Read Kahua HAGARAHENGA 6 Bible Online

HAGARAHENGA 6 - Kahua bible

HAGARAHENGA 6

¹Igê nga ka na ramata na Araha i vatea nikâ o Moise renigi.

²Manga vi ta na Isiraelita ma ki tohe vero vi na tamana ki pe vatea rârâ ta na marâ, hanana vige bâbâsuria tanga ma ki usi vige vatea aporo, ngaia ki tasi, suria i aharê igê na ramata iana na Araha. Manga vi ta na Isiraelita ma ki tohe vero, vi ngaia ki pe hanago tenia na tamana na Isiraelita, se vi i hagabekasia vi tavoa ta na marâ tenia, ngaia ki tasi, suria i aharê igê na ramata iana na Araha.

³Manga vi ta na Isiraelita ma ki tohe vero, vi ngaia ki pe tarahua rârâ na marâ na tamana i hagatasia, ngaia ki tasi, suria i aharê igê na ramata iana na Araha.

⁴Manga vi na mane ma ki tasitasi vigana, ngaia ki urusia aporo nga na marâ, i tohe vero renia. Matena i rangaranga na bagatauhana, ngaia ki urusia nga hagenani henia akê nikâ ta na haga.

⁶Nikâ ngaia ki tagarenia nga tanga na mane ni vogasiha na sipi mane se na goti mane, i apeapekoro ma ki pe baubêga. Ngaia ka na vogasiha ni kasi mena tanga na Araha. Na mena na sipi se na goti ki arâ suria nga na ramata na rotu.

⁷Na mane ni vogasiha ki kahu tagarenia nga na vogasiha ni bonotenia ni tasi iana na mane ngekana ma na tasi ki kahu hatohato tenia.

⁸Na Araha ki bonasia o Moise,

⁹hanana i hagarongora o Aroni mo karena renigi na ramata tanga na matena ga susu igê tanga na Araha. Na ganiana ga susu re ki tâtâ nga igê na bea ni vogasiha suria na bungiana hagenani ma siana ki meme na gi.

¹⁰Igê na mahogotana na mane ni vogasiha i hagesuru renia na tuguni borahu i siki ni mane ni vogasiha ma renia na kâhisi siki iana, ngaia ki raguragu râ nga na rahu monamonaga tenia na bea ni vogasiha ma ki nakagi i ano hagarangia na bea ni vogasiha.

¹¹Hemuri ngaia ki urusigi nga na tuguni ni mane ni vogasiha ma ki kahu toregi vê na rahu tarege tenia na tênga igê na agua i apuna tangagi.

¹²Na gi igê na bea ni vogasiha ki ama ni tarê nga ma siana hagetage ki meme. I na ara ni mavoraro na mane ni vogasiha ki raria nga na gi, ki naka maninga nga na ganiana tanga ga susu renia igê ma ki sungia na êbena ni vogasiha ni ngêkahu.

¹³Na gi igê na bea ni vogasiha ki ama ni tarê nga ki bê ki arâ ma siana hagatage ki meme.

¹⁴Igê nga nga na ramata renigi na vogasiha ni koni. Ta na mane ni vogasiha tenia na raraha iana o Aroni ki tagarenia nga na vogasiha ni koni tanga na Araha i maana na bea ni vogasiha.

¹⁵Ngaia ki raguia nga i rimana na palaua henia na oile ma henigi na marâ i sigini koro matena ga sungigi igê, ma ki sungigi na marâ hato ngegana igê na bea ni vogasiha. Na girarana vi na marâ hagenani ka na anina na Araha. Na vanuhana na vogasiha ngekana ki hagakoro obana na Araha.

¹⁶Na agua i hitahita râ ki tangara na mane ni vogasiha. Ngaira ka hahigi nga na bereti re, ma i mareha vige toraria na makona henia na isiti. Ngaira ka ngaugi nga igê na agua apuna igê na mahera i maana na ruma na gahu apuna iana na Araha. Na Araha nga kani vatera na mane ni vogasiha na bereti ngegana. Ngaia ka na apaneta na vogasiha ni ngêra. Ngaia ki apuna teha ngavê manga na vogasiha ni bonoteniha ni tasi se manga na vogasiha ni kasi mena.

¹⁸Ngaira hato na mane tenia na raraha iana o Aroni ga heheurisige ki bê ki arâ, ki araria viga ngaua, suria ngaia ka na apaneta na vogasiha ni ngêra tanga na Araha. Na anima na enoni getea i hataria na vogasiha ni ngêra, ngaia ki page akeki renia na raramohana na apuhana.

¹⁹Na Araha ki vatea o Moise renigi na ramata igê.

²⁰Tanga na hagapuanariana na mane ni vogasiha tenia na raraha iana o Aroni. Igê na tangiana ga hagapunaria igê ngaia ki vogasia nga igê na Araha renia na 2 kilo na palaua taranina tagenana manga na vogasiha ni palaua i na ara ni tangiani: tani na kilo i mavororo ma tani i manurahi.

²¹Na makona ki hetorariga henia na oile ma ka hagabangia. Hemuri ka kahu menamenaria ma ka susu renia manga na vogasiha ni koni tanga na Araha. Na vanuhana ki hagakoro obana na Araha.

²²Na ara ni raraha iana o Aroni i tagara manga na mane ni vogasiha i teha, ngaia ki tagarenia nga na vogasiha ngekana tare ki bê ki arâ. Ngaira ka susu nga hagenani renia tanga na Araha.

²³I apu vige ngaua na vogasiha ni palaua i tagarenia na mane ni vogasiha. Ga sungia hagenani nga hete.

²⁴Na Araha ki bonasia o Moise,

²⁵ki hagarongora o Aroni mo karena renigi na ramata igê renia na vogasiha ni bonoteniha ni tasi. Ngaira ka nahuia nga ki meme na ganiana tanga na vogasiha ni bonoteniha ni tasi igê na apanena i mahana na bea ni vogasiha, na agua ga nahuira tare ka meme igê na ganiani ga susu renigi. Na vogasiha ngekana ki apuna teha ngavê.

²⁶Na mane ni vogasiha i susu renia, ngaia ki ngaua nga igê na agua apuna igê na mahera i maana na ruma na gahu apuna iana na Araha.

²⁷Na anima na enoni se na marâ i hataria na hasigona ngekana, ngaia ki page akeki renia na raramohana na apuhana. Manga vi na gapuna na ganiana ma ki pisiria na anima na gahu ngekana, ka tanania nga igê na agua apuna.

²⁸Manga ga hagagoboa na hasigona na ganiana ngekana igê na apira na hê, ngaira ka kamaria. Manga vi na apira na kapa, ngaira ka ratea nga ma ka tanania.

²⁹Ngaira ma na mane tenia na raraha iana o Arone ga mane ni vogasiha kaninga girara ga ngaua na vogasiha ngekana, suria i apuna teha ngavê.

³⁰Manga vi ngaira ma ka mebanu tagua na gapuna na ganiana ngekana i ruma na gahu apuna tanga na vogasiha ni bonoteniha ni tasi, ngaia ki apu tangara vige ngaua na hasigona ma ka sungia nga hete.