Read Kahua JEREMIA 16 Bible Online

JEREMIA 16 - Kahua bible

JEREMIA 16

¹Na Araha ki tamasi tangê nikâ, ki vi:

²“Siana ko auragi, suria na marê ikê ki pe koro tanga vigu apara kare so igê.

³Be visia tangago na tarana, i page tarahura na kare, ga vora ikê, ma na kenata.

⁴Ngaira ka page me renigi na mera, ga erataga ngavê. I asa ta na enoni, vige page angi maramara renira, se vige bagira. Na gahuata ka page tâtâ totoko i ano mangagi na ae igê na maniae. Ngaira ka page me renia na hearihatana, se renia na magêha. Na gahuata ka na ngêra iata na manu ma na marâ vasiga i bemu.

⁵Siana ko bêbanu igê na ruma, ga angiangi maramara igê. Siana ko angiangi maramara henira, se vige rugurugu na obamu henira. Inê be tavoa râ na marapeha tenira, ma ki hato ve takuira, se hetaki tangara.

⁶Na enoni raha ma na enoni purua ka page me i na agua ikê. Ma ki asa ta na enoni, vige page goro bêhuri, se vige tapia so marena na apena.

⁷I asa ta na enoni, vige page haganaku parongata na ani, ga mesira na kariata. I asa ta na enoni, vige page haganaku parongata na enoni, naka ma ga mesira na kenata se na vaemata.

⁸“Siana ko bêbanu igê na ruma, ga magoto igê na enoni. Siana ko ngêngê ma ko totono henira.

⁹Gu karingê inê na Araha God rarmohaga huniê iata na Isiraelita. Bâ, inê be hagamagahurugi na ringeni na ki ni vagevageha, ni mâha ma ni hagatakuha. Na enoni i ngekê ka page hagatogâna i voravora me na tarana ngekê.

¹⁰Matena go hagarongora na enoni renigi na tarani ngegê, ngaira ka page hagatego, ka vivi, ‘Tanu hega, God ki hagaitangigami bâraha vikana? Na tarana ta kani gami aharê igê? Igê na tarana ta kani mi haritohea igê na Araha God iamami?’

¹¹Hoi, go aramira, ko vivi, ‘Na Araha ki vi: Na êvarimi ka murisigeê ma ka tari surira na harasita na enoni i na agua getigi. Ngaira ka hagarapera ma ka vogasira. Ngaira ka kasi reniê ma ka pe marupegi na hagesuringa iaku.

¹²Ma igamu kamu era teharira na uvarimi. Bâ, igamu hato kamu togeaga kamu râ suri barisumi maremi. Mu erataga ma kamu haritoheê.

¹³Tahema inê be kasigamu hura tenia na agua ikê tanga na agua, igamu ma na êvarimi kamu mavosia. Ma i ngekana igamu kamu vogasira igê na harasita na enoni getera, na tangiani ma na bungiani, ma inê ki asa hagetage be takuigamu.’”

¹⁴Na Araha ki vi: “Ta na matena i muri me na enoni ki hato, vige page tohe reniê nikâ, inê na God mamauri, gê torera hura na Isiraelita tenia i Esipito.

¹⁵Ngaira ka page tohetohe hete reniê, inê na God mamauri, gê torera hura na Isiraelita tenia i Babilonia ma tenigi na agua hato, gê tokorenira surigi. Inê be torera aporo tanga na apanena iata mareta, gê haganahunira na uvarita renia. Ngaia kani gê visia, inê na Araha.”

¹⁶Na Araha ki vi: “Inê kê unira me na mane hugohugo, ka hugora na enoni ngegana. Ma i hemuri be unira me na mane ni hagavasinga, ke hagavasi tangara igê na ara ni barani ma na hungani ma igê na vaba.

¹⁷Inê kê girarara erasira ngavê na enoni. I asa ta na marâ, vige pinihi teniê. Inê kê giraragi maninga nikâ na bagatarihata.

¹⁸Inê be katora, ke kasi mena bâraha ngavê renigi na bagatarihata ma na bagaparongata, suria ngaira ka erasia na apanena iaku renira na ataro, ga tâ purupuru mangagi na gahuta na enoni. Ngaira ka hagêrasigi na nunuta na harasita suria na agua hagenani.”

¹⁹Araha, igo nga ko anumasiê. Igo nga ko hagaramoniê. Inê kê rukuruku i pasimu igê na mateni na bagabevoani. Na enoni tenigi na agua hagatê i maveta ka page arâ me i pasimu, ka vivi: “Na harasita na êvarimami ngaira ka na marâ ni hagaparunga ma, na marâ purua ma, ga pe hagavoregi rârâ ta na marâ.

²⁰I hega, na enoni ki girara vari, i hagavorea na harasina? Mareha! I bara! Manga vi i manga ngekana ngaia ki na marâ purua ma.”

²¹Na Araha ki vi: “Hoi, i ngekê inê be hagagirarara na enoni, ke hatamia, vi inê kê raramohaga huniê, vi inê geteê ma kê nahunia na ramoha. Ngaira ka page girara, vi inê kani gê Araha.”