Read Kahua HAGARAHENGA 22 Bible Online

HAGARAHENGA 22 - Kahua bible

HAGARAHENGA 22

¹Na Araha ki bonasia o Moise,

²hanana i hagarongora vikê o Aroni mo karena. “Siana kamu hagaerasia na ataku apuna. Tahema mu hagahigasigi nga na votovoto ni vogasiha, na Isiraelita ga hagapunarigi tangê. Inê nga ka na Araha.

³Manga vi na hitangita na raraha iami i pe matarotaro ma ki hatarigi na votovoto ni vogasiha na Isiraelita ga hagapunarigi tangê, hoi, ngaia ki hatohato nga tenia vi mane ni vogasiha tare, ki bê ki arâ. Ngaia nga ka na ramata i gâga hagahu nga. Na Araha nga kani inê.

⁴“Manga vi ta na hitangita na raraha iana o Aroni ma ki nahunia na mera era ni gavona apena se i hiraga, ngaia ki apu tanga, vige ngaugi na ngêra ni vogasiha mataro me ki matarotaro aporo. Na mane ni vogasiha ki pe matarotaro, manga vi ngaia ma ki hataria ta na marâ i pe matarotaro suria na gahua, se i ororo,

⁵se i hataria na marâ mamauri i pe matarotaro, se na enoni i pe matarotaro.

⁶Na mane ni vogasiha i pe matarotaro, ngaia ki pe gâga matarotaro mataro me ki bungibungi. Henaka, ma ngaia ki apu vige ngaugi na ngêra ni vogasiha mataro me ki mamanu hato.

⁷I murina i susu na arito, ngaia ki kahu matarotaro ma ki kahu girara i ngaugi na ngêra ni vogasiha, suria ngaigi ka na ngêra iana.

⁸Na mane ni vogasiha ki apu tanga, vige ngaua na ganiana i meme marena se ga garagara hunia na marâ vasiga, i era ma ki pe matarotaro renia. Inê nga ka na Araha.

⁹“Na mane ni vogasiha hato ka arâ surigi nga na ramata gê bani nakagi tangara, i era ma ka tasitasi ma ka meme, suria ga aharê igê na ramata apuna ngegana. Inê nga ka na Araha ma kê hagapunarira.

¹⁰Ngaia ma na mane ni vogasiha kani araria vi ngaugi na ngêra apuna ni vogasiha, mareha vi tani râ nikâ, henaka vi na enoni i gâga henia se i tagara tanga.

¹¹Manga vi na mane ni vogasiha ma ki nahunira na kare vurivuri, i vurira re na haga iana marena se ge vora i ruma iana, ngaira ki ararira ma viga ngaugi na ngêra na apanena iana tenigi na ngêra ni vogasiha.

¹²Manga vi ka karena na mane ni vogasiha ma ki êragia na mane i mareha vi na mane ni vogasiha, ngaia ki apu tanga vige ngaugi na ngêra ni vogasiha.

¹³Manga vi ka karena na mane ni vogasiha ma ki nânâ se o vaniana ki kasia, ma ki pe apara kare ma ki aporo me i ruma iana o vaemana ki gâga hagêguria, hoi, ngaia ki girara i ngaugi na ngêra iana o vaemana, na ngêra tenia na vogasiha. Ngaira ma na raraha iana na mane ni vogasiha kaniga girara ga ngaugi na ngêra ngegana.

¹⁴“Manga vi na enoni ma ki mareha vi na raraha iana na mane ni vogasiha ma ki bagararâ me ki ngaugi na ngêra ni vogasiha, ngaia ki urusigi aporo nga tanga na mane ni vogasiha renia na haga na mena ma ki biribiri huria akê renigi tani nikâ na haga.

¹⁵Na mane ni vogasiha siana ka hagaerasigi na ngêra ni vogasiha,

¹⁶suria viga hagamarumungenira na enoni i apu tangara viga ngaugi, ka ngaugi, i era ma na enoni ngegana ka tasitasi ma na hagaitangiha ki tarahura. Inê nga ka na Araha ma kê hagapunarigi na ngêra ni vogasiha.”

¹⁷Na Araha ki bonasia o Moise,

¹⁸hanana i vatera o Aroni mo karena ma na Isiraelita hato na ramata igê. “Manga vi na Isiraelita se vi na mamahuara i berarogata ma ki tagarenia na ganiana tanga na vogasiha ni sungiha, hanana vi hagamonaria na suruha iana se vi ngaia marena kani obania, hoi, na ganiana ngekana ki apeapekoro ma ki pe baubêga.

¹⁹Na ganiana ngekana ka na puruka mane nga, se na sipi mane se na goti mane i apeapekoro ma ki pe baubêga.

²⁰Manga i mareha vikana, na Araha ki asa hagetage vige aganaria.

²¹Manga vi na enoni ma ki tagarenia na ganiana tanga na vogasiha ni ngêhaku tanga na Araha, hanana vi hagamonaria na suruha iana se vi ngaia marena ki obania, hoi, na ganiana ki apeapekoro nga ma ki pe baubêga. Manga i mareha, na Araha ki usisitenia.

²²Siana kamu tagarenia tanga na Araha na ganiana i guruguru se i abogo, se i mukumuku tagua na apena, se i nahunigi na suguha ga nanaga, se i mamari, se i garogaro. Siana kamu naka na ganiana i manga ngekana igê na bea ni vogasiha manga na vogasiha ni ngêra.

²³Manga vigamu ma kamu tagarenia na ganiana tanga na vogasiha suria na obaniha iami maremi, i arari ma vigamu tagarenia na ganiana i rakiraki se i pe tototo bâkoro, ma ki pe arari tanga na vogasiha, hanana vigamu hagamonaria na suruha iami.

²⁴Siana kamu tagarenia tanga na Araha na ganiana garu mareha vi na bagerana gi rua, suria ga menamenarirerua, se ga retererua, se i gaharenirerua na bagerana, se garu tatari râ. Na voeha ki apu tangagamu i pasimi.

²⁵“Siana kamu tagarenigi na ganiani, mu vurigi tenira na mahuara manga na vogasiha ni ngêra, suria na ganiani ngegana ka pe apekoro ma ka baubêga. Na Araha ki pe aganarigi.

²⁶“Manga vi na puruka, se na sipi, se na goti ma ki apara, mu naka vê nga na karena henia kenana surigi na tangiani gi pi. I na murina ngekana ki kahu ararigamu vigamu tagarenia manga na vogasiha ni ngêra.

²⁸Siana kamu vogasi renia na puruka henia na karena, se vi na sipi henia na karena se vi na goti henia na karena igê nga na tangiana gi tage.

²⁹Matena mu vogasia na Araha hanana vigamu visia koro renia ta na marâ, mu arâ surigi nga na ramata, hanana ngaia ki aganarigamu.

³⁰Mu ngaua hato nga na ngêra ni vogasiha ngekana. Siana kamu hagahita tanga na tangiana i muri.”

³¹Na Araha ki vi: “Mu marupegi na ramata iaku. Inê nga ka na Araha.

³²Siana kamu hagamakia na ataku. Na Isiraelita ka hagahigasiê nga, suria inê kê apuna. Inê nga ka na Araha ma kê hagapunarigamu.

³³Inê nga kanigê bêngenigamu hura tenia i Esipito, hanana gê God iami. Inê nga ka na Araha.”