Read Kahua HAGARAHENGA 4 Bible Online

HAGARAHENGA 4 - Kahua bible

HAGARAHENGA 4

¹Na Araha ki bonasia o Moise,

²ki hagarongora na Isiraelita, vi manga na enoni i bagararâ me ki tasitasi ma ki aharêngigi na anima na ramata iana na Araha, ngaia ki tuguhia vi arâ surigi na ramata igê.

³Manga vi na mane ni vogasiha i teha ma ki tasitasi ma ki katora na enoni ka tangahurira, ngaia ki tuguhia, vi tagarenia tanga na Araha na puruka mane, i apeapekoro ma ki pe baubêga, manga na vogasiha ni bonoteniha ni tasi iana.

⁴Ngaia ki urua me nga na puruka mane i maana na ruma na gahu apuna, ki naka na rimana i bêna na puruka mane ma ki nahuia ki meme i ngekana i maana na Araha.

⁵Hemuri na mane ni vogasiha i teha ki apegi nga tagua na gapuna na puruka mane ma ki mebanu igê na ruma na gahu apuna.

⁶Ngaia ki anumia na kakêna igê na gapu ma ki tahusigenia hagepi i maana na gahu i kuku i maana na kiboru apuna iana na Araha.

⁷Hemuri ngaia ki taruhigenia nga na gapu igê na bugusuni ge he na sukuni na bea ni sungiani na marâ i sigini koro i rarona na ruma na gahu apuna. Na gapu na agua i hitahita râ, ngaia ki karangia nga i hunana na bea ni vogasiha ga susu igê.

⁸Tenia na puruka mane ngekana ngaia ki tavogi râ nga na êbena hato, na êbena na aunâbana,

⁹na guana apinige iana henigi na êbeterua igê ma na agua koro na rokona henia na êbena igê.

¹⁰Na mane ni vogasiha ki toregi nga na êbena ngegana ma ki sungigi igê na bea ga susu igê tagenana manga i katoa na êbena na ganiana ni vogasiha ni ngêhaku.

¹¹Ngaia ki tavogi nga na gavona, na hasigona hato, na bêna, na êgana ma na rimana, na aunâbana henigi na angena,

¹²ma ki migihura tenia na tênga tanga na agua apuna ga rurugi igê na rahu. Ma i ngekana igê na uku na rahu ngaia ki sungigi nga igê na gi na ario.

¹³Manga vi na hakuta hagenani na Isiraelita ma ka bagararâ me ka tasitasi ma ka aharêngigi na ramata iana na Araha,

¹⁴ngaira ki tuguhira viga tagarenia na bêhâgana na puruka mane manga na vogasiha ni bonoteniha ni tasi, matena ga tahetara vi ngaira ka bani tasi. Ngaira ka urua me nga tanga na ruma na gahu apuna iana na Araha.

¹⁵Na meraha iata ka nakagi nga na rimata i bêna na puruka mane ma ka nahuia ki meme nga i ngekana.

¹⁶Na mane ni vogasiha i teha ki mebanu nga tagua na gapuna na puruka mane igê na ruma na gahu apuna.

¹⁷Ngaia ki anumia nga na kakêna igê ma ki kamusia hagepi i maana na gahu i kuku i maana na kiboru apuna iana na Araha.

¹⁸Ngaia ki taruhigenia tagua na gapuna na puruka igê na bugusuni ge he na sukuni na bea ni sungiani na marâ i sigini koro i rarona na ruma na gahu apuna. Na gapuna na agua i hitahita râ, ngaia ki karangia nga i hunana na bea ni vogasiha ga susu igê, i gâga i maana na ruma na gahu apuna.

¹⁹Hemuri ngaia ki toregi na êbena hato ma ki sungigi igê na bea ni vogasiha.

²⁰Ngaia ki katoa nga na puruka mane ngekana tagenana ma manga i katoa na puruka mane ni vogasiha ni bonoteniha ni tasi. Igê na tarana ngekana ngaia ki tagarenia nga na vogasiha ni bonoteniha ni tasi iata na enoni ma na tasi ka kahu hatohato tenira.

²¹Hemuri ngaia ki mehura nga na puruka mane tenia na tênga ma ki sungia nga manga i sungia na puruka mane ni vogasiha ni bonoteniha ni tasi iana marena. Ngaia nga ka na vogasiha ni bonoteniha ni tasi iana na hakuta.

²²Manga vi na meraha ma ki bagararâ me ki tasitasi ma ki aharê igê na ramata iana na Araha.

²³Ngaia ki tuguhia, vi tagarenia na goti mane i apeapekoro ma ki pe baubêga, matena i tahetara, vi ngaia ki bani tasi.

²⁴Ngaia ki naka nga na rimana i bêna na goti ma ki nahuia ki meme i na apanena na mahana na bea ni vogasiha, na agua ga nahuira ka meme igê na ganiani tanga ga susu renigi. Ngaia nga nga na vogasiha ni bonoteniha ni tasi.

²⁵Na mane ni vogasiha ki anumia nga na kakêna igê na gapuna na goti ma ki taruhigenia igê na bugusuni ge he na sukuni na bea ni vogasiha. Na gapu na agua i hitahita râ, ngaia ki karingia i hunana na bea ni vogasiha.

²⁶Hemuri ngaia ki sungigi nga na êbena hato igê na bea ni vogasiha, tagenana manga i sungigi na êbeta na ganiani ni vogasiha ni ngêhaku. Ngaia nga nga hanana na mane ni vogasiha i tagarenia na vogasiha ni bonoteniha ni tasi iana na meraha ma na tasi ka kahu hatohato tenia.

²⁷Manga vi na ataka mavê na enoni ma ki bagararâ me ki tasitasi ma ki aharê igê na ramata iana na Araha,

²⁸ngaia ki tuguhia matena i tahetara vi ngaia ki bani tasi vi tagarenia na goti hehene i apeapekoro ma ki pe baubêga.

²⁹Ngaia ki naka nga na rimana i bêna na goti ma ki nahuia ki meme i na apanena na mahana na bea ni vogasiha igê na agua ga nahuira ka meme igê na ganiani ga susu renira.

³⁰Na mane ni vogasiha ki anumia nga na kakêna igê na gapuna na goti, ki taruhigenia igê na bugusuni ge he na sukuni na bea ni vogasiha ma na gapu i hitahita râ ki karangia nga i hunana na bea ni vogasiha.

³¹Hemuri ngaia ki tavogi râ nga na êbena hato tagenana ma manga i tavogi râ na êbeta na ganiani ni vogasiha ni ngêhaku, ma ki sungigi nga igê na bea ni vogasiha. Na vanuhana ki hagakoro obana na Araha. Ngekana nga hanana na mane ni vogasiha i tagarenia na vogasiha ni bonoteniha ni tasi iana na mane ngekana ma na tasi ki kahu hatohato tenia.

³²Manga vi na mane ma ki merâ me hete na sipi tanga na vogasiha ni bonoteniha ni tasi, ngaia ki merâ me nga na sipi hehene i apeapekoro ma ki pe baubêga.

³³Ngaia ki naka nga na rimana i bêna na sipi ma ki nahuia ki meme i na apanena na mahana na bea ni vogasiha igê na agua ga nahuira ka meme igê na ganiani ga susu renira.

³⁴Na mane ni vogasiha ki anumia nga na kakêna igê na gapuna na sipi, ki taruhigenia igê na bugusuni ge he na sukuni na bea ni vogasiha, ma na gapu i hitahita râ ki karangia nga i hunana na bea ni vogasiha.

³⁵Hemuri ngaia ki tavogi râ nga na êbena hato tagenana ma manga i tavogi râ na êbeta na sipi ni vogasiha ni ngêhaku. Ngaia ki susu tanga na Araha renia na êbena igê na bea ni vogasiha henigi na ngêra ni vogasiha ni ngêhaku. Ngekana nga hanana na mane ni vogasiha i tagarenia nga na vogasiha ni bonoteniha ni tasi iana na mane ngekana ma na tasi ki kahu hatohato tenia.