Read Kahua HAGARAHENGA 3 Bible Online

HAGARAHENGA 3 - Kahua bible

HAGARAHENGA 3

¹Manga vi ta na mane ma ki tagarenia na puruka iana tanga na vogasiha ni ngêhaku, ngaia ki tuguhia i tagarenia nga na puruka, na ani mane se na ani hehene, i apeapekoro ma ki pe bâubêga.

²Na mane ki naka nga na rimana i bêna na puruka ma ki nahuia ki meme i maana na ruma na gahu apuna iana na Araha. Na mane ni vogasiha tenia na raraha iana o Aroni ka kamusigi nga na apaneni ge he na bea ni vogasiha renia na gapuna.

³Ngaira ka vogasia nga na Araha renigi na arani na ganiana igê: ne êbena hato igê na aunâbana,

⁴na guana na apinige iana henigi na êbeterua igê ma na agua koro na rokona henia na êbena igê.

⁵Na mane ni vogasiha ka sungigi nga na megani hato ngegana igê na bea ni vogasiha henigi na marâ ga susu renigi. Na vanuhana na ngêra ni vogasiha ngekana ki hagakoro obana na Araha.

⁶Manga vi na mane ma ki tagarenia na sipi se na goti tanga na vogasiha ni ngêhaku, ngaia ki tuguhia i tagarenia nga na ani mane se na hehene i apeapekoro ma ki pe baubêga.

⁷Manga na mane ma ki tagarenia na sipi,

⁸ngaia ki naka nga na rimana i bêna na sipi ma ki nahuia ki meme i maana na ruma na gahu apuna. Na mane ni vogasiha ka kamusigi nga na apaneni ge he na bea ni vogasiha renia na gapuna,

⁹ma ka vogasia na Araha renigi na megani igê: na êbena, na kerena ubega ga rete i hunana, na êbena na aunâbana,

¹⁰na guani na apinige henigi na êbeterua igê ma na agua koro na rokona henia na êbena.

¹¹Ta na hitangita na mane ni vogasiha ki sungigi nga na marâ hato ngegana igê na bea ni vogasiha, manga na vogasiha ni ngêra tanga na Araha.

¹²Manga na mane ma ki tagarenia na goti,

¹³ngaia ki naka nga na rimana i bêna na goti ma ki nahuia ki meme i maana na ruma na gahu apuna. Na mane ni vogasiha ka kamusigi nga na apaneni ge he na bea ni vogasiha renia na gapuna,

¹⁴ma ka vogasia na Araha renigi na megani igê: na êbena na aunâbana,

¹⁵na guana apinige iana henigi na êbeterua igê ma na agua koro na rokona henia na êbena igê.

¹⁶Na mane ni vogasiha ka sungigi nga na marâ hato ngegana igê na bea ni vogasiha manga na vogasiha ni ngêra i hagakoro obana na Araha. Na êbena hato ka na anina na Araha.

¹⁷Na Isiraelita ki apu hagetage vige ngaugi na êbeni se vi na gapuni na ganiani. Ngaia ki na ramata ki tâtâ nga ki arâ tangara na Isiraelita hato, naka ma i he ka gâga igê.