Read Kahua HAGARAHENGA 23 Bible Online

HAGARAHENGA 23 - Kahua bible

HAGARAHENGA 23

¹Na Araha ki vatea o Moise

²na ramata igê tangagi na tangiani raha ni rotu. O Moise ki vi: “Igamu na Isiraelita ki tuguhigamu, vigamu hakuhaku nga igê na tangiani ngegana, hanana mu rahesia igê na Araha.

³“Na tangiani ge ono ka tâ tangagamu, vigamu tagara igê, ma kamu takusia vi na pita na tangiana ngaia ka na tangiana ni mamaroha. Siana kamu tagara igê na tangiana ngekana, ma kamu hakuhaku nga hete igê tanga na hagarahenga. Na tangiana ni mamaroha ki na aniku na Araha, naka ma i he kamu gâga igê.

⁴“Na mateni tangagi na tangiani raha kani igê.

⁵“Paseka, kamu hagarahesia igê na Araha, ki haganega igê na tangiana tangahuruta matare he igê na hageha hagenago.

⁶Igê na tangiana na tangahuruta matare rima ki haganega na tangiani raha na bereti i pe ahunga, ma surigi na tangiani gi pi ki apu tangagamu, vigamu ngaugi igê na bereti i ahunga.

⁷Igê na tangiana hagenago ngekana ki tuguhigamu, vigamu hakuhaku nga tanga na hagarahenga, ma siana hagetage kamu tagara igê.

⁸Surigi na tangiani gi pi ngegana mu vogasia nga igê na Araha renigi na ngêra iami. Igê na pita na tangiana ki tuguhigamu, mu hakuhaku aporo nikâ tanga na hagarahenga, ma siana kamu tagara igê.

⁹“Matena mu atata vê igê na agua, na Araha ki naka tangagamu, ma ka maua na mu iami, mu tagarenigi nga na nagoni tanga na mane ni vogasiha.

¹¹Ngaia ki page vogasia na Araha renigi, hanana i aganarigamu. Na mane ni vogasiha ki tuguhia, vi vogasia na Araha renigi igê na tangiana i murina na tangiana ni mamaroha.

¹²Igê na tangiana mu tagarenigi igê na nagoni na mu, mu susu nga nikâ renia na bêhâgana na sipi mane, i hatohato huria na harisi gi tage ma ki apekoro.

¹³Mu tagarenia henigi na kilo gi rima na makona na bereti, ga toraria henia na oile ni olive, manga na vogasiha ni ngêra. Na vanuhana na vogasiha ngekana ki hagakoro obana na Araha. Mu tagarenia henia nikâ na lita gi rua na vaini.

¹⁴Mu tagarenigi hagenago na nagoni na mu tanga God, ma kamu kahu ngaugi, naka ma i maga, se mu hanugi, se mu hahigi. Mu marupegi na ramata ngegana, igamu ma na raraha iami tare, ki bê ki arâ.

¹⁵“Mu tomanigi na wiki gi pi, haganega tenia na tangiana i murina na tangiana ni mamaroha, na tangiana mu tagarenigi igê na nagoni na mu iami tanga na Araha.

¹⁶Igê na tangahuruta gi rima na tangiana, na tangiana i murina na pita na tangiana ni mamaroha, mu tagarenia nikâ tanga na Araha na vogasiha ni bereti.

¹⁷Na ara ni ahemata ki tuguhia, vi torererua me na guani gi rua na bereti ma ki tagarenirerua tanga na Araha manga na vogasiha. Na higahigana na guana gi tage na bereti ki vora na kilo gi rua, ma ka tagarenia tanga na Araha manga na vogasiha ni nagoni na mu.

¹⁸Henigi na bereti igamu na Isiraelita ki tuguhigamu, vigamu tagarenira na bêhâgata na sipi gi pi ga hatohato hurira na harisi gi tage, na puruka mane gi tage ma na goti gi rua. Na ara ni hitangita ki apeapekoro nga. Mu susu renira tanga na Araha henigi na vogasiha ni nagoni na mu ma na vaini. Na vanuhana na vogasiha ngekê ki hagakoro obana na Araha.

¹⁹Mu tagarenia nikâ na goti gi tage manga na vogasiha ni bonoteniha ni tasi. Nikâ na sipi mane gi rua i hatohato hurirerua na harisi gi tage manga na vogasiha ni tonganiha.

²⁰Na mane ni vogasiha ki tuguhia vi tagarenigi na bereti henirerua na sipi mane gi rua tanga na Araha, hanana na mane ni vogasiha ka tongani. Na votovoto ngegana ka apuna, suria mu nakagi tanga na Araha.

²¹Siana kamu tagara igê na tangiana ngekana, ma kamu hakuhaku hete tanga na hagarahenga. Igamu ma na raraha iami ki tuguhigamu vigamu marupegi na ramata ngegê tare, ki bê ki arâ, naka ma vi i he kamu oga igê.

²²“Matena ga maua na mu iami, siana kamu huhuhu igê na akirini na mu iami, ma siana kamu rugurugu aporo râ nikâ igê. Mu nakagi mavê tangara na enoni matareha ma na mahuara. Na Araha nga ki na God iami.

²³“Na tangiana hagenago igê na pita na hageha, ngaia nikâ ki na tangiana ni mamaroha. Mu hagahigasia nga, ma kamu hakuhaku nga igê tanga na hagarahenga, matena mu rongoa na ahuri.

²⁵Mu vogasia na Araha renigi na ngêra ma siana kamu tagara igê.

²⁶“Igê na tangahuruta na tangiana igê na pita na hageha mu katoa nga na hagarahenga tanga na bonoteniha ni tasi iata na enoni. Siana kamu ngêngê rârâ igê na tangiana hagenani ngekana. Mu hakuhaku nga hete igê tanga na hagarahenga ma kamu tagarenia na vogasiha ni ngêra tanga na Araha igê na tangiana ngekana i na ara ni harisi.

²⁸Siana kamu tagara igê na tangiana ngekana, suria ngaia ki na tangiana ni hagarahenga tanga na bonoteniha ni tasi.

²⁹Na anima na enoni i ngaua ta na marâ igê na tangiana ngekana, ka paia hura nga tenira na kariana God.

³⁰Manga ta na enoni ma ki tagara igê na tangiana ngekana, na Araha ngaia marena ki page hagamesia.

³¹Igamu ma na raraha hato iami ki tuguhigamu, vigamu marupea na ramata ngekana, naka ma i he kamu gâga igê.

³²Haganega igê na matena i susu na arito igê na sivata na tangiana igê na hageha, mataro me ki susu na arito igê na tangahuruta na tangiana, mu hagahigasia nga na tangiana ngekana, suria ngaia ki na tangiana ni mamaroha. Siana hagetage kamu ngêngê igê.

³³“Na tangiani raha ni ruhu ki haganega igê na tangahuruta matare rima na tangiana igê na pita na hageha, ma ki arâ surigi na tangiana gi pi.

³⁵Igê na tangiana hagenago igê na tangiani gi pi ngegana, mu hakuhaku nga igê tanga na hagarahenga, ma siana kamu tagara igê.

³⁶Igê na ara ni tangiana igê na tangiani gi pi ngegana, mu tagarenigi nga igê na vogasiha ni ngêra. Igê na varuta na tangiana kamu hakuhaku nga nikâ igê ma kamu tagarenia na vogasiha ni ngêra. Ngaia ki na tangiana ni hagarahenga ma siana kamu tagara igê.

³⁷“Ngaigi ka na tangiani raha ni rotu. Mu hagarahasia igê na Araha. Mu hakuhaku nga igê, ma kamu tagarenigi na vogasiha ni ngêra, mu susu igê tanga na Araha, ma kamu tagarenigi igê na bereti, na vaini, na nagoni na mu, manga i bani tâ tangagi na tangiani raha ngegana.

³⁸Mu marupegi na tangiani raha ngegana henigi na tangiani ni mamaroha ma na vogasiha igê na tangiani getigi ngegana henigi na vogasiha igê na ara ni tangiani ni mamaroha ma henigi na votovoto mu surusuru igê ma na ani mu takusigi maremi tanga na Araha.

³⁹“Matena ga maua na mu iami, mu hagahigasigi na tangiani raha ni ruhu surigi na tangiani gi pi. Na tangiani ngegana ka haganega igê na tangahuruta matare rima na tangiana igê na pita na hageha. Na tangiana hagenago ma na varuta ka na tangiani ni mamaroha.

⁴⁰Igê na tangiana hagenago mu totora me na guani koro na apinige iami, na ahani na ni, na takasi ma na hagamahe, kamu hagarahasia ma kamu vagevagesia na Araha God iami renigi.

⁴¹Mu hagarahasia surigi na tangiani gi pi. Igamu ma na raraha hato iami, kamu hagahigasia nga na ramata ngekê tare, ki bê ki arâ.

⁴²Igamu hato na Isiraelita ki tuguhigamu, vigamu gâga igê na ruhu surigi na tangiani gi pi,

⁴³hanana na raraha iami ka girara, vi na Araha ki katora na Isiraelita ka oga igê na ruhu, matena i bêngenira hura tenia i Esipito. Ngaia nga ka na Araha God iami.”

⁴⁴Vikana o Moise ki nakagi na ramata tangara na Isiraelita, hanana viga marupegi na tangiani raha ni rotu ma ka hagarahasia igê na Araha.