Read Kahua JEREMIA 18 Bible Online

JEREMIA 18 - Kahua bible

JEREMIA 18

¹Na Araha ki vi tangê, ki vi:

²“Gu râ i ruma iana na mane, i na tagarahigi na pi renigi na mako, ma i ngekana inê page tamasi tangago igê.”

³Ma inê râ i ngekana, ma kê bâsia igê na mane, matena i tagarahigi na pi na hê renigi na mako.

⁴Na ara ni matena manga i tagarahia na pi, ma ki aera, ngaia ki tagarahia nikâ tani, mataro me ki korokoro maninga.

⁵Ma na Araha ki tamasi tangê nikâ, ma ki vi:

⁶“Ai ni Isiraele, i hega, i pe oto tangê vari, vi ve katogamu manga na mane, i tagarahigi na pi renigi na mako? Igamu i na ababani rimaku manga na mako i ababani rimana na mane, i tagarahigi na pi.

⁷I ta na matena inê kê haganunura na enoni i ta na agua, vigê raragera, se vigê hagavotarira, se vigê mutera,

⁸ma ngaira ka urisi parongata. Tahema inê ki asa, be hagamonarigi na haganunuha iaku.

⁹I ta na matena inê kê surua tangara na enoni i ta na agua, vi inê kê haganahunira renia na mako ma kê hagagatagatanira.

¹⁰Ma ngaira ka haganega ka haritoheê ma ka aharê igê na ramata iaku. Tahema inê ki asa, be hagamonarigi na suruha iaku.

¹¹“Hoi, gu hagarongora na ai ni Juta me Jerusaleme, vi inê kê nanê, vigê hagaitangira. Gu vi tangara, ke urisi parongata ma ke kasigi râ na bagatarihata.

¹²Ngaira ka page arami, ka vivi: ‘Mareha vê! Suria i hega? Nakagami so, kami râ surigi na obaniha iamami maremami, naka ma ga era. Igami kami togeaga!’ Tahema inê be vi tangago vikê:

¹³“Go hagatera na enoni i na agua getegi, manga viga bani rongogi na tarani vigana. Na Isiraelita ka katoa na tarana, i era ngavê.

¹⁴Na boteni na barani i Libanone ka pe torari vaha vari i ta na mateni? Na ve anumaga i ngekana ka mamata vari i ta na mateni?

¹⁵Henaka, ma na kariaku ka bani kasi reniê. Ngaira ka susu tangagi na nunuta na ataro. Ngaira ka hagatasia na tara, i tuguhira, viga arâ igê, ma ka pe râ suria hete. Ngaira ka pe râ suria na otona na tara.

¹⁶Ngaira ka erasia ngavê na agua ikê. Na enoni ka kakahuru renia ma ka kitenia. Na enoni, ga riri igê, ka page kakahuru, ka page ngatangata, ka konekone ngavê renia.

¹⁷Inê be tokorenira na kariaku tangara na merongata, manga na roga raha i ahegenigi na momo. Inê be murisigera. I asa be tamanira mateni igê na bagabevoani.”

¹⁸Na enoni ka hetamatamasi so mareta, ka vi: “Nika, ge harikato renia o Jeremia! I asa vige hato tenigia na mane ni vogasiha, hanana viga hagesurigia, se na mane tako mataha, hanana viga hagaotogia, se vi na poropete, hanana viga tarohenia tangagia na tamasinga iana God. Ge torea hete igê na tamasinga! Siana ka têtê viteana!”

¹⁹Vikê inê nunginungi, kê vi: “Araha, gu karingê! Rongogi na tamasinga iata na merongaku reniê.

²⁰I oto vari, viga barua na koroha renia na eraha? Bâ, ngaira ka suta kariê, hanana vigê votavota igê. Igo ko bani girara, gê râ me i pasimu ma kê rohe pusira, hanana vi siana ko hagaitangira igê na mangariaganiha iamu.

²¹Ma i ngekê, Araha, gu nakara na kareta, ke mesi magêha ma ke me renia na hearihatana. Gu nakara na gete iata, ke magari ma ke nâ. Gu nakara na mane, ke me renia na ringa, ma na mane na gapu haoru ke me igê na henahuita.

²²Nakara na mane ni me ke hagagasuganira, ke rurugugi na ruma iata. Nakara vê ke magu ke tari ngerengere. Ngaira ka suta kariê, hanana vigê votavota igê, ma ka tutu kariê, hanana viga tauê.

²³Ma igo, Araha, ko bani giraragi na katoha hato iata, viga nahuiê kê meme. Siana ko bonotenigi na bagatarihata. Gu takusigi tare na tasi iata. Gu hagavotarira i maamu, ma ku hagaitangira igê na mangariaganiha iamu.”