Read Kahua HAGARAHENGA 27 Bible Online

HAGARAHENGA 27 - Kahua bible

HAGARAHENGA 27

¹Na Araha ki vatea o Moise

²renigi na ramata igê tangara na Isiraelita. Manga vi igo ma ko suru vigo hagapunaria ta na enoni tanga na Araha, igo ko girara go hagamonaria na suruha iamu, manga vigo kasia na haga urusia na enoni ngekana.

³Na haga go kasia ki arâ suria nga na ramata i manga ikê: - manga vi na mane i 30 tanga na 60 na harisi iana, ko kasigi na 50 na maani na siliva - manga vi na gete, ko kasigi na 30 na maani na siliva - manga vi na kere mane i 5 tanga na 20 na harisi iana, ko kasigi na 20 na maani na siliva - manga vi na kere gete, ko kasigi na 10 na maani na siliva. - Manga vi na kere mane sisite i mangênga vige gi rima na harisi iana, ko kasigi na 5 na maani na siliva - manga vi na kere gete sisite, ko kasigi na 3 na maani na siliva - manga vi na mane ma ki teharenia na 60 na harisi iana, ko kasigi na 15 na maani na siliva - manga vi na gete ma ki teharenia na 60 na harisi iana, ko kasigi na 10 na maani na siliva.

⁸Manga vi na mane ma ki surusuru vikana ma ki bara tanga vige kasigi na haga vigana, suria i matareha, ngaia ki merâ nga na enoni ngekana tanga na mane ni vogasiha ma na mane ni vogasiha ki gurua vato na mena ngekana ki araria hanana i kasia.

⁹Manga vi na mane ma ki surua na ganiana i araria na vogasiha tanga na Araha, hoi, na ganiana ngekana ki apuna, suria ngaia ka na anina na Araha.

¹⁰Na mane i surusuru vikana, ki apu tanga vige urusia renia na ani getea na ganiana. Manga i katokato vikana, ngairerua ka na anina na Araha.

¹¹Ma ki manga na ganiana i pe matarotaro ma ki pe araria na vogasiha tanga na Araha, na mane ngekana ki urua râ nga na ganiana ngekana tanga na mane ni vogasiha.

¹²Na mane ni vogasiha ki hahariria ma ki naka na mena i araria manga vi i koro se i pe koro. Na mena ngekana ki tâtâ nga vikana.

¹³Manga vi na mane ma ki obania vi vuria aporo, ngaia ki vuria nga renia na mena ngekana henigi tani kê nikâ na haga.

¹⁴Manga vi ta na enoni ma ki hagapunaria na ruma iana tanga na Araha, na mane ni vogasiha ki hahariria nga ma ki kahu naka na mena i araria vi i koro se i pe koro. Na mena ngekana ki tâtâ nga vikana.

¹⁵Manga vi na mane i hagapunaria na ruma iana ma ki obania vi vuria aporo, ngaia ki vuria nga renia na mena ngekana ma tani kê nikâ na haga.

¹⁶Manga vi na mane ma ki hagapunaria tagua na mako iana tanga na Araha, na mena ki arâ surigi nga vi gi hita na kilo na maani na koni kaniga araria viga hasia na mako hagenani ngekana renigi: na 50 maani na siliva tanga na ara ni 300 kilo na koni.

¹⁷Manga vi ngaia ma ki hagapunaria na mako i na murina nga na tangahuruta gi rima na harisi, ngaia ki vuria nga renia na mena hagenani.

¹⁸Manga vi ngaia ma ki hagapunaria na mako i ta na matena i hemuri, na mane ni vogasiha ki naka nga na mena surigi na harisi ga mêngagi mataro me na tangahuruta gi rima na harisi ma ki gurua vato na mena.

¹⁹Manga vi na mane i hagapunaria na mako ngekana ma ki obania vi vuria aporo, ngaia ki vuria renia na mena ngekana ma tani kê nikâ na haga.

²⁰Manga vi ngaia ma ki hagavuringenia na mako ngekana tanga ta na enoni ma ki pe vuria hagenago tenia na Araha, ngaia ki pe tâ tanga vige vuria aporo.

²¹Igê na tangahuruta gi rima na harisi, na Araha ki page nahunia hagahu nga na mako. Ngaia ka na nahuninga iata na mane ni vogasiha.

²²Manga vi na mane ma ki hagapunaria tanga na Araha na mako i bani vuria,

²³na mane ni vogasiha ki hahariria nga ma ki kahu naka na mena surigi na harisi ga mamêngagi mataro me na tangahuruta gi rima na harisi, ma na mane ngekana ki vuria igê na tangiana ngekana nga. Na haga ka na anina na Araha.

²⁴Igê na tangahuruta gi rima na harisi na mako ki aporo nga tanga na bani avanuna se tangara na raraha iana.

²⁵Na ara ni meni hato ka arâ suria nga na ramata.

²⁶Na Araha ki nahunia na ara ni kareta hagâkani na togoha. Tahema siana ta na enoni ki hagapunarira tanga na Araha manga na vogasiha i obania marena vi tagarenia. Na kareta hagâkani na puruka, na sipi se na goti ka na anina na Araha.

²⁷Ma na karena hagâkani na ganiana i pe matarotaro, ki araria viga vuria aporo renia na mena i arâ suria na ramata ma tani kê nikâ na haga. Manga viga pe vuria aporo, ki araria ma viga hagavuringenia tanga ta na enoni renia na mena i arâ suria na ramata.

²⁸I asa ta na enoni vige hagavuringenia se vige vuria aporo na enoni se na togoha se na mako i bani hagapunaria ki tâtâ tare tanga na Araha. Ngaia ka na anina na Araha tare ki bê ki arâ.

²⁹Henaka vi na enoni ga bani hagapunaria ki tâtâ tare tanga na Araha, ki bara vige vuria aporo ma ka nahuia nga ki meme hete.

³⁰Na tangahuruta na ara ni ngêra ni mako, naka ma vi na koni se na guana na apinige, ki na anina na Araha.

³¹Manga vi na mane ma ki obania vi vuria aporo, ngaia ki vuria nga renia na mena i arâ suria na ramata ma tani kê na haga.

³²Na tangahuruta na togoha ki na anina na Araha. Matena go tomanira, na ara ni tangahuruta ka na anina na Araha.

³³Na avanuta na togoha ki apu tanga vige naka na ani i pe koro na togoha ke tangahuruta se vige urusia na tangahuruta renia na ani getea. Manga vi ngaia ma ki urusia, ngairerua ka na anina na Araha ma ki bara vige vurirerua aporo.

³⁴Ngaigi nga ka na ramata na Araha i vatea o Moise renigi i hungana i Sinai tangara na Isiraelita.