Read Kahua JEREMIA 13 Bible Online

JEREMIA 13 - Kahua bible

JEREMIA 13

¹Na Araha ki vi tangê, ki vi: “Go arâ, ko vuria na gahu ma ko hagesuru renia. Siana ko hagaruhusia i ve.”

²I ngekana inê kê tê viteana na Araha, ma kê vuria na gahu, ma kê hagesuru renia.

³Ma na Araha ki tamasi tangê nikâ, ki vi:

⁴“Go arâ i ve i Uparatesi, ma ko pinihia na gahu iamu igê ta na vaba i ngekana.”

⁵Suria na Araha ki bonasiê, tahema inê kê râ ma kê pinihia hagarangia na ve i Uparatesi.

⁶Ma hemuri na Araha ki vi tangê nikâ, ki vi: “Gu aporo i Uparatesi ma ko torea aporo na gahu, gê bonasigo, ko pinihia i ngekana.”

⁷Tahema inê kê râ i Uparatesi tanga na agua, gê pinihia igê. Matena gê tavoa, inê kê bâsia, i bani kakaga ngavê, ma ki arari ma, viga kasia râ.

⁸Ma hemuri na Araha ki tamasi tangê nikâ, ki vi:

⁹“I ngekana nga inê kê page hagaerasigi ngavê igê na bâbâhata ma na raramohata na ai ni Juta me Jerusaleme, suria ga paro bâraha.

¹⁰Na eragani nuni ngegana ka usi, vige tê viteaku. Ngaira ka ama ni togeaga nga, ka râ suri barisuta mareta. Ngaira ka gahe surira na harasita na enoni getera, hanana ga hagarapera ma ka vogasira. Tahema ngaira ka page manga na gahu, i kakaga ngekana, i arari, viga kasia râ.

¹¹Tagenana manga na gahu, i rarapuhaga i na kâna na enoni, inê kê obania, vi ngaira hato na ai ni Juta me Isiraele, viga têtê gatagata i pasiku. Inê kê kato vikana, hanana vi ngaira ka voravora re na kariaku, ga hagarahasiê ma ka hagahigasiê, hanana i rongo raha na ataku. Ma ngaira ka haritoheê ma.”

¹²Na Araha God iata na Isiraelita ki vi tangê, ki vi: “Jeremia, gu vi tangara na ai ni Isiraele, ka hagavunusigi na ara ni pi na hê ni vaini renia na vaini. Ngaira ka page aramigo, ka vivi, ‘Vego, go vi vari, vi igami kami pe bani giraragi?’

¹³Go aramira suriê, ko vivi, ‘Inê na Araha be hagatunumira aharêsira na enoni hato i na agua ikê renia na vaini, mataro me ki aripo na maata: na maneraha tenia na raraha iana o Tavite, na mane ni vogasiha, na poropete, ma ngaira hato i Jerusaleme.

¹⁴Ma hemuri inê be taginira haku na bani nuni ma na gapu haoru mangagi na pi na hê. I asa hagetage, vi ve hetaki, se vi ve takuira, se vi ve tako rugu renira. Inê be hagamutera ngavê hete!’”

¹⁵Ai ni Isiraele, karingagi na tamasinga iana na Araha. Siana kamu paroparo. Mu têtê viteana hete.

¹⁶Mu hagahigasia na Araha God iami. I era ma ki hagarutusigamu ma kamu tapasu igê na bungiani. I era ma ki urusia na marara, mu naasia, renia na mengo.

¹⁷Manga mu pe têtê vita, inê be angi i obaku renia na paroparoha iami. Inê be angi bâraha ma ke gogogo na tavoni na maaku, suria ga henahuraura na kariana na Araha.

¹⁸Na Araha ki vi tangê, ki vi: “Vi tangarerua na maneraha ma kenana, karu guru vato tenigi na atohaterua, renia na tarepuri bâkoro iaterua ka bani vota tenigi na bêterua.

¹⁹Na meronga ka ura rihigi na hinua i Negeve. I bara ta na enoni, vige râ i ngekana. Na enoni hato i Juta ka bani henahuraura.”

²⁰Jerusaleme, gu bâ. Na merongamu ka râ me tenia i Babilonia. I he ngaira nga na enoni, i tuguhigo, vigo marupera? I he ngaira nga na kariaku, go ageagesira?

²¹Na ta ko page visia, matena ga page raugo ma ka page marungigo igê na enoni, go visira re vi na tamamu koro? Igo ko page maratorana na gete, i harate kare.

²²Igo ko page hagatego go maremu, ko vivi, “Tanu hega ki tarahuê na tarana ngekê? Tanu hega ka tasiê kê rupaturi ma ka tuguriê, kê rongo era henira?” Hoi, na tarani ngegana ka page tarahugo renigi na bagatarihamu, ga era ngavê.

²³Na enoni masuri ki mataku tanga vari, vi urusia ki mahui na apena, i masuri? Se na pusi totoperega ki girara vari, vi urusia na bâhanana? Manga vi mataku tangara, hoi, igo nogamu ko girara, go urisi parongamu, igo, go bagaparongamu ma!

²⁴Ai ni Jerusaleme, na Araha ki page tokorenigamu mangagi na go i marama, i ahegenigi na roga raha ni masusu.

²⁵Ngaia ki bani vi, vi na tarana ngekana ki page tarahugamu. Ngaia ka na katoha, i bani naka tangagamu, suria igamu kamu murisigea ngaia, ma kamu hagarapera ma na ataro.

²⁶Na Araha ngaia marena ki page tasitasigamu, kamu rupaturi ma kamu maki.

²⁷Ngaia ki bani bâsigi na bagatarihami, i kitenigi. Ngaia ki bani giraragamu, mu gahe surira na harasita na enoni ahuroto, mu vogasira igê na hungani ma i mu iami. Igamu kamu manga na mane, i tenia na gete iana na mane getea, se manga na hosi mane, i tenia na ani hehene, i borogogo. Ai ni Jerusaleme, i page era ngavê tangagamu! I arihu manga i he, ma kamu kahu matarotaro?