Read Kahua JEREMIA 2 Bible Online

JEREMIA 2 - Kahua bible

JEREMIA 2

¹Na Araha ki tamasi tangê, ki vi:

²“Go arâ i Jerusaleme, ma ko hagarongoa, ko vivi: Na Araha ki vi vikê: Isiraele, inê kê takusigo, go toto suriê bâkoro, matena gê kahu atego moramora, ma ko takuiê bâraha, matena gê êragigo moramora. Igo ko tari suriê, matena garu ri igê na masusu hêga, na agua ga pe hasihasi rârâ igê.

³Isiraele, igo tangê inê geteê ma. Igo ki na nahuninga manimani iaku. Inê kê hagamamasiagara ma kê hagaitangira ngaira hato ga hagamamasiagago. Ngaia kani gê visia, inê na Araha.”

⁴Igamu na raraha iana o Jakobo, mu rongo! Isiraelita, karingagi na tamasinga iana na Araha!

⁵Na Araha ki vi: “Na tarana ta ka tuguriê renia na uvarimi? Renia ta ngaira ka murisigeê? Ngaira ka vogasira na ataro, i asa vige hagavoregi rârâ ta na marâ, ma ngaira mareta nogata ka pe hagavoregi rârâ ta na marâ.

⁶Henaka inê kê hagatahira tenia i Esipito ma kê mera aharêvoro igê na bagamasusu raha, na agua ni manihê ma ni raoni, na agua ki avagavaga ma ki hagamamakuku, ma ngaira ka pe botage reniê. I mareha rârâ ta na enoni, vige bani oga i ngekana se vige banu râ igê.

⁷Inê kê bêngenira banu igê na agua na mako koro, hanana ngaira ka vagevagesigi igê na ngêra mora ma na ani mavê na marâ koro, ga oga igê. Ma ngaira, ma igamu nogami, kamu erasia na apanena iaku. Ngaira ka tê erasia na apanena iaku, haganega me tenia na matena, ga kahu ata moramora igê. Tahema inê kê usitenia.

⁸Na mane ni vogasiha ka pe hagate, ke vivi: ‘I he na Araha?’ Ngaira ka giraragi na ramata iaku ma ka pe aitangisiê inê. Na maneraha i pasita na enoni ka haritoheê. Na poropete ka tamasi urusia o Bala na ataro, ma ka vogasira na ataro, i asa vige hagavoregi rârâ ta na marâ.

⁹“Tahema inê na Araha be ranganigamu, igamu, ma na karemi, ma na kareta na karemi.

¹⁰Mu tage kamu bê so i Saipero ma kamu bâbâ maninga igê. Mu hagatorangenia ta na enoni ki akê i Ketare ma ki bâbâ maninga igê. Igamu ki asa, vigamu page bâsigi igê na tarani manga ngegana.

¹¹I hega, na enoni getera ka girara vari, viga urusira na harasita mareta renira na ani getera, naka ma vi ngaira na harasita ngegana ka na marâ purua ma? Na kariaku, inê na God gê katora, ki rongo raha na atata, ngaira hete kani ga urusiê inê renira na ataro, i asa vige hagavoregi ta na marâ tangara.

¹²Na tarana ngekê ki hagamamaguraga ngavê. Vavearo, gu gisi ma ku angingi gu konekone ma ku gasuga,

¹³suria na kariaku ka katorerua na eraha gi rua. Ngaira ka kasi reniê, inê na ve banga ni mêriha mora, ma ka tahegi ma na apira ni ve, i makuru, ma ki asa vige nonga igê na ve.

¹⁴“Isiraele ki vora re vari na kare aharupa, se na kare rakuraku? Tanu hega na merongana ka gamorahia rârâ?

¹⁵Ngaira ka ngurunguruhia manga na laione. Ngaira ka sungia na agua iana. Na hinua igê ka aruhuruhu ma ka hihiruga.

¹⁶Na me ni Memepisi me Tagapagesi ngaira ka sinoa ngavê na botona.

¹⁷Isiraelita, igamu kamu hagaratemi maremi! Igamu kamu kasi reniê, inê na Araha God iami, matena gê bêngenigamu ma kê hagaotogamu.

¹⁸Igamu kamu arâ i Esipito, hanana vigamu totono na ve i Nile. Tanga na ta? Igamu kamu arâ i Asiria, hanana vigamu totono na ve i Uparatesi. Tanga na ta?

¹⁹Na bagatarihami maremi ka page hagamamasiagagamu, ma suria igamu kamu pe toto suriê inê, tahema na hagaitangiha ki page tarahugamu. Igamu kamu page girara, vi era ngavê, suria mu kasi reniê ma kamu pe toto suriê, inê na Araha God iami. Na tarana ngekê ki page hagamamasiaga apemi. Ngaia kani gê visia, inê na Araha God raramohaga huniê.”

²⁰Na Araha God raramohaga hunia ki vi: “Isiraelita, haganega me tenia i nago kere vê noga, igamu kamu usiteniê, vigê hagaotagamu, ma kamu usi, vigamu tê viteaku, ma kamu pe rahesiê inê. Ma igê na ara ni hungani ma i ruguhani na ara ni apinige maravarava igamu kamu vogasira ma igê na ataro ni hagarakoniha.

²¹Inê kê hasigamu manga na varona koro era na vaini mora. Ma kamu bâ, igamu kamu bâ mara ta? Igamu kamu vora re na varona na vaini vasiga, na ataka mavê na marâ.

²²Naka ma hagehita mu mamanu renia na sopu ramo, i asa hagetage vige magahuru râ na tongo na tasi iami. Inê kê bâsia mênga.

²³Manga i he kamu girara, vigamu vi, vi igamu kamu pe katogamu maremi kamu erataga? Manga i he kamu girara, vigamu hagaiga, vi igamu kamu pe hagarapea o Bala na ataro? Ma na ta kani mu katoa igê na maruguna ea? Igamu kamu bani girara. Mu pe toto suriê. Mu manga na êrâ. Igamu kamu manga na kamelo vasiga, i borogogo, ki hotohoto rârâ.

²⁴Igamu kamu manga na tonki vasiga, i borogogo ki nonono ma ki sigisigini rârâ. Ti ki girara i hagaotoa, matena i manga ngekana? I mataku ma tanga na ani mane vi tarahua. Ngaia ki nanê ma, matena i borogogo.

²⁵Isiraelita, siana ki harahara na êgami, ma siana ki mamata na riomi, suria mu tangakuhira na ataro. Ma igamu kamu vi: ‘Mareha! I bara!’ Igami kami tenira na harasita na enoni getera, ma kami tangakuhira.”

²⁶Na Araha ki vi: “Tangenana ma manga na mane hanago i maki, matena ga tarahua, igamu na ai ni Isiraele kamu page maki vikana, igamu hato, na maneraha iami ma na kariata, na mane ni vogasiha ma na poropete iami.

²⁷Igamu hato kamu page maki, suria igamu kamu visia na apinige, vi ngaia ki na vaemami, ma kamu visia na hê, vi ngaia ki na kenami. Na apinige ma na hê ngairerua ka na harasimi, ma tangê inê, igamu kamu murisigeê, ma kamu pe ahariê. Ma na matena ga tarahugamu na mamasiaganiha, igamu kamu avarasiê, vigê hagatahigamu.

²⁸“I he ngaira nga na harasimi maremi? I he ngaira nga na nunuta na ataro, mu tahegi? I hega, kamu pe avarasira ngaira, matena ga tarahugamu na mamasiaganiha, manga vi ngaira ka girara, viga hagatahigamu? Ai ni Juta, na harasimi ka rako mangagi na hinua iami.

²⁹Renia ta mu hagagege reniê? Renia ta mu haritoheê?

³⁰Inê kê hagaitangigamu hagaborâ ma, suria igamu kamu pe urusi parongami. Igamu kamu usiteniê, vigê hagaotogamu. Igamu kamu metametarira na poropete iami, manga na laione i ngasia na ganiana.

³¹Ai ni Isiraele, mu karingê. I hega, tangagamu inê kê manga vari na manihê? Inê kê manga vari na agua ni mengo ma ni mamakukuha? Hoi, tanu hega mu vi: ‘Igami kami raha maremami. Igami kami mu tenigo?’

³²I hega, na gete taura ki girara vari, vi bonotenia na rêni iana? Na gete êragi haoru ki girara vari, i bonotenia na vurina? Ma na kariaku ka bani bonoteniê arihu me kere vê noga.

³³Igamu kamu girara erasia vê, mu amane ma kamu torarigonora. Igamu kamu erataga ngavê teharira na êrâ.

³⁴Na gahu iami ka gagapuga renigi na gaputa na ani ga matareha ma na ani ga oga suri parongata, mareha vi na gaputa hete na ani ga hanago.

³⁵“Henaka i manga ngekana, ma igamu kamu ama ni vivi ma: ‘Igami kami oga suri parongamami.’ Bâ, inê na Araha be hagaitangigamu, suria igamu kamu hagaiga, vi igamu kamu pe tasi.

³⁶Igamu kamu tanga hepe, suria mu urusiê renira na harasita na enoni getera. Ma igamu kamu page raruni era renia i Esipito, manga i nago renia i Asiria.

³⁷Igamu kamu page murisigea i Esipito, ma kamu page maki, vigamu aporo me. Inê na Araha kê bani kitenira na ani mu raruni togo renira. Ngaira ki asa, vige hagavoregi rârâ ta na marâ tangagamu.”