Read Kahua HAGARAHENGA 24 Bible Online

HAGARAHENGA 24 - Kahua bible

HAGARAHENGA 24

¹Na Araha ki vi tanga o Moise,

²hanana i bonasira na Isiraelita, ka torea me na oile ni olive mora ma taranina tangagi na laiti i ruma na gahu apuna, hanana ga mave tare.

³Igê na ara ni manurahi o Aroni ki tangagi na laiti ma ki bâbâsurigi ka mave mataro me ki tangitangi i ngekana i maana na Araha i murina hura na gahu i kuku i maana na kiboru i oga igê na bokesi na suruheri, na kiboru i apuna teha ngavê. Na ramata ngekê ki tâtâ tare nga ki bê ki arâ.

⁴O Aroni ki bâbâsurigi nga na laiti igê na atohana na laiti na golo taranina, hanana ga mave tare i maana na Araha.

⁵Mu hahigi na guani na bereti tangahuru matarerua renigi na 12 kilo na palaua taranina.

⁶Mu nakanaka na guani na bereti ngegana igê na harahara gi rua, na guani ge ono igê tani ma igê tani, igê na bea na golo taranina i maana na Araha.

⁷Mu nakanaka na marâ taranini ga sigini koro ni sungiha igê na ara ni hitangiterua na harahara. Na marâ i sigini koro ngekana ki urusigi na bereti, na girarana vi na bereti ka na vogasiha ni ngêra tanga na Araha.

⁸Igê na ara ni tangiani ni mamaroha ki bê ki arâ mu nakagi nga na bereti i ngekana i maana na Araha. Na tarana ngekana ki tuguhigamu na Isiraelita tare ki bê ki arâ.

⁹Na bereti ka na anita o Aroni ma na raraha iana ma ngaira ka ngaugi nga igê na agua apuna, suria ngaigi ka apuna teha ngavê teharigi na ngêra getigi mu tagarenigi tanga na Araha tangara na mane ni vogasiha.

¹⁰Igê na tênga iata na Isiraelita ki oga igê ta na mane. O vaemana ka na mane i Esipito. Kenana kani ka Selomiti, ka karena o Tibiri tenia na raraha iana o Tane. Na mane ngekana ki meheariha ta na Isiraelita. Matena garu heariha, ngaia ki tamasi erasia na Araha. Vikana ngaira ka torea râ tanga o Moise.

¹²Ngaira ka maasuria ma ka naasia na Araha, hanana vivi tangara renia vi na ta kaniga katoa tanga na mane ngekana.

¹³Na Araha ki vi tanga o Moise, ki vi:

¹⁴“Gu torea hura na mane ngekana tarege râ tenia na tênga. Na enoni hato ga rongoa i tamasi erasiê, ka nakagi na rimata i bêna na mane ngekana, hanana viga hagamonaria, vi ngaia ki kato monari vikana. Hemuri na hakuta ninuni hagenani ka arihahunia nga ki meme.

¹⁵Hemuri ko hagarongora na Isiraelita, vi na anima na enoni i tamasi erasiê inê God, ngaia ki hagaratena marena.

¹⁶Ka arihahunia nga ki meme. Na anima na Isiraelita se na anima na mamahuara i berarogami ma ki tamasi erasiê inê God, na hakuta ninuni hagenani ka arihahunia nga ki meme.

¹⁷“Na anima na enoni i nahuia ki meme ta na enoni, ka nanahuia nga nogana ki meme.

¹⁸Na anima na enoni i nahuia ki meme na togoha iana ta na enoni, ngaia ki urusia aporo nga. Na ramata ki vi, ‘Na mêriha tanga na mêriha.’

¹⁹“Manga ta na enoni ma ki hagamamaria ta na enoni, ka rugua bê aporo nga tanga ngaia nogana.

²⁰Manga i barugia ta na surina na enoni, ka barugia nga ta na surina nogana. Manga i akaroa na maana ta na enoni, ka akaroa nga na hitangiterua na maana nogana. Manga i tahuru barugia na rivona ta na enoni, ka tahuru barugia nga ta na rivona nogana. Na anima na mamariha i katoa tanga ta na enoni, ka katoa bê aporo nga tanga ngaia nogana.

²¹Na anima na enoni i nahuia ki meme na togoha iana ta na enoni, ngaia ki urusia nga. Ma na anima na enoni i nahuia ki me ta na enoni, ka arihahunia nga ki meme nogana.

²²Na ramata ngegana ka tâ tangagamu hato, igamu na Isiraelita ma na mamahuara i berarogami, suria inê nga ka na Araha God iami.”

²³Matena i tamasi hato vikana o Moise tangara na Isiraelita, ngaira ka torea hura na mane ngekana tarege râ tenia na tênga ma ka arihahunia ki me. Na Isiraelita ka râ suria vikana na bonasiha iana na Araha tanga o Moise.