era na gete iana o mona, ngaia ki hagamakia o mona. Ngairerua na mane ma na gete ngegana ki page nahuirerua na makiha mataro me karu meme, suria garu pe apara kare, ma karu gomara hete.

²¹Manga vi na mane ma ki êragia kehana, ngairerua karu meme gomara nga, suria na mane ngekana ki bagatauhana ngavê ma ki hagamakia o veogana se o vesina.

²²Na Araha ki vi: “Mu arâ surigi nga na ramata hato iaku ma na tamasinga iaku, i era ma i Kanane gê bêngenigamu tanga ki momoatenigamu hura.

²³Siana kamu arâ surigi na tauha iata na enoni i ngekana. Inê be tarigenira hura na ahuroto ngegana, hanana mu girara mu bêbanu igê na agua ngekana. Inê kê kitenira makoko vê renigi na bagatauhata.

²⁴Inê kê bani surua tangagamu, vi gê haganahunigamu renia na agua ni mako koro ma ango ma na suruha iaku ki tâ nga tangagamu. Inê nga ka na Araha God iami ma kê bani ategamu hura tangê tenira na enoni i maveta.

²⁵Vikana mu hagakitakitara na ani ta na ganiani ma na manu kaniga matarotaro ma na ani ta kani mareha. Siana kamu ngaura na ganiani se na manu ga pe matarotaro tangagamu vigamu ngaura. Inê kê visira viga pe matarotaro ma ki manga mu ngaura igamu kamu kahu pe matarotaro nogami.

²⁶Igamu kamu apuna nga, suria inê kê hagapunarigamu tangê mareku ma suria inê nga ka na Araha ma kê apuna ngavê. Inê kê ategamu hura tenira na enoni i maveta tangê inê mareku. Igamu ka na aniku.

²⁷Na anima na mane se na gete i matu, ka arihahunia nga. Na anima na enoni i katokato vikana ki hagaratena marena vikana.”