Read Kahua JEREMIA 11 Bible Online

JEREMIA 11 - Kahua bible

JEREMIA 11

¹Na Araha ki tamasi tangê, ki vi:

²“Gu karingagi na tamasinga iaku renia na suruheri iaku henira na kariaku. Gu hagarongora na ai ni Juta me Jerusaleme renia.

³Inê na Araha God iata na Isiraelita kê vi vikê: I page era ngavê tangara na ara ni enoni hato, ga pe râ suria na suruheri iaku henira.

⁴Ngaia ki na suruheri iaku henira na êvarimi, matena gê hagatahira tenia i Esipito, ga mamasiaga igê, manga igê na anguruna na gi. Inê kê vi tangara, viga têtê viteaku, ma ka katogi na marâ, gê bonasira re. Inê kê vi tangara, vi manga ga têtê viteaku, ngaira ka page voravora re na kariaku, ma inê kê na God iata.

⁵Vikana inê kê page hagamonaria na suruha iaku tangara na êvarimi, vigê haganahunira renia na agua ni mako koro ma ni ruruguha. Ngaia nga ka na agua, mu nahunia i ngekê akê.” Inê kê vi: “Monari, Araha. Hagaitangira!”

⁶Ma na Araha ki vi tangê, ki vi: “Gu râhigi na hinua hato i Juta ma na tara hato i Jerusaleme. Gu hagarongora na enoni i ngegana renigi na tamasinga iaku, ma ko vi tangara, ka arâ surigi na tamasinga hato igê na suruheri iaku henira.

⁷Matena gê hagatahira na uvarita tenia i Esipito, inê kê bonasira nga, hanana viga têtê viteaku, ma kê bani bonasira me mataro i ngekê nga.

⁸Ma ngaira ka pe tê viteaku. Ngaira ka guguruga ma. Ngaira ka râ suri barisuta ma. Ngaira ka togeaga ma ka erataga ngavê. Inê kê bonasira, hanana viga marupea na suruheri, ma ngaira ka usi. Tahema inê kê hagaitangira suria na suruheri.”

⁹Ma na Araha ki tamasi tangê nikâ, ki vi: “Na ai ni Juta me Jerusaleme ka harikato reniê.

¹⁰Ngaira ka haritoheê mangara na êvarita. Ngaira ka bagatarihata mangara ngaira. Ngaira ka vogasira na harasita na enoni igê na agua getigi. Na ai ni Isiraele ma na ai ni Juta nikâ, ngaira hato ka aharêngia na suruheri iaku henira na êvarita.

¹¹Tahema inê na Araha kê vi tangara, vi inê be nakagi na bagabevoani ke tarahura. Ma ki asa iata, vige page tahitahi tenigi. Naka ma ga avarasiê, i asa iaku be aganarira.

¹²Ma hemuri na ai ni Juta me Jerusaleme ka page râ, ka avarasira na ataro, ga susu tangara. Ma na ataro ngegana ki bara, vige hagatahira na enoni ngegana, matena i tarahura igê na bagabevoani.

¹³Na harasita na ai ni Juta ka rako mangagi na hinua iata. Na ai ni Jerusaleme ka tagarahigi na bea ni vogasiha, ga rako mangagi na tara i hinua raha iata, ma ka susu igê tanga o Bala na ataro. Na tarana ngekana ki era ngavê.

¹⁴Jeremia, siana ko nungiê, hanana vigê tamanira na enoni i ngegana. Siana ko roherohe pusira. Siana ko nunginungi tangara. I asa iaku be aganarira, matena ga avarasiê igê na mamasiaganiha iata.”

¹⁵Na Araha ki vi nikâ, ki vi: “Kariaku hetakui, tanu hega kamu bagaparongami? I oto tangagami vari, vi igamu gâga i Ruma ni Rotu iaku? Mu takusia vari, vigamu girara mu rêrapusigi na bagabevoani, suria vi igamu kamu surusuru hagarako ma kamu vogasiê renigi na ganiani? Igamu ma kani mu tako vikana!

¹⁶I nago inê kê visigamu vi na apinige ni olive, i suru maravarava ma ki rasirasi re na guani koro. Ma i ngekê inê be sungia. Na marangea ki page suhigi na ahani ma na arani.

¹⁷I nago inê na Araha raramohaga huniê kê hasigamu na ai ni Isiraele me Juta. Ma i ngekê inê kê haganunugamu, hanana i page tarahugamu na eraha renigi na bagaparongami. Igamu kamu hagamangariê, suria mu susu tanga o Bala.”

¹⁸Na Araha ki hagarongoê, vi na merongaku ka harikato reniê. Ma inê kê kahu girara nogaku.

¹⁹Inê kê manga na karena na sipi, i pe hinaru, matena viga nanahuia ki meme igê. Inê kê pe girara, vi ngaira ka harikato reniê inê. Inê kê rongora, ga vi: “Nika, ge tapia na apinige, matena i hunguhungu mênga. Nika, ge nahuia ke me, hanana ge tako mu vê renia.”

²⁰Ma inê kê hagarahe, kê vi: “Araha raramohaga hunigo, i oto na suriha iamu. Igo ko giraragi na takoha iata na enoni ma na aitangihata. Inê kê hagêgurigo igo. Hoi, ve bâsigo, gu hagaitangira na enoni ngegana.”

²¹Na Araha ki hagarongoê, vi na me ni Anatote ka obania, viga nahuiê kê meme. Ngaira ka vi: “Manga igo, ma ko ama ni tarohenia nga na tamasinga iana na Araha, igami kami page nahuigo ko meme.”

²²Tahema na Araha raramohaga hunia ki vi: “Inê be hagaitangira nga. Na mane na gapu haoru iata ka page meme igê na hearihatana. Na kareta ka page mesi magêha.

²³Inê kê bani nakagi na mateni, na bagabevoani ka page tarahura igê na ai ni Anatote. I na matena ngekana ki asa, vige page tahi igê ta na hitangita.”