Read Kahua HAGARAHENGA 9 Bible Online

HAGARAHENGA 9 - Kahua bible

HAGARAHENGA 9

¹Igê na tangiana i murina i hato na hagapunariata, o Moise ki unira me o Aroni mo karena ma na meraha iata na Isiraelita.

²Ngaia ki vi tanga o Aroni, ki vi: “Gu mererârua me na bêhâgaterua na puruka mane ma na sipi mane, garu apeapekoro ma karu pe bâubêga, ma ko vogasia na Araha renirerua: na puruka mane tanga na vogasiha ni bonoteniha ni tasi ma na sipi mane tanga go susu renia.

³Hemuri ko vi tagara na Isiraelita ka merarâ me na goti mane tanga na vogasiha ni bonoteniha ni tasi, na karena na puruka i tongatonga na harisi gi tage iana ma na karena na sipi i tongatonga na harisi gi tage iana, garu apeapekoro ma karu pe baubêga, tanga go susu renirerua,

⁴ma na puruka mane ma na sipe mane tanga na vogasiha ni ngêhaku. Ngaira ka tagarenira nga tanga na Araha manga na vogasiha henigi na palaua i hetorariga henia na oile tanga na vogasiha. Ngaira ki tuguhira nga viga katokato vikana, suria na Araha ki page voravora me tangara i rikini akê.”

⁵Ngaira ka merarâ me tanga na maana na ruma na gahu apuna, manga o Moise i bonasira. Na Isiraelita hato ka haku me i ngekana, hanana ga rahesia na Araha.

⁶O Moise ki vi: “Na Araha ki bonasigamu kamu kato vigana, hanana na togatogana na mararana na Araha ki voravora me tangagamu.”

⁷Hemuri o Moise ki vi tanga o Aroni, ki vi: “Gu râ tanga na bea ni vogasiha ma ko tagarenirerua na vogasiha ni bonoteniha ni tasi ma na vogasiha ni sungiha, hanana ga hatohato na tasi iami igo ma na enoni. Gu tagarenia na vogasiha ni bonoteniha ni tasi iata na enoni suria na bonasiha iana na Araha.”

⁸O Aroni ki râ tanga na bea ni vogasiha ma ki nahuia ki me na bêhâgana na puruka mane tanga na vogasiha ni bonoteniha ni tasi iana marena.

⁹O karena ka tagarenia râ na gapuna tanga ma ngaia ki anumia na kakêna igê, ma ki taruhigi na bugusuni na bea ni vogasiha renia. Na gapu i hitahita râ ngaia ki karangia so i ano i hunana na bea ni vogasiha.

¹⁰Hemuri ngaia ki sungigi igê na bea ni vogasiha na êbena, na guana apinige iana ma na agua koro na rokona henia na êbena igê, suria na bonasiha iana na Araha tanga o Moise.

¹¹Ngaia ki sungigi na hasigona ma na gavona tarege râ tenia na tênga.

¹²Hemuri ngaia ki nahuia ki me na ganiana tanga na vogasiha ni sungiha iana marena. O karena ka tagarenia râ na gapuna tanga ma ngaia ki tahusigenigi igê na apaneni ge he na bea ni vogasiha renia.

¹³Ngaira ka tagarenigi râ tanga o Aroni na bêna na puruka ma na arani na hasigona ma ngaia ki sungigi igê na bea ni vogasiha.

¹⁴Hemuri ngaia ki tananigi na aunâbana ma na megana na êgana, ki nakagi hurigi na megani na arani igê na bea ni vogasiha ma ki sungigi.

¹⁵Hato vikana, ma ngaia ki tagarenigi na vogasiha iata na enoni. Ngaia ki têa na goti tanga na vogasiha ni bonoteniha ni tasi iata na enoni, ki nahuia ki me, ma ki vogasi renia manga i bani kato vikana renia na vogasiha ni bonoteniha ni tasi iana marena.

¹⁶Nikâ ngaia ki urua me na ganiana tanga na vogasiha ni sungiha ma ki susu renia surigi na ramata.

¹⁷Ngaia ki tagarenia na vogasiha ni palaua, ki raguia na palaua ki vunu na rimana ma ki sungia igê na bea ni vogasiha. Na ani ngekê na vogasiha ni palaua ki henia akê na ani i na ara ni tangiani.

¹⁸Ngaia ki nahuirerua karu me na puruka mane ma na sipi mane tanga na vogasiha ni ngêhaku iata na enoni. O karena ka tagarenia râ na gaputerua tanga ma ngaia ki kamusigi re na apaneni ge he na bea ni vogasiha.

¹⁹O Aroni ki nakagi na êbeterua na puruka mane ma na sipi mane

²⁰hurirerua na megani ma matoterua na ganiani ngegana ma ki tora ki migirâ tanga na bea ni vogasiha. Ngaia ki sungigi na êbeterua igê na bea ni vogasiha,

²¹ma ki tagarenigi na megani na matoterua ma na êgaterua i ototerua. Ngaigi na mahatanga tanga na Araha ma na anita na mane ni vogasiha suria na bonasiha iana o Moise.

²²Matena o Aroni i katogi hato na vogasiha ngegana, ngaia ki têbuhira na enoni ma ki nungia na Araha ki korokoro tangara ma hemuri ki aporo vato.

²³O Moise mo Aroni karu banu igê na ruma na gahu apuna iana na Araha ma na matena garu aporo hura me, ngairerua karu nungia na Araha ki korokoro tangara na enoni ma na togatogana na mararana na Araha ki vora me tangara na enoni hato.

²⁴Na Araha ki parama ma ki kasia me na gi ma na gi ki ngêa na vogasiha henigi na êbeni igê na bea ni vogasiha. Matena na enoni hato ka bâsia vikana, ngaira hato ka ngerengere ka maroro so i ano.