Read Kahua JEREMIA 10 Bible Online

JEREMIA 10 - Kahua bible

JEREMIA 10

¹Isiraelita, mu karinga! Na Araha ki tamasi tangagamu, ki vi:

²“Siana kamu amaka surigi na tauhata na enoni, ga ogasigi na agua getigi i maveta. Siana kamu anumanuma renigi na marâ i vavearo, ga hagamagusira na enoni ngegana.

³Na rotu ma na tauha iata ka pe monari. Ngaira ka tapia na apinige i toro, ma na enoni, i girara i tahetahe, ki tahea na nununa na ataro renigi na gira iana.

⁴Ngaia ki parua renigi na siliva ma na golo. Ngaia ki rapusia igê na atohana, hanana siana ki apuri.

⁵Na nununi ngegana ka mangagi na marâ, ga hagamagusi barare renigi i mu. Ngaigi ki bara vige tamasi. Ngaigi ki bara vige arârâ. Ngaigi ka toregi rârâ ma. Siana kamu magutenigi. Ngaigi ki asa vige erasigamu se vige tamanigamu.”

⁶Araha, i mareha tani vige maratoramu. Igo ko raramohaga hunigo. Na atamu ki rongo raha teha ngavê.

⁷Ti so ma ki pe hagahigasigo? Igo ko marungira na enoni hato i maveta. I tuguhira na enoni hato, viga hagahigasigo. I mareha tani, vige maratoramu i maveta, i pasita na enoni ga tako mataha, se i berarogata na maneraha iata.

⁸Ngaira hato ka beka ma ka bonobonoga. Na nununi na ataro ngegana ka na apinige purua ma, ma ki asa vige hagesurira na enoni ngegana renigi ta na marâ.

⁹Ngaira ka parugi na nunuta na harasita renigi na siliva ni Sipeni, renigi na golo ni Upasi. Ngaigi ki bâkoro, ma ngaira na enoni kani ga tagarahigi. Ngaira ka hagesurugi na nunuta na harasita renigi na gahu rotorotoaga memera, ga hêrigi na enoni ni hêhênga.

¹⁰Igo getego, Araha, ki na God monari. Igo getego ki na God i mauri. Igo getego ki na Araha i gâga tarema. Na maveta ki gisigisi, matena go mangariaga. Mareha vê ta na enoni i maveta, vige tahi tenia na mangariaganiha iamu.

¹¹Mu hagarongora na enoni i maveta, vi na ataro ngaira ka page mutemute. Ngaira ka pe hagavorarerua na ano ma na vavearo. Ngaira ka page magahuru ngavê tenia na maveta.

¹²Na Araha ki hagavora na maveta, suria ngaia ki raramohaga hunia. Ngaia ki hagavora na ano, suria ngaia ki tako mataha ngavê. Ngaia ki gasia na vavearo, suria ngaia ki girara ngavê.

¹³Ngaia ki tamasi ma, ma na ve ka vahao i avarona na vavearo. Ngaia ki katogi na marangea igê na roto. Ngaia ki unigi me na tarêheroga tenigi na maani na tangi.

¹⁴Matena na enoni ka rigigi na tarani ngegana, ngaira ka konekone ma ka tugupu. Na mane, ga tahegi na nunuta na ataro, ka maki, suria na harasita ki asa, vige hagavoregi rârâ ta na marâ. Na harasita ka na marâ ni hagaparunga, na marâ purua ma, ga pe mauri.

¹⁵Ngaigi ki na marâ ni hagaruruha ma. Igê na mateni ni hagaitangiha na Araha ki page hagamagahurugi râ.

¹⁶Ngaira ka pe maratorana na God, na Isiraelita ka rahesia. Ngaia nga ki na ani i hagavorara na ara ni marâ hatohato, ma ki atera na Isiraelita ka vora re na anina. Na atana ki na Araha raramohaga hunia.

¹⁷Ai ni Jerusaleme, Na merongami ka oga rihigamu. Mu hagarurugu!

¹⁸Na Araha ki tamasi, ki vi: “Bâ, inê be sigohenigamu hura nga tenia na apanena iami. Inê be hagamamasiagagamu, kamu girara!”

¹⁹Na ai ni Jerusaleme ka hagagege, ka vi: “E, i era ngavê tangagia! Ga mamasiaga bâraha. Na maara iaka ki asa, vige mavo. Igia ka hemamarihi ngavê. I asa vige page henakagi.

²⁰Na ruma iaka ka aruhuruhu. Na ara ni marâ ka ahogehoge. Na kareka hato ka panigia. Mareha vê tani vige hita so, hanana vige toregi aporo na ruma iaka, se vige akigi aporo.”

²¹Inê kê aramira, kê vi: “Na maneraha iaka ka bekabekaga. Ngaira ka pe hagate tarata i pasina na Araha. Tahema ngaira ka pe akê me, hanana vige bêngenira maninga hete na kariata. Ngaira ka tokorenira ma na goaka.

²²Rongo! Ta ma marâ! Na me i Babilonia ka hebungi. Na merongaka ka page râ me, hanana ge ruhuruhugi na hinua i Juta, ke vora re na hiru tangara na o vasiga.”

²³Araha, inê kê bani girara, vi i pe oto tanga na enoni, vige atea marena na tara, i tuguhia, vi arâ suria. I pe marisina na enoni, vige hagahita na ogaha iana.

²⁴Araha, gu hagaotogami na kariamu, ma siana ko ramonigami ngavê, suria i manga vi go hagaitangigami, matena go mangariaga, ki page hatohato iamami.

²⁵Gu mangariaga hete tangara na enoni, ga ogasigi na agua getigi i maveta, ma ka pe rahesigo hete, ma ka usitenigo ma, suria ngaira ka bani nahuira na kariamu. Ngaira ka bani erasigami ngavê, ma ka bani hagahihirungia na apanena iamami.