Read Kahua JEREMIA 19 Bible Online

JEREMIA 19 - Kahua bible

JEREMIA 19

¹Na Araha ki vi tangê, ki vi: “Gu râ ku vuria na pi na hê ma ko merarâ tani na meraha i pasita na enoni ma tani na bani mane ni vogasiha.

²Mu huhura igê na maani para, ga hêtana vi ‘Ameameagana na Pi’, ma kamu arâ tanga na Maruguna i Hinome. I ngekana igo ko hagarongora igê renigi na tamasinga, gê kahu vatego renigi.

³Go vi tangara, ko vivi: Igamu na maneraha i Juta ma na enoni i Jerusaleme, mu karinga na tamasinga iaku, inê na Araha God raramohaga huniê iata na Isiraelita. Inê be katogi na bagabevoani, ga erataga ngavê, ke tarahua na agua ikê. Na enoni hato, ga rongogi na tarani ngegana, ngaira ka page gasuga ngavê.

⁴Inê be kato vikana, suria na enoni ka kasi reniê ma ka erasia na agua ikê, suria ga vogasira igê na harasita na enoni getera, na harasi ngaira ma na êvarita ma na maneraha i Juta ka mavosira. Na gaputa na enoni, ga oga suri parongata, ka manasia.

⁵Ma ngaira ka tagarahigi na bea ni vogasiha tanga o Bala na ataro, hanana ga susu igê tanga renira na kareta. Inê kê pe bonasira vikana. Inê kê pe takusia nikâ vikana.

⁶Ma ta na matena ka page urusia na ata ‘Ngêsu’ se ‘Maruguna i Hinome’, ma ka page hêtana vi ‘Maruguna ni Nahu Hunu’.

⁷Ikê nga inê be hagabarasigi na katoha hato iata na ai ni Jerusaleme me Juta. Inê be nakara na merongata ke teharira ma ke nahuira ke me igê na henahuita.

⁸Inê be ruhuruhua ngavê na hinua ikê. Na ara ni enoni, ga riri igê, ka page kakahuru ma ka page konetenia.

⁹Na meronga ka page ura rihuia na hinua, hanana viga mutera na enoni igê. Na merongata ka page hagabarasira banu ngavê. Na enoni igê ka page magê ngavê ma ka page ngaura so mareta, na tamata ma na kareta mareta nikâ.”

¹⁰Ma na Araha ki vi tangê nikâ, ki vi: “Gu kamaria na pi na hê i maata na mane, go merarâ, ma ko hagarongora, vi:

¹¹Inê na Araha raramohaga huniê, kani gê hagagiraragamu, vi inê be kamarira na enoni ngegê henia na hinua iata, manga gê kamaria na pi na hê, ki akamakama ma ki asa, vige hagatotoa aporo. Na enoni ka page bagira na tamata, ga me, i Maruguna ni Nahu Hunu ikê nikâ, suria i mareha tagua râ nikâ tangara.

¹²Inê kê hinaru, vi na hinua ikê henira na enoni igê ki page era manga na Maruguna ni Nahu Hunu.

¹³Na gahuata na enoni ka page manasigi na ruma i Jerusaleme, na ruma iata na maneraha i Juta, ma na ara ni ruma hato, na enoni igê ka susu igê tangagi na higu renigi na marâ, i sigini koro, ma ka karangia na vaini igê manga na vogasiha tangara na harasita na enoni igê na agua getigi.”

¹⁴Ma hemuri inê kê pania na Maruguna, i vi tangê na Araha, kê tamasi poropete igê, ma kê râ tanga na Ruma ni Rotu. Igê na mahera i Ruma ni Rotu inê kê tamasi igê tangara na enoni, kê vi:

¹⁵Na Araha God raramohaga hunia iata na Isiraelita ki vi vikê, “Inê kê page hagamonarigi na ara ni hagaitangiha, gê bani haganunugamu renigi i hinua ikê ma igê na hinua hato hagarangia, suria mu togeaga kamu pe tê viteaku.”