Read Kahua HAGARAHENGA 5 Bible Online

HAGARAHENGA 5 - Kahua bible

HAGARAHENGA 5

¹Na tasi ga araria nga na vogasiha ni bonoteniha ni tasi, kani igê. Manga vi na mane ni hagatamasinga ma ki unia ta na enoni, hanana vi hagarongoa renia na ta ki bâsia se rongoa, ma na enoni ngekana ki usi, ngaia ki tasi ma ki aharê.

²Manga vi ta na enoni ma ki bagararâ me ki hataria na marâ i pe matarotaro suria na ramata na rotu manga na marâ mamauri i me, na ani manata se vasiga se na ani i angoango, ngaia ki pe matarotaro nogana ma ki tasi, matena i tahetara vi ngaia ki bani tasi.

³Manga vi ta na enoni ma ki bagararâ me ki hataria na marâ i pe matarotaro suri na ramata na rotu i apena na enoni, henaka vi na ta, ngaia ki pe matarotaro nogana ma ki aharê, matena i tahetara renia.

⁴Manga vi ta na enoni ma ki ata ni tohetohe mavê, henaka vi renia na ta, ngaia ki aharê, matena i tahetara renia.

⁵Na enoni i katokato vikana, ngaia ki aharê ma ki tuguhia vi rangania na tasi iana.

⁶Ngaia ki tagarenia nga tanga na Araha na sipi hehene se na goti hehene mena na tasi iana. Na mane ni vogasiha ki tagarenia nga na vogasiha ni bonoteniha ni tasi iana na enoni ngekana.

⁷Manga na enoni ma ki pe araria vige tagarenia na sipi se na goti, ngaia ki tagarenirerua nga tanga na Araha na gâ gi rua se na barisumata gi rua mena na tasi iana: tani tanga na vogasiha ni bonoteniha ni tasi ma tani tanga i susu renia tanga na Araha.

⁸Ngaia ki torererua nga tanga na mane ni vogasiha ma ngaia ki tagarenia hagenago na manu tanga na vogasiha ni bonoteniha ni tasi. Ngaia ki piropiro nguria na riona na manu

⁹ki huhura me igê na gapu, ma tagua na gapuna ngaia ki kamusia re na apanena na bea ni vogasiha. Na gapu i hitahita râ ki gogogo so i hunana na bea ni vogasiha. Ngaia nga ka na vogasiha ni bonoteniha ni tasi.

¹⁰Hemuri ngaia ki susu renia na ruata na manu surigi na ramata. Vikana nga na mane ni vogasiha i tagarenia nga na vogasiha ni bonoteniha ni tasi iana na mane ngekana ma na tasi ki kahu hatohato tenia.

¹¹Manga vi na mane ma ki pe araria vige tagarenirerua na gâ gi rua se na barisumata gi rua, ngaia ki tagarenigi nga na 2 kilo na palaua taranina manga na vogasiha ni bonoteniha ni tasi. Siana ki nakagi na oile se na marâ i sigini koro igê matena ga sungigi, suria vi na vogasiha ni bonoteniha ni tasi ki mareha vi na vogasiha ni koni.

¹²Ngaia ki torea nga na palaua tanga na mane ni vogasiha ma ngaia ki arahia ki taua i rimana, ma ki susu renia igê na bea ni vogasiha ni ngêra. Na girarana vi ngaia hagenani ki na anina na Araha. Ngaia ka na vogasiha ni bonoteniha ni tasi.

¹³Vikana nga hanana na mane ni vogasiha i tagarenia nga na vogasiha ni bonoteniha ni tasi iana na mane ngekana ma na tasi ki kahu hatohato tenia. Na palaua i hitahita râ ka na anina na mane ni vogasiha, i tagenana ma henia na vogasiha ni koni.

¹⁴Na Araha ki vatea o Moise renigi na ramata igê.

¹⁵Manga vi ta na enoni ma ki bagararâ me ki pe tagarenigi tanga na Araha na vuriha, ga tuguhia vi tagarenigi, ngaia ki tagarenia nga tanga na Araha na sipi mane se na goti mane i apeapekoro ma ki pe baubêga, na mena na tasi iana. Na mena na sipi se na goti ki arâ suria nga na ramata na rotu.

¹⁶Henaka vi manga ngekana, ma ngaia ki tâ tanga vi tagarenia tanga na Araha na haga i hagêrahu vige tagarenigi henia kê nikâ ta na haga. Ngaia ki tagarenigi nga tanga na mane ni vogasiha ma ngaia ki kahu tagarenia na vogasiha ni bonoteniha ni tasi iana na mane ngekana ma na tasi ki kahu hatohato tenia.

¹⁷Manga vi ta na enoni ma ki bagararâ me ki aharê igê ta na ramata iana na Araha, ngaia ki tasi ma ki tuguhia vi kasikasi mena renia.

¹⁸Ngaia ki tagarenia nga tanga na mane ni vogasiha na sipi mane se na goti mane i apeapekoro ma ki pe baubêga manga na vogasiha ni kasi mena. Na mena na sipi se na goti ki arâ suria nga ramata na rotu. Na mane ni vogasiha ki kahu tagarenia na vogasiha ni bonoteniha ni tasi iana na mane ngekana, i bagararâ me ki tasi, ma na tasi ki kahu hatohato tenia.

¹⁹Ngaia ka na vogasiha ni kasi mena tanga na tasi iana na mane i haritohea na Araha.