Read Kahua JEREMIA 12 Bible Online

JEREMIA 12 - Kahua bible

JEREMIA 12

¹Araha, igo ko oto tare, naka ma inê kê hagagege renigo. Henaka, ma inê kê obania be hagatego renia na tarana ni otoha. Tanu hega na enoni era ki koro na ogaha iata? Tanu hega na enoni ni hagaparunga ka akê me maninga igê na mani marâ?

²Igo ko hasira, ma ka vagavagaraga. Ngaira ka akê ma ka hunguhungu. Ngaira ka visigo bâkoro tare. Henaka, ma ngaira ka pe botage renigo.

³Araha, igo ko girara erasiê. Igo ko giraragi na tauhaku. Igo ko girarê, gê takuigo ngavê. Gu oke babahenira vê na eragani nuni ngegana, mangara na sipi tanga viga nahuira. Siana tani ki gavagava, hanana vi tahitahi.

⁴Na apanena iamami ki avagavagaraga arihu taraha? Na go igê ka marama arihu taraha? Na togoha iamami ka meme renigi na bagaparongata na enoni, ga vi, “God ki asa, vige hagaitangigia.”

⁵Na Araha ki vi tangê ki vi: “Manga igo, ma ko tanguhira na mane ma ko beto renira, tanu hega ko girara, vigo tanguhira na hosi? Manga i bara tangago, vigu ura igê na bena, tanu hega ko girara, vigo rêra igê na vapuna i Jotano?

⁶Henakara ma na goamu ma na ahemata iamu, ngaira ka hagabekasigo ma ka pe tamanigo ma ka merongasigo nogata. Siana ko gahe surira, naka ma ga megotamasi bâkoro.”

⁷Na Araha ki vi: “Inê kê kasi renira na Isiraelita. Inê kê murisigera na kariaku hetakui. Inê kê tagarenira na kariaku hetakui i rimata na merongata.

⁸Na kariaku hetakui ka merongasiê. Ngaira ka tamasi erasiê manga na laione i ngurunguru i bemu. Tahema inê kê kitenira.

⁹Na kariaku hetakui ka manga na manu, na tehe ka hagavota huria. Râ, hagahakura me na marâ vasiga, hanana ga ngasira na kariaku.

¹⁰“Rako na maneraha iata na mahuara ka erasia ngavê na pariki ni vaini iaku. Ngaira ka purigi so na mu iaku, ma ka katoa na apanena iaku, i hagagara koro, ki hagagara era.

¹¹Ngaira ka katoa ki avagavaga ma ki mamaotaga ngavê. I mareha rârâ ta na enoni, vige tako renia.

¹²“Igê na hungani, ga hareharega igê na masusu, na merongata na kariaku ka rugugu igê. Inê na Araha kê naka na hearihatana ki erasia na agua hagenani. I mareha ngavê igê na marapeha.

¹³Na kariaku ka hasigi na ngêra, ma ka akê ma na rauga era. Ngaira ka tagara bâraha, ma ka tagara hagaborâ ma. Suria inê, na Araha, kê mangariaga ngavê tangara, tahema ki mareha na ngêra tangara.”

¹⁴Na Araha ki vi: “Ikê na tamasinga iaku renira na enoni, ga oga igê na agua hagarangia i Isiraele. Ngaira ka erasia na agua, gê haganahunira na Isiraelita renia. Inê be pirira na enoni era ngegana mangagi na rauga era tenia na apanena iata, ma be hagatahira na ai ni Juta tenira.

¹⁵Ma i murina ngekana inê be takuira aporo ma be hagapurusira aporo tangagi na apanena iata mareta ma na mako iata mareta.

¹⁶I nago ngaira ka hagesurira na kariaku, ka tohe renia o Bala na ataro. Ma ki manga ngaira, ma ka taua na rotu iata na kariaku i mêrihata hagenani ma ka tohetohe reniê, inê na Araha mamauri, ngaira ka page hakunira na kariaku ma ka page nahunia na ramana.

¹⁷Ma ki manga na enoni i ta na agua, ma ka pe têtê viteaku, inê be pirira erasira ngavê. Ngaia kani gê visia, inê na Araha.”