Read Kahua HAGARAHENGA 26 Bible Online

HAGARAHENGA 26 - Kahua bible

HAGARAHENGA 26

¹Na Araha ki vi: “Siana kamu tagarahigi se vigamu hagêrasigi na nunuta na ataro, se na hê se vi na hê mu tahegi, hanana vigamu rahesia. Inê nga ka na Araha God iami.

²Mu marupegi nga na tangiani raha ni rotu ma na tangiana ni mamaroha, ma kamu hagahigasia na ruma iaku mu rahesiê igê. Inênga ka na Araha.

³“Manga mu arâ surigi na ramata iaku ma kamu têtê viteaku,

⁴inê kê page katoa, ki rangirangi igê na matena i araria, hanana ga ganora na mu iami ma na apinige ni ngauha ka rasirasi.

⁵Na ngêra i mu ki page aharêsigamu ngavê. Vikana igamu kamu page opaopa mênga igê na matena mu husihusi igê na guani na apinige ni ngauha. Ma igamu kamu page husihusi mênga igê na matena ni hasinga. Na ngêra ki page aharêsigamu ngavê ma igamu kamu page gâga igê na ramana igê na agua iami.

⁶“Inê be katogamu, kamu oga purunguni igê na agua iami. Igamu ki asa, vigamu mêru mamaguraga renira na enoni. Inê be hagamagahurura na marâ vasiga ga hagamamaguraga tenia i pasimi, ma be hagamagahurua nikâ igê na hearihatana.

⁷Igamu kamu page teharira na merongami.

⁸Na vere rima tenigamu igamu ka girara ga teharira na tangarê na merongami, ma na tangarê tenigamu igamu ka girara ga teharira na rehagaro tangahuru gi tage na merongami.

⁹Inê be koro tangagamu ma be hagarakonigamu. Inê be hagamonaria na aniku na apanena na suruheri henigamu.

¹⁰Na harisi iami ka page aharêsigamu ngavê ma ka page gâga suria na harisi gi tage ma igamu kamu page kasikasi na bani ani tarani na ani haoru.

¹¹Inê be oga henigamu igê na ruma apuna iaku ma ki asa ve murisigegamu.

¹²Inê be ngahisigamu. Inênga be God iami, ma igamu nga ka na kariaku.

¹³Inênga, na Araha God iami, kanigê bêngenigamu hura tenia i Esipito, hanana mu hatohato tenia vigamu voravora re na kare rakuraku. Inê kê hatungia na ramoha i hagamamasiagagamu ma kê katogamu, kamu aharupa ma kamu ageage.”

¹⁴Na Araha ki vi: “Manga mu aharêngigi na ramata iaku, na hagaitangiha ki page tarahugamu.

¹⁵Manga mu haritohegi na ramata ma na tamasinga iaku ma kamu aharêngia na suruheri iaku henigamu,

¹⁶inê kê hagaitangigamu. Inê kê nakagi na bagabevoani ke tarahugamu: na mera ni kiru ma na matoroha, ga katogamu kamu guruguru ma kamu ama ni rataga nga kamu meme. Henaka vigamu hasihasi na mu iami, ma igamu ki asa iami vigamu ngaugi, suria na merongami ka page teharigamu ma ka page ngaugi hete na mu iami.

¹⁷Inê kê merongasigamu, hanana igamu kamu soso renira na merongami. Na ani ga kitenigamu, ka page marungigamu. Igamu kamu page bubununuga ngavê ma kamu page gavagava, henaka i mareha rârâ ta na enoni vige tarigenigamu.

¹⁸“Manga vigamu ama ni haritoheê nga i murini na hagaitangiha ngegana, inê kê page hagarahagi hagepi kê na hagaitangiha tangagamu.

¹⁹Inê be hatungia na paroparoha i angarigamu ngavê. Ki page arito ru. Na mako iami ka page avagavaga ma ka gatagata manga na hê.

²⁰Igamu kamu page tagara raha hagaborâ ma, suria na mu iami ki asa vige ganora se vige hunguhungu na apinige ni ngauha.

²¹“Manga vi igamu ma kamu ama ni haritoheê nga ma kamu usi vigamu tê viteaku, hoi, inê kê page hagarahagi hagepi kê nikâ na hagaitangiha tangagamu.

²²Inê be nakara na marâ vasiga ka râ me tangagamu ma ka page garagarahunigamu, igamu, na karemi ma na togoha iami. Na tara iami ka page bagubaguruga, suria tani na hitangimi ma kaniga tahitahi.

²³“Manga vi igamu ma kamu ama ni pe têtê viteaku nga i murini na hagaitangiha ngegana ma kamu ama ni haritoheê nga,

²⁴hoi, inê be merongasigamu ngavê ma be hagarahagi hagepi kê nikâ na hagaitangiha tangagamu.

²⁵Inê kê page nakara na merongami ka megamuheariha, hanana ge hagaitangigamu, suria mu aharêngia na suruheri iaka. Manga igamu ma kamu rukuruku i hinua raha iami, inê kê page nakagi na mera ni kiru ka tarahugamu ma kamu votavota i rimata na merongami.

²⁶Inê kê page hagabubugi na ngêra iami. Vikana na gete tangahuru gi tage ka obania na ani gi tage ma na êmu, hanana, ga hahahi na ngêra igê. Ngaira ka page tonganigi na ngêra ga pe arari. Matena mu ngaugi ki hatohato, igamu page magê ngavê mênga.

²⁷Manga vigamu ma kamu ama ni haritoheê nga i murini na hagaitangiha ngegana ma kamu ama ni pe têtê viteaku nga,

²⁸hoi, igê na mangariaganiha iaku inê be merongasigamu ngavê ma be hagarahagi hagepi kê nikâ na hagaitangigiha tangagamu teharia i nago.

²⁹Na magêha ki page nahuigamu ngavê ma igamu kamu page ngaura na karemi maremi.

³⁰Inê be hogegi na agua ni vogasiha ni ataro iami igê na hungani ma na bea mu susu igê tangara na ataro renigi na marâ i sigini koro ni sungiha. Inê be arihatenigi na gahuami hurigi na nunuta na ataro iami. Inê be makimaki tenigamu ngavê.

³¹Inê be ruhuruhugi na hinua raha iami, be hogegi na agua ni vogasiha ni ataro iami ma be kitenigi na vogasiha iami.

³²Inê be hagaerasia hagetage na agua iami, hanana na merongami ga raua ka oga igê, ka page konekone renia na ruhuruhuana.

³³Inê be nakara na merongami ke megamuheariha ma be tokorenigamu surigi na agua iata. Na agua iami ki page hihiruga ma na hinua raha iami ka page aruhuruhu.

³⁴Vikana na mako ki page mamaro surigi na harisi vi i mamaro igê ma igamu kamu pe naka ke mamaro igê. Ngaia ki aruga ma ki mamaro, matena igamu kamu oga igê na agua na merongami ga henahuraugamu tanga.

³⁶“Inê be katora na hitangimi ga tahi ma ka oga igê na agua iata na merongami, ke bubununuga ngavê, hanana mu gavagava, matena mu rongoa i angihuhu igê na ahana na apinige. Igamu kamu page gavagava tangagi na manavami manga ga tarigenigamu na merongami igê na hearihatana ma igamu kamu page votavota igê na agua i pe oga rârâ igê ta na merongami.

³⁷Igamu kamu hetapatapasu, henaka i mareha rârâ ta na enoni vige tarigenigamu. Vikana igamu ki bara tangagamu, vigamu meraheariha na merongami.

³⁸Igamu kamu page meme igê na agua na merongami ga henahuraugamu tanga. Na agua ngekana ki manga i unumigamu.

³⁹Ta na kere hitangimi ga tahi igê na agua iata na merongami, ka page ruruhi rârâ ma ka meme renigi na bagatauhami maremi ma na bagatauhata na êvarimi.

⁴⁰“Na raraha iami ka page tangahurira renigi na tasi iata mareta ma na anita na êvarita, ga haritoheê ma ka pe totosuriê,

⁴¹ma ka hagamangariê kê merongasira ma kê tagarenira tangara na merongata, ga henahuraura tanga na agua iata. I murina ngekana, matena na raraha iami ka tangahurira ma ka bani kasikasi meni na tasi ma na guguruganiha iata,

⁴²hoi, inê be takusia aporo na suruheri iaku henira o Jakobo, o Isako ma o Abarahamo ma be suru nikâ, hanana ve haganahunira na kariaku renia na agua tangara.

⁴³Henaka, ma hagenago na agua iami ki hihiruga nga, hanana i mamaro. Na enoni igê ka hatamia nga na hagaitangiha, suria ngaira ka usitenigi na ramata ma na tamasinga iaku.

⁴⁴Henaka vi na matena ngaira ka gâga mêngara igê na agua iata na merongata, inê be pe rumakaka renira ngavê se vi ve mutera. Manga vige manga ngekana, na suruheri iaku henira ke hato, ma suria inê nga ka na araha God iata.

⁴⁵Inê be hagahârungia na suruheri gê bani naka henira na êvarita, igê na matena gê hagabângenia igê na raramohaku tangara na enoni hato i maveta, suria gê bêngenira hura tenia i Esipito, hanana vi inê na Araha God iata.”

⁴⁶Ngaigi hato ngegana ka na ramata ma na tamasinga, na Araha i vatea o Moise renigi i hungana i Sinai tangara na Isiraelita.