Read Kahua HAGARAHENGA 7 Bible Online

HAGARAHENGA 7 - Kahua bible

HAGARAHENGA 7

¹Igê na ramata renigi na vogasiha ni kasi mena ga apuna teha ngavê.

²Ngaira ka nahuia nga ki meme na ganiana tanga na vogasiha ngekana igê na mahana na bea ni vogasiha, na agua ga nahuira ka meme igê na ganiani ga susu renigi. Na gapuna ngaira ka tahusigenia nga igê na apaneni ge he na bea ni vogasiha.

³Ngaira ka tavogi râ nga na êbena hato ma ka sungia nga igê na bea ni vogasiha: na kerena ubega, na êbena na aunâbana,

⁴na guana apinige iana henigi na êbeterua igê, ma na agua koro na rokona henia na êbena igê.

⁵Na mane ni vogasiha ki sungigi nga na êbeni hato ngegana igê na bea ni vogasiha manga na vogasiha ni ngêra tanga na Araha. Ngaia ka na vogasiha ni kasi mena.

⁶Na mane tenia na raraha iana o Aroni ga mane ni vogasiha, ki ararira viga ngaua. Ma ngaira ka ngaua nga igê na agua apuna, suria i apuna teha ngavê.

⁷Na ramata tangarerua na vogasiha ni bonoteniha ni tasi ma na vogasiha ni kasi mena, ki tagenana ma. Ngaia ki manga ikê: Na hasigona na ganiana ki tanga na mane ni vogasiha i vogasi re.

⁸Na gavona na ganiana ga susu renia ki tanga na mane ni vogasiha i tagarenia na vogasiha ngekana.

⁹Na vogasiha ni bereti ga hahia se ga hagabangia igê na bahitana na kapa, se ga hanua, ngaia ka na anina na mane ni vogasiha, i vogasia na Araha re.

¹⁰Ma ngaigi hato na palaua maga ga torarigi henigi na oile se mareha, ngaigi ka na anita na mane ni vogasiha tenia na raraha iana o Aroni. Ngaira ka tonganigi nga hetangenani.

¹¹Igê ka na ramata renia na vogasiha ni ngê haku ga vogasia re na Araha.

¹²Manga ta na mane ma ki tagarenia na vogasiha ngekê hanana vi visia koro God, ngaia ki tagarenia nga na ganiana tanga na vogasiha henigi nikâ na bereti i mareha na isiti igê tanga na vogasiha. Ngaigi ka na guani upupuga ga tagarahigi renia na makona na palaua i toraria na oile, se na ani manihinihi ga tarugigi re na oile, se na ani sisite ga tagarahigi henia na oile.

¹³Ma henigi na ani ngegana ngaia ki tagarenigi nga na bereti, ga tagarahigi renia na palaua henia na isiti.

¹⁴Ngaia ki tagarenia nga tanga na Araha na guana gi tage tenigi na ara ni hitangini na bereti ngegana. Ngaigi ka na anina na mane ni vogasiha i torea na gapuna na ganiana ma ki tahusigenia na apaneni na bea ni vogasiha.

¹⁵Ga ngaua nga na hasigona hato na ganiana igê nga na tangiana ga vogasi re. Siana ki hitahita râ tagua tanga na mavoraro.

¹⁶Manga vi na mane ma ki tagarenia na vogasiha ni ngêhaku, hanana vi hagamonaria na suruha iana, se vi obania ma vikana, ngaia ki araria vi siana ki ngaua hato igê na tangiana ga vogasi renia igê. Ma ki koro ma viga ngaua na agua i hitahita râ igê na tangiana i muri.

¹⁷Ma na hasigona i hitahita râ tanga na oruta na tangiana, ka sungia nga.

¹⁸Manga viga ngaua igê na oruta na tangiana God ki asa vige aganaria na vogasiha iana na mane ngekana. Na vogasiha vikana i asa vige tamania na mane ngekana, suria i pe matarotaro suria na ramata na rotu. Na anima na enoni i ngaua, ngaia ki page akeki renia.

¹⁹Manga vi ta na marâ i pe matarotaro suria na ramata na rotu ma ki hataria na hasigona, siana ka ngaua ma ka sungia râ ma hete. Na anima na enoni i matarotaro suria na ramata na rotu, ki koro ma tanga vi ngaua na hasigona.

²⁰Ma ki manga vi na ani i pe matarotaro ma ki ngaua, ngaia ki hatohato hagetage tenia na hakuta na kariana God.

²¹Nikâ, manga vi na enoni ma ki hataria na marâ i pe matarotaro suria na ramata na rotu, henaka vi na enoni se na ganiana, ma ki kahu ngaua na hasigona na vogasiha ngekana, ngaia ki hatohato hagetage tenia na hakuta na kariana God.

²²Na Araha ki vatea o Moise renigi na ramata igê

²³tangara na Isiraelita. I apu hagetage vige ngaugi na êbeta na puruka, se vi na sipi se vi na goti.

²⁴I apu vige ngaua na êbena na ganiana i meme marena se vi ta na marâ vasiga i garahunia, ma ki koro ma tangagi na tarani getigi.

²⁵Na enoni ma ki ngaua na êbena na ganiana, ga tagarenia tanga na Araha manga na vogasiha ni ngêra, ngaia ki hatohato hagetage tenia na hakuta na kariana God.

²⁶Naka ma na Isiraelita ga oga i na agua ma i he, ngaira ki apu hagetage tangara, vige ngaua na gaputa na manu se na ganiani.

²⁷Na enoni i aharêngia na ramata ngekana ngaia ki hatohato hagetage tenia na hakuta na kariana God.

²⁸Na Araha ki vatea o Moise renigi na ramata igê

²⁹tangara na Isiraelita. Na anima na enoni i tagarenia na vogasiha ni ngêhaku, ngaia ki naka râ nga tagua tanga na Araha.

³⁰Ngaia marena ki tagarenia nga manga na vogasiha ni ngêra. Ngaia ki tagarenigi nga na êbena ma na matona tanga na Araha.

³¹Na mane ni vogasiha ki sungia nga na êbena igê na bea ni vogasiha ma na matona ki na anita na mane ni vogasiha.

³²Na êgana na otona na ganiana, ngaia ki votoa nga

³³tanga na mane ni vogasiha, i vogasi re na gapuna ma na êbena na vogasiha ni ngêhaku,

³⁴Na matona na ganiana ma na êgana na otona ka na votovoto, na Araha i tavogi tenira na Isiraelita ma ki votogi tangara na mane ni vogasiha. Na Isiraelita ka votogi ngaigi nga tangara na mane ni vogasiha tare ki bê ki arâ.

³⁵Ngaigi nga ka na ngêra ga tagarenigi tanga na Araha, i votogi tangara o Aroni mo karena igê na tangiana ga hagapunarira igê ka mane ni vogasiha.

³⁶Igê nga na tangiana ngekana na Araha ki bonasira na Isiraelita, ka votogi igê na agua ngegana na vogasiha tangara. Ngaia nga ka na ramata na Isiraelita ga arâ suria nga tare ki bê ki arâ.

³⁷Hoita, ngaigi nga ka na ramata tangagi na vogasiha ni sungiha, na vogasiha na koni, na vogasiha ni bonoteniha ni tasi, na vogasiha ni kasi mena, na vogasiha ni hagapunariana na mane ni vogasiha, ma na vogasiha ni ngêhaku.

³⁸I ngekana, igê nga na hungana i Sinai igê na bagamasusu raha God ki vatea igê o Moise renigi na ramata ngegana igê na tangiana i bonasira igê na Isiraelita ka tagarenigi na vogasiha iata.