Read Kahua JEREMIA 1 Bible Online

JEREMIA 1 - Kahua bible

JEREMIA 1

¹Igê na buka ikê ka oga igê na marâ, i visigi o Jeremia, ma na marâ, i katogi. O Jeremia ngaia ki no karena o Hilikia, na mane ni vogasiha i hinua i Anatote i na apanena, ga oga igê na raraha iana o Benamino.

²Na Araha ki tamasi tanga o Jeremia, matena o Josia karena o Amone ki bani marungia me i Juta surigi na harisi tangahuru matare oru.

³Ma ngaia ki tamasi tanga nikâ igê na matena, i maneraha igê o Jehoiakimo karena o Josia. Ma i hemuri na Araha ki ama ni tamasi hagarako nga tanga, mataro me igê na matena iana o Setekia karena o Josia, i bani maneraha surigi na harisi tangahuru matare tage. Igê na rimata na hageha i na harisi ngekana ka henahuraura igê na ai ni Jerusaleme.

⁴Na Araha ki tamasi tangê, ki vi:

⁵“Inê kê bani atego i nago tarana gê hagatotogo i obana kenamu. Matena i mamênga, vigu voravora me, inê kê bani atego tangê mareku, ma kê bani kasigo, ko poropete iaku hanana go totora tamasinga iaku tangara na enoni i maveta.”

⁶Inê kê arami, kê vi: “E, inê kê pe girara, hanana ve tamasi. Inê kê kahu mane ma.”

⁷Ma na Araha ki aramiê, ki vi: “Siana ko vi, vi igo ka na mane haoru ma. Gu râ i pasita na enoni, gê hagatorangenigo tangara, ma ko hagarongora renigi na marâ, gê bonasigo re.

⁸Siana ko magutenira. Inê be ngahisigo ma be anumasigo. Ngaia kani gê visia, inê na Araha.”

⁹Ma na Araha ki gusia na rimana ma ki hataria na haraku, ma ki vi tangê, ki vi: “Bâ, inê kê hagagirarago renigi na tamasinga, i tuguhigo, vigo visigi.

¹⁰I ngekê inê kê vatego renia na ramoha, go marungigi na marâ i maveta henigi na raramohata, hanana go pirigi akê ma ko okegi vato, hanana go hogegi ma ko horogi, hanana go hagêrasigi aporo ma ko kasigi igê na atohani.”

¹¹Na Araha ki hagateê, ki vi: “Jeremia, na ta ko bâsia?” Inê kê aramia, kê vi: “Inê kê bâsia na arana na hara.”

¹²Na Araha ki vi: “Go vi koro. Tagenana ma na hara i takataka igê na matena tanga, na tamasinga iaku nikâ ka voravora me monari vikana.”

¹³Ma hemuri na Araha ki hagateê nikâ, ki vi: “Na ta nikâ ko bâsia?” Inê kê aramia, kê vi: “Inê kê bâsia na kuki i agobogobogo i Babilonia, ma ki sugia ma, vige mea me.”

¹⁴Na Araha ki vi: “Tenia i Babilonia na bagabevoana ki page mea hurira na enoni hato, ga oge igê na marê ikê,

¹⁵suria inê kê unira me ngaira hato na enoni i Babilonia. Na maneraha iata ka page nakagi na âgâga iata igê na maani na maa ni para i Jerusaleme, ma ka page rihuigi na para igê, ma ka page rihuigi nikâ na hinua getigi i Juta.

¹⁶Inê be hagaitangira na kariaku, suria ngaira ka tasi. Ngaira ka kasi reniê inê, ma ka vogasira ma na harasita na enoni getera. Ngaira ka tahegi na nunuta na ataro ma ka rahesira.

¹⁷Jeremia, gu tavoraha. Ku hagarongora renigi na ara ni marâ, gê bonasigo re. Siana ko magutenira, i era ma, kê kahu katogo, ko magu ngavê i maata.

¹⁸Bâ Jeremia, inê kê katogo, ko manga na hinua nganganihaga, manga na u ma na apê na aiani pusia na agua hagenani, pusira na maneraha i Juta ma na kariata, pusira na mane ni vogasiha ma na enoni.

¹⁹Ngaira hato ka page ura pusigo, ma ki asa, vige page teharigo, suria inê be ngahisigo ma be anumasigo. Ngaia kani gê visia, inê na Araha.”