Read Kahua JEREMIA 14 Bible Online

JEREMIA 14 - Kahua bible

JEREMIA 14

¹Na Araha ki tamasi tangê renia na arito ru raha, ki vi:

²“Na ai ni Juta ka angi maramara. Na hinua igê ka hemeri. Na enoni igê ka tâ i ano ma ka angiangi. Na ai ni Jerusaleme ka avaravara.

³Na enoni ruruguha ka hagatorangenira na kariata, ka titi ve. Ngaira ka râ igê na ve karu ma ka pe tarahugi na ve. Ngaira ka aporo me baguru. Ngaira ka pe tako togo, ka tugupu ma ka maki.

⁴Ki mareha rârâ na rangi. Na mako ki avagavaga. Na enoni tagara i mu ka anumanuma, ka tugupu ma ka maki.

⁵Na goti ka kasira na kareta haoru, suria i marehasira na go.

⁶Na tonki vasiga ka ura igê a hungani hareharega. Ngaira ka manava tange na parematota mangara na o vasiga. Ngaira ka guruha noga na maata, suria i marehasira na ngêra.

⁷“Na kariaku ka avarasiê, ka vi, ‘Naka ma na tasi iamami ka ranganigami, gu tamanigami hete, Araha, manga go bani surua. Hagarako igami kami murisigego ma kami haritohego.

⁸Igo getego ma ka na hagêguringa iamami. Igo getego ma ko girara go hagatahigami tenigi na bagabevoani. I hega, igo vari ka na ani go râ me? I hega, igo vari ka na ani go mauru bê aporo ma ko riri?

⁹I hega, igo ko vari manga na ani i gasuga? I hega, igo vari ko manga na mane ni me, i pe tongasia rârâ na tangaruha? Araha, gu ngahisigami, igami na kariamu. Siana ko kasi renigami.’”

¹⁰Na Araha ki tamasi, ki vi: “Na tauhata na enoni ngegana, ngaira ka pe tari suriê, ma ka pe girara, vige hagaotora mareta. Tahema inê kê usitenira. Inê be ama ni takusigi nga na bagatarihata, ma be hagaitangira renigi.”

¹¹Na Araha ki tamasi tangê, ki vi: “Siana ko nungiê, vigê tamanira na enoni ngegana.

¹²Naka ma vi ngaira ka harihari, inê ki asa be aganarigi na avarasiha iata. Naka vi ngaira ma ka susu tangê, se viga vogasiê renigi na ngêra, i asa be aganarira. Inê be nahuira hete ke me renigi na hearihatana, na magêha ma na mera.”

¹³Ma inê kê vi: “Araha God, bâ, igo ko bani girara, vi na poropete ka vi tangara na enoni, vi i mareha na hearihatana, se vi na magêha, suria ngaira ka vi, vi igo ko surua, vi na ramana ki page gâga tare igê na apanena iamami.”

¹⁴Ma na Araha ki aramiê, ki vi: “Na poropete ka hagaparu, ma ka vi, vi ngaira ka tamasi urusiê. Ma inê kê pe hagatorangenira rârâ. Inê kê pe hagatorara. Inê kê pe visia rârâ ta na marâ tangara. Ngaira ka vi, vi inê kê hagamarutera. Ma ki mareha! Na hinarunga iata ka na marâ purua ma. Ngaira mareta ka takusigi kê ma mareta.

¹⁵Hoi, inê na Araha, be visia tangago na katoha iaku tangara na poropete ngegana, gê pe hagatorara, ma ngaira ka vi, vi ngaira ka tamasi urusiê, ma ka vi, vi na hearihatana ma na magêha ki asa, vige page nahuia na agua ikê. Inê be nahuira ke me renigi na hearihatana ma na magêha.

¹⁶Na enoni, ga rongogi na tarani ngegê tenira na poropete, ngaira nikâ ka page meme vikana. Na gahuata ka page kasigi hura i metara igê na tara i Jerusaleme, ma ka pe tako, vige bagira. Na hearihatana ma na magêha ka page tarahura ngaira hato: na mane, na gete ma na kare. Inê be hagaitangira meni na bagaparongata.”

¹⁷Na Araha ki bonasiê, hanana vigê hagagirarara na enoni renia na mesiha iaku tangara, kê vi: “Ge gogo na tavoni na maaku surigi na tangiani ma na bungiani. Be ama ni angisira nga na kariaku, suria ga mamasiaga bâraha, ka mamari ma ka hahara ngavê.

¹⁸Matena gê râ i bemu, inê kê bâsigi na gahuata na enoni, ga me igê na hearihatana. Matena gê banu i hinua, inê kê rigira na enoni, ga mesi magêha. Na poropete ma na mane ni vogasiha ka tanugi na anita na tagaraha ma ka tugupu ma renigi.”

¹⁹Araha, igo ko kasi hagetage vari renia Juta? Igo ko kitenira vari na ai ni Sione? Tanu hega ko hagamamasiagagami ngavê? I asa vigami koro aporo. Igami kami naasia na marapeha, ma ngaia ki pe râ me tangagami. Igami kami naasia na komaganiha ma ki râ ma me na mamasiaganiha tangagami.

²⁰Araha, igami kami pe tê viteamu. Igami kami tangahurigami renigi na bagatarihamami ma renigi nikâ na bagatauhata na êvarimami.

²¹Gu hagamonarigi na suruha iamu. Siana ko usitenigami. Siana ko hagamakia i Jerusaleme, i oga igê na Ruma ni Rotu iamu. Siana ko kasia na suruheri iamu henigami.

²²Na harasita na enoni i na agua getigi ngaira ka girara vari, viga katogi na rangi? Ngaia marena na vavearo ki girara vari, vi katogi na rangi raha? Mareha vê! Igo getego ma ko girara, go katogi na tarani ngegana. Tahema igami kami hagêguri togo renigo, vi igo ka na Araha God iamami.