Read Kahua HAGARAHENGA 21 Bible Online

HAGARAHENGA 21 - Kahua bible

HAGARAHENGA 21

¹Na Araha ki bonasia o Moise, hanana i hagarongora vikê na mane ni vogasiha tenia na raraha iana o Aroni. Manga vi na enoni i apena na mane ni vogasiha ma ki meme ma ka naka, na mane ni vogasiha ki bâsia marena, vi siana ki akê me igê ta na tarana i katoa ki pe matarotaro,

²nga noga ma i meme kenana, o vaemana, o karena, ka karena, o veogana se vesina, keogana se kesina,

³se keogana se kesina i taura mênga ma ki gâga henia i ruma iana.

⁴Ngaia ki bâsia marena vi siana ki pe matarotaro, matena i meme ta na ahariana.

⁵Na mane ni vogasiha ki apu nikâ vige gorogoro bêhuri se vige ninigi na taboturina se vige taritaria na apena marena, hanana i hagabângenia, vi ngaia ki hetaki.

⁶Ngaia ki apuna nga ma siana ki hagaerasia na ataku. Ngaia ki apuna nga, suria i vogasiê renigi na vogasiha ni ngêra.

⁷Na mane ni vogasiha siana ki auragia na êrâ se vi na gete i bani memêru na mane, se vi na gete na mane iana i kasia. Ngaia ki apuna nga.

⁸Na enoni ka girara nga vi na mane ni vogasiha ki apuna, suria i vogasiê renigi na vogasiha ni ngêra. Inê nga ka na Araha. Inê nga kanigê apuna. Inê nga kanigê hagapunarira na kariaku.

⁹Manga vi ka karena na mane ni vogasiha ma ki voravora re na êrâ, ngaia ki hagamakia o vaemana. Ngaia ka sungia nga ki meme.

¹⁰Na mane ni vogasiha i teha, siana ki pe surasura bê, ma siana ki tarisia na tuguni iana, hanana i hagabângenia, vi ngaia ki hetaki, suria ga bani karangia i bêna na oile ni moneha ma ka bani hagapunaria, hanana i tuguni re na tuguni ni mane ni vogasiha.

¹¹Ngaia ka bani hagapunaria tangê inê. Tahema siana ki katoa marena ki pe matarotaro se vige hagaerasia na ruma na gahu apuna iaku, suria i huhura tenia ma ki bêbanu igê na ruma i tâtâ igê na enoni i me, henaka o vaemana se kenana. Inê nga ka na Araha.

¹³“Ngaia ki êragia nga na gete i pe memêru rârâ na mane,

¹⁴mareha vi na gete na nâ se vi na gete o vaniana i kasia, se vi na êrâ. Ngaia ki auragia nga na gete i pe memêru rârâ na mane ma ki tenia na raraha iana o Aroni.

¹⁵Manga i mareha, na karena i ararira viga apuna nga hete, ngaira ka pe matarotaro. Na Araha kani inê ma inê nga kanigê hagapunaria ki mane ni vogasiha i teha.”

¹⁶Na Araha ki bonasia o Moise,

¹⁷ki hagarongoa vikê o Aroni. “Manga vi ta na raraha iamu ma ki pe apeapekoro ma ki baubêga, siana ki vogasiê renia na vogasiha ni ngêra. Na ramata ngêke ki gâga tare ki bê ki arâ.

¹⁸Na mane i pe apeapekoro ma ki baubêga ki apu hagetage vige vogasiê: mareha vi na mane i guruguru, se i meme na êgana, na maana ki pe bâbâ manga vi hanana, se na apena ki pe bâbâ manga vi hanana,

¹⁹se i tavitavi na rimana se na êgana,

²⁰se i tukutuku na gerina se i rakiraki, se i nahunia na mera igê na oruna na maana, se na mera era ni gavona apena, se i vâ mavo.

²¹Manga vi na raraha iana o Aroni ma ki pe apeapekoro ma ki baubêga, ki apu tanga vige vogasiê renia na vogasiha ni ngêra.

²²Na mane ngekana ki arari ma vi ngaugi na ngêra ga vogasiê renigi, na ngêra ni vogasiha ni ngêra i apuna ma na ani i apuna teha ngavê.

²³Ma suria i baubêga, siana ki arâ me hagarangia na gahu apuna i kukuku se vi hagarangia na bea ni vogasiha. Siana ki hagaerasirerua na marâ apuna ngegana, suria inê nga ka na Araha ma inê nga kanigê hagapunarirerua.”

²⁴Hoita, ngaigi nga ka na marâ o Moise i hagarongoa o vahemata Aroni ma na Isiraelita hato renigi.