Read Kahua HAGARAHENGA 25 Bible Online

HAGARAHENGA 25 - Kahua bible

HAGARAHENGA 25

¹Na Araha ki tamasi tanga o Moise i hungana i Sinai ma ki bonasia,

²hanana i vatera na Isiraelita renigi na ramata igê. “Matena mu bêbanu igê na agua, na Araha i haganahunigamu renia, mu hagahigasia nga na Araha, hanana siana kamu tagarahigi na mu surigi na ara ni pita na harisi.

³Surigi na harisi ge ono mu hasihasi nga, mu uvegi na pariki na vaini iami, ma kamu totora ngêra.

⁴Ma na pita na harisi ka na na harisi ni mamaroha tanga na mako, na harisi mu hagapunaria tanga na Araha. Vikana siana kamu hasihasi, se vigamu uvegi na pariki na vaini iami.

⁵Na bani mu, mu pe hasigi ma ka akê mareni hete, siana kamu totora ngêra ma siana kamu husigi na guani na apinige na vaini, mu pe uvegi, suria ki na harisi ni mamaroha tanga na mako.

⁶Henaka mu pe tagara igê suria na harisi ngekana, na mako ki page vategi na ngêra tangagamu hato, igamu, na enoni vurivuri iami, na enoni tagara iami ma na mamahuara i berarogami,

⁷na togoha iami ma tangara na ani ga vasiga ga oga igê na mako iami. Na ngêra ga akê igê ki ararigamu vigamu ngaugi.

⁸I murini na harisi gi pi hagepi, i vi i murina na 49 na harisi,

⁹igê na tangahuruta na tangiana igê na pita na hageha, na tangiana raha ni bonoteniha ni tasi, mu hagatorangenia na mane, hanana i uhia na ahuri suria na agua hagenani.

¹⁰Vikana igamu kamu hagapunaria na tangahuruta gi rima na harisi tanga na Araha, hanana mu rupasira aporo igê na enoni hato ga oga i pasimi. Suria na harisi ngekana na ara ni nahuninga hato, ga bani hagavuringenigi, ka aporo nga tangara na bani avanuni se tangara na raraha iata na avanuni, ma na ara ni kare vuruvuri mu rupasira, ka aporo i pasita.

¹¹Siana kamu hasigi na mu iami se vigamu totora na koni ga akê mareni se vigamu husihusi na guani na apinige na vaini ga akê mareni mu pe uvegi.

¹²Na harisi hagenani ngekana ki apuna nga tangagamu. Mu ngaugi ma na ngêra ga akê mareni i mu.

¹³Suria na harisi ngekana na ara ni nahuninga hato, ga bani hagavuringenigi, ka aporo nga tangara na bani avanuni.

¹⁴Tahema, matena mu hagavuringenia na mako tanga na tamami na Isiraelita, se mu vuria na mako tenia, mu katoa nga igê na hekomaniha.

¹⁵Na mena na mako ki arâ surigi ma vi gi hita na harisi kaniga gâga mêngagi ma ki kahu mataro me na tangahuruta gi rima na harisi.

¹⁶Manga viga rakorako na harisi ga mêngagi, na mena na mako ki akê. Manga viga pe rakorako na harisi ga mêngagi, na mena na mako ki soso, suria na mena na mako ki arâ surigi na ngêra tenia na mako surigi na harisi ga mêngagi.

¹⁷Siana kamu hagabekasia na tamami na Isiraelita. Mu têtê hete viteana na Araha ma kamu hagahigasia, suria ngaia ka na Araha God iami.

¹⁸Mu marupegi nga na ramata ma na bonasiha iana na Araha, hanana mu gâga suri parongami i pasimi.

¹⁹Na mako ki page vategamu re na ngauha. Igamu kamu page nahunigi rako ngavê na ngêra tanga mu ngaugi ma kamu page oga suri parongami.

²⁰Ta na enoni vari ki hagate ki vivi: “Na ta kanimi ngaugi, suria na pita na harisi, matena mi pe hasigi na mu ma kami pe totora ngêra?”

²¹Na Araha ki page hagapua na mako igê na onota na harisi, hanana na ngêra igê ka rakorako ka ararirerua na harisi gi rua.

²²Matena mu hasigi na mu iami igê na varuta na harisi, igamu kamu page ngaugi mênga na ngêra mu bani tora igê na onota na harisi, ma na ngêra ki page aharêsigamu mataro me kamu totora na ngêra mu hasihasi igê na varuta na harisi.

²³Siana kamu hagavuringenigi ka arâ ngavê na mako iami, suria igamu kamu mareha vi na avanuni ma God hete. Igamu kamu mangara na mahuara. God ki nakagamu ma kamu tagara igê.

²⁴Matena mu hagavuringenigi na mako, ki tâ tangagamu, vigamu vuria aporo, suria igamu ka na bani avanuna.

²⁵Manga vi na Isiraelita i matareha ma ka tuguria, hanana i hagavuringenia na mako iana, na enoni i apena ki vuria aporo nga.

²⁶Manga vi ngaia ma ki pe nahunia ta na enoni i apena, vari i hemuri ngaia ki page nahunigi na haga ga arari, hanana i vuria aporo ngaia marena.

²⁷Vikana ngaia ki vatea nga na mane i vuria na mako tenia, renia na mena na mako i râ surigi ma vi gi hita na harisi ga gâga mêngagi ma ki kahu mataro me na tangahuruta gi rima na harisi, na mako ki atani aporo ma tanga igê.

²⁸Manga vi ngaia ma ki pe nahunia na haga ge araria vige vuria aporo renia na mako, na mane i vuria na mako tenia, ki nahunia mênga mataro me na tangahuruta gi rima na harisi. Igê na harisi ngekana na mako ki atani aporo ma tanga na bani avanuna.

²⁹Manga vi na mane ma ki hagavuringenia na ruma igê na hinua ga pararihia, ngaia ki tâ tanga vi vuria aporo suria na harisi gi tage igê na tangiana i hagavuringenia igê.

³⁰Ma ki manga i pe vuria aporo i rarona na harisi gi tage, ngaia ki bara tanga vige vuria aporo, ma na ruma ki gâga nga tare tangara na mane i vuria ma na raraha iana, ma ki pe atani aporo ma igê na tangahuruta gi rima na harisi.

³¹Ma tangagi na ruma i hinua ga pe pararihigi, na ramata ka tâ tangagi mangagi na mako. Na bani avanuni ki tâ tangara viga vurigi aporo se ga hagaporosigi aporo igê na tangahuruta gi rima na harisi.

³²Henaka, ma na raraha iana o Levi ki tâ tangara, viga vurigi aporo igê na anima na mateni na nahuninga iata igê na hinua raha iata.

³³Manga vi ta na raraha iana o Levi ma ki hagavuringenia na ruma igê ta na hinua raha ngegana ma ki pe vuria aporo, na ruma ki atani aporo ma igê na tangahuruta gi rima na harisi, suria na ruma ga nahunigi na raraha iana o Levi ka na nahuninga hagahu iata mareta, mareha vi iata na Isiraelita getera.

³⁴Nikâ na bena ni go rihigi na hinua raha iata na raraha iana o Levi, ki apu hagetage, vige hagavuringenigi. Ngaigi ka na nahuninga hagahu iata tare ki bê ki arâ.

³⁵Manga vi ta na tamami na Isiraelita i matareha i berarogami ma ki bara tanga, igamu kamu tamania nga tagenana manga mu bâsuria na mane tagara iami, hanana ngaia ki ama ni gâga nga i berarogami.

³⁶Siana kamu turia renia ta na marâ, ma kamu têtê viteana God hete, ma kamu naka na tamami na Isiraelita ngekana ki ama ni gâga nga i berarogami.

³⁷Siana kamu turia renia na haga mu vatea renia se renigi na ngauha kamu hagavuringenigi tanga.

³⁸Ngaia nga ka na ramata iana na Araha God iami, i bêngenigamu hura tenia i Esipito, hanana i haganahunigamu renia i Kanani ma ki God iami.

³⁹Manga vi ta na tamami na Isiraelita i berarogami ma ki hagavuringenia marena tangagamu ki kare vurivuri iami, suria vi ngaia ki matareha ngavê, siana kamu hagatagarahia manga na kare vurivuri.

⁴⁰Ngaia ki gâga nga henigamu manga na mane tagara ma ki tagara tangagamu mataro me na tangahuruta gi rima na harisi.

⁴¹Igê na harisi ngekana ngaia ma na karena ka page arâ panigamu ma ka aporo i pasita ma tangagi na nahuninga iata tenira na êvarita.

⁴²Na Isiraelita ka na enoni vurivuri iana na Araha. Ngaia ki bêngenira hura tenia i Esipito. Tahema ki apu vige hagavuringenira ke kare vurivuri.

⁴³Siana kamu bagaramonira ma kamu têtê viteana God hete.

⁴⁴Manga vigamu obanira na kare vurivuri, ki ararigamu ma vigamu vurira igê na agua iata na mahuara.

⁴⁵I ararigamu nikâ, vigamu vurira na kareta na mahuara i berarogami. Na kare vigana ga vora i pasimi, ki ararira viga kare vurivuri iami,

⁴⁶ma igamu kamu girara mu hagatarêngenira tangara o karemi, hanana ga tagara tangara mataro me ka meme, ma siana kamu bagaramonia ta na tamami na Isiraelita.

⁴⁷Manga vi na mahuara i berarogami ma ki ruruguha ma ta na tamami na Isiraelita ki matareha ma ki hagavuringenia marena ki kare vurivuri iana na mahuara ngekana se iana na hitangita na ahemata iana,

⁴⁸ngaia ki tâ tanga viga vuria aporo. Na hitangita o veogana se o vesina,

⁴⁹se o mona se o veogana se o vesina tonge, se na anima na enoni i apena ki girara i vuria aporo. Se manga vi ngaia marena ma ki nahunigi na haga ga arari, ngaia ki girara i vatea re na avanuna, hanana i asitatara tenia vige kare vurivuri.

⁵⁰Ngaia ma na mane i vuria, karu hekarigi nga ma karu tomanigi nga vi gi hita na harisi kaniga mêngagi mataro me na tangahuruta gi rima na harisi, haganega tenia na tangiana i hagavuringenia marena igê. Na mena tanga i aharupa aporo ki arâ suria na vuriha iana na mane tagara.

⁵¹Na mena ki arâ surigi na harisi ga mamêngagi. Manga viga rakorako na harisi na mena ki akê, ma ki manga ga pe rakorako na harisi na mena ki soso,

⁵²

⁵³suria na vuriha iana na mane tagara i rarona na harisi gi tage. Siana na avanuna ki bagaramonia manga na kare vurivuri ma manga hete na mane tagara.

⁵⁴Manga vi pe asitatara tenia vige kare vurivuri, ngaia ma na karena ka atani asitatara râ nga igê na tangahuruta gi rima na harisi.

⁵⁵Na Isiraelita ki asa vige kare vurivuri hagahu iana ta na enoni, suria na Isiraelita ka na kare vurivuri iana na Araha. Ngaia nga kani bêngenira hura tenia i Esipito. Ngaia nga ka na Araha God iata.”