Read Kahua JEREMIA 15 Bible Online

JEREMIA 15 - Kahua bible

JEREMIA 15

¹Na Araha ki tamasi tangê, ki vi: “Henaka o Moise mo Samuele karu râ me, karu nungi rapurapu reniê, hanana vi ve takuira na enoni ngegana, ma inê ki asa be hetaki. Vi tangara vê, ka râ! Inê kê pe pasi bâsira nikâ.

²Manga vi ngaira ma ka hagatego, vi ‘I he ka arâ igê?’ hoi, gu vi tangara, vi inê na Araha kê vi: “Igamu hato kamu page meme. Nga hanami ngekana! Tani kamu page meme renigi na mera. Tani kamu page meme renia na hearihatana. Tani kamu page meme renia na magêha. Tani ka page henahuraugamu. Nga hanami ngekana!

³“Inê na Araha kê bani nakagi na tarani ge he, ga page erasira ngavê: ge page meme igê na hearihatana; na o ka page ngasingasi okeke renigi na gahuata; na manu ka page ngaura, ma na marâ vasiga i bemu ka page ngêngê hagahatungigi.

⁴Inê be hagamagusira ngavê na enoni hato i maveta renira, suria o Manase karena o Hesekia ki vogasira na ataro i Jerusaleme, matena i marungia i Juta.”

⁵Na Araha ki vi: “Ai ni Jerusaleme, ti ki page takuigamu? Ti ki page rugu na obana renigamu? Ti ki page vatugigamu ki bâsigamu?

⁶Igamu kamu usiteniê. Igamu kamu murisigeê. Tahema inê kê nahuigamu ma kê mutegamu, suria i asa be tako herua nikâ renigamu.

⁷Surigi na ara ni hinua igê na apanena iami inê kê hatagamu igê mangagi na momo, i ahegenigi vê na roga. Kariaku, inê kê mutegamu. Inê kê hagamesira na karemi, suria mu pe urisi parongami.

⁸Na gete na nâ igê na apanena iami ka rako teharigi na one i asi. Na mane ni me ka nahuira ka me na mane na gapu haoru i pasimi, ma ka hagamamasiagara kenata. I parama, ma ngaira ka magu ngavê ma ki mu na rokota.

⁹Na gete, ga meme na kare gi pi tenia, ngaia ki bagamame, ma ki manava tanga na parematona. Ngaia ki tê tara renira: ki roto na mauriha iana. Ngaia ki maki ma ki hataera i obana. Na hitangimi, ga tahitahi mêngara, inê be tagarenira tangara na merongami, hanana ga nahuira ka meme. Ngaia kani gê visia, inê na Araha.”

¹⁰I era nga vê tangê! Renia ta kenaku ki aparê me? Na ara ni enoni ka merongasiê. Ngaira ka meêhekorekore ma ka meêhetuguri. Inê kê pe hagaba tanga ta na enoni, me kê pe hagaba tenia nikâ ta na enoni. Ma ku bâ, ngaira hato ka hagatavatavê.

¹¹Araha, i koro ma, na hagatavatavaniha iata ke tarahuê, manga vi inê ma kê pe tagara maninga tangago, se manga vi inê ma kê pe nungigo, hanana vigu tamanira na merongaku, matena ga tarahura na bagabevoani ma na mamasiaganiha.

¹²Ti ki girara i barugia na aiani? Ma na aiani, i râ me tenia i Babilonia, ki gatagata teha ngavê, hanana vige barugia.

¹³Na araha ki hagarongoê, ki vi: “Inê be nakara na merongata na kariaku, ke rugugugi na nahuninga ma na ruruguha iata, hanana gê hagaitangira meni na bagaparongata igê na agua hagenani.

¹⁴Inê be nakara na merongata, ke henahuraura tanga na agua, ga mavosia, hanana ga tagara tangara igê, suria na mangariaganiha iaku ki manga na gi, i tarê tare.”

¹⁵Ma inê kê vi: “Araha, igo ko bani girara. Takusiê ma ku tamaniê. Gu hagaitangira urusiê na ani, ga merongasiê. Siana ko piringiape renira, i era ma ka nahuiê kê meme. Ngaira ka guhariê, suria gê tagara tangago.

¹⁶Inê kê bani taugi rârâ ma na ara ni tamasinga iamu. Ngaigi ki hagakoro obaku, ma inê kê vagevagesigi, suria inê ka na kariamu, Araha God raramohaga hunigo.

¹⁷Inê kê pe hakunira rârâ na enoni, ga mamaro ma ka vagevage. Inê kê oga maramareku surigi na tamasinga iamu, suria gê mangariaga nogaku tangara manga igo.

¹⁸Tanu hega, na mamasiaganiha iaku ki oga borahu? Tanu hega, ka pe mavo na maara iaku? Renia ta ki asa vige mavo? Igo ko obania vari, vigo hagaparuê manga na marave, i page arihu ma ki mamata râ?”

¹⁹Na Araha ki aramiê, ki vi: “Mango go tako vikana, igo ko hatohato teniê. Manga go urisi parongamu, hoi, igo ko voravora re aporo na kariaku. Manga go hato, vigu tamasi purua ma, ma ko tarohenia hete na taroha mora, hoi, igo ko poropete iaku aporo. Na enoni ka page arâ me i pasimu, ma igo ki mareha, vigu bêbêrâ i pasita.

²⁰Inê be katogo, ku manga na para na aiani gatagata pusira na enoni. Ngaira ka page megoheariha, ma ki asa iata, vige teharigo, suria inê kê ngahisigo. Inê be anumasigo, hanana go tahitahi.

²¹Inê be hagatahigo tenia na raramohata na enoni era, ga nahunahu enoni. Ngaia kani gê visia, inê na Araha.”