Read Kahua JEREMIA 17 Bible Online

JEREMIA 17 - Kahua bible

JEREMIA 17

¹Na Araha ki vi: “Ai ni Juta, na tasi iami ka bani segea igê na aitangihami renia na aiani, ga bani tahea igê renia na girarupu ma igê na rarini na bea ni vogasiha iami.

²Igamu kamu vogasira na ataro. Igamu kamu tagarahigi na bea ni vogasiha tanga ka Asera na ataro ni hagarakoniha henigi na girarana igê na ara ni hunani na apinige, ga arubebe, ma igê na tarahane na hungani,

³ma igê na hungani, ga oga bê vato renigi na bena. Inê be nakara na merongami, ke rugugugi na nahuninga ma na ruruguha iami, hanana gê hagaitangigamu meni na bagaparongami igê na agua hagenani.

⁴Na merongami ka page hanahuraugamu tenia na apanena iami tanga na agua, mu mavosia, hanana mu tagara tangara, suria na mangariganiha iaku ki manga na gi, i tarê tare.”

⁵Na Araha ki vi: “I page era ngavê tanga na enoni, i murisigeê, ma ki raruni togo renia na raramohana na enoni i girara i meme.

⁶Ngaia ki manga na apinige igê na manihê, i ura igê na mako avagavaga, Igê na mako i era ma ki asiga. Mareha na rangi. Mareha na guani.

⁷“I babarisi na enoni, i hagêguri togo reniê inê.

⁸Ngaia ki manga na apinige, i akê hagarangia na ve, ma ki vagavagaraga ki râ igê. Na arito ki asa, vige singia, ma ki maravarava tare na ahani. Naka ma arito ru, ngaia ki ama ni rasirasi nga.

⁹“Ti ki girara na aitangihana na enoni? Ngaia ki girara i hagahagaparu tare. Ngaia ki erataga ngavê. I asa vige koro aporo.

¹⁰Inê na Araha kê girara erasia ngavê na enoni ma na aitangihana. Inê kê uhungigi na takoha iana. Inê kê suria na ara ni enoni surigi na tauhana ma na parongana.”

¹¹Na enoni, i taugi na haga raha igê na tarani ga peoto, ngaia ki manga na manu i putagigi na oruna na ani getea na manu. Matena i karekare mênga, na ruruguha ki magahuru tenia. Matena i gemêa, ngaia ki hagabângenia, vi ngaia ki bonobonoga.

¹²Na Ruma ni Rotu iaka igê na hungana ki manga na tarepuri bâkoro igê. Ngaia ki oga bê vato renigi na ara ni marâ, haganega me tenia na haganegahana.

¹³Araha, igo ki na hagêguringa iata na Isiraelita. Na enoni, ga kasi renigo, ka page maki. Ngaira ka page magahuru mangagi na ata, ga segegi i one, suria ga kasi renigo, Araha, igo na ve banga na mauriha mora.

¹⁴Araha, gu hagakomagê, hanana gê apeapekoro ngavê. Gu hagatahiê, hanana gê asitatara. Inê kê hagarahasigo igo getego ma.

¹⁵Na enoni ka hagateê, ka vi: “I he nga na hinarunga iana na Araha renigami? Hoi, ha ki pe katogi i ngekê!”

¹⁶Araha inê kê pe tugurigo, vigu hagaitangira. Inê kê pe naasira re na bagabevoani. Igo ko bani giraragi na marâ gê visigi.

¹⁷Siana ko hagamagusiê. Inê kê rukuruku i pasimu igê na matena na bagabevoani.

¹⁸Gu hagamakira na ani ga merongasiê, ma siana inê, Araha. Gu hagamagusira ngaira ma siana inê. Ge tarahura hete na bagabevoani. Gu mutera ngavê hete!

¹⁹Na Araha ki vi tangê, ki vi: “Jeremia, gu râ ku ura igê na ara ni maani para i Jerusaleme. Gu haganega igê na maani para, ga hêtana vi Manipara Ninuni, ma ka huhura ma banu igê na maneraha, ga marungia i Juta.

²⁰Go tamasi tangara ngaira hato, ga bêbanu igê na maani para ngegê: tangara na maneraha, tangara na ai ni Juta hato, ma tangara na enoni hato, ga oga i Jerusaleme, hanana ga karingagi na tamasinga iaku.

²¹Go vivi: ‘Na Araha ki tamasi vikê. Manga mu obania na mêriha, siana kamu totora higa igê na Tangiana ni Mamaroha. Siana kamu migibanu ta na marâ igê na maani para i Jerusaleme.

²²Siana kamu migihura ta na marâ tenigi na ruma iami igê na Tangiana ni Mamaroha. Siana kamu tagara igê na Tangiana ni Mamaroha. Ki tuguhigamu, vigamu marupea na Tangiana ni Mamaroha, suria ki apuna, manga hanana gê bani bonasira na uvarimi renia.

²³Ma na uvarimi ka pe tê viteaku ma ka guguruga ma. Ngaira ka togeaga ma. Ngaira ka haritoheê, ma ka usitenigi na hagesuringa iaku.’

²⁴“Inê na Araha kê bonasigamu, hanana mu marupegi na ramata hato iaku. Siana kamu migibanu ta na marâ igê na maani para i Jerusaleme igê na Tangiana ni Mamaroha. Ki tuguhigamu, vigamu marupea na Tangiana ni Mamaroha, suria i apuna. Siana hagetage kamu tagara igê.

²⁵“Manga vikana, na maneraha ma na enoni raha ka page bêbanu igê na maani para i Jerusaleme ma ka page maneraha nogata manga o Tavite. Ngaira henira na ai ni Juta me Jerusaleme ka page tagirira na hosi ma na kati, ma na enoni ka page aharêsia tare Jerusaleme.

²⁶Na enoni tenigi na hinua i Juta, tenigi na hinua hagarangia i Jerusaleme, tenia na apanena iana o Benamino, tenia na bena i Sepela, tenigi na hungani, tenia i Negeve, ngaira hato ka page aretaku me i Jerusaleme tanga ga rotu igê. I Ruma ni Rotu iaku ngaira ka page susu tangê igê, ma ka page vogasiê igê, ma ka page tagarenigi tangê igê na ganiani ma na ngêra, ma ka page sungigi igê na marâ, ga sigini koro, ma ka page tagarenigi na votovoto iata, hanana ga visiê koro re.

²⁷“Ma ki tuguhigamu, vigamu têtê viteaku ma kamu marupea na Tangiana ni Mamaroha, suria i apuna. Siana kamu migibanu ta na marâ igê na maani para i Jerusaleme igê na Tangiana ni Mamaroha. Manga i manga i ngekana, inê be sungigi na maani para i Jerusaleme. Na gi ki page ngaugi na ruma raha iata na maneraha. Ma ki asa ta na enoni, vige page hunuia.”