Read Kahua JEREMIA 20 Bible Online

JEREMIA 20 - Kahua bible

JEREMIA 20

¹O Pasuri na mane ni vogasiha, karena o Imere, ngaia ki rongoê, gê tamasi vikana. Ngaia ki na maneraha iata na mane, ga anumasia na Ruma ni Rotu.

²Ngaia ki ramusiê, ki rakuê, ma ki kasiê i ruma ni hagaitangiha i avorana na maani para tanga na Ruma ni Rotu.

³I na mavoraro na tangiana i muri o Pasuri ki rupasiê, ma kê hura tenia na ruma ni hagaitangiha. Ma inê kê vi tanga, kê vi: “Na Araha ki pe hêtamu vi o Pasuri, ma ki hêtamu hete vi o Hagamamasiaganiha.

⁴Na Araha ngaia marena ki vi: ‘Inê be katogo, ku hagamamasiagago maremu ma na tamamu nikâ. Igo ko page bâsira na merongata, ga page nahuira ka meme i maamu. Inê be naka na maneraha i Babilonia ke marungia i Juta hagenani. Ngaia ki page henahuraura tani, ma ki page nahuira tani ka meme.

⁵Inê be nakara nikâ na merongata, ke rurugugi na ara ni ruruguha ma na nahuninga iata na enoni i hinua ikê, ma na ruruguha iata na maneraha i Juta nikâ. Ma na marâ hato ngegana ngaia ki page henahuraugi tanga i Babilonia.

⁶Ma tangago igo o Pasuri, ka page henahuraugamu nogami tanga i Babilonia, igo ma na ahemata hato iamu. I ngekana igo ko page meme ma ka page bagigo igê henira na tamamu, ga hagahagaparu tare, igo na poropete hagaparu.’”

⁷Araha, igo ko hagaparuê. Igo ko babanga tangê. Igo ko ramo tehariê. Igo ko tehariê. Na enoni hato ka rurusiê ma ka meêhagau tare.

⁸Matena gê tamasi, inê kê tamasi raha. Inê kê ngerengere, kê vivi: “Henahuita! Hagaerasiha! Hagaitangiha!” Araha, suria inê kê tarohenia na taroha iamu, tahema ga rurusiê ma ka ramoniê tare.

⁹Matena gê vi: “Inê be hato tenia na tagaraha, i hagatorê na Araha renia, ma be hato, vi ve tamasi urusia,” na taroha iamu ki manga na anguruna na gi igê na aitangihaku. Inê kê uhungia, vigê naka ngavê, ma ki bara tangê. Tahema inê kê ama ni tarohenia nga.

¹⁰Inê kê rongora na enoni, ga hahanata, ka vi: “O hagamamasiaganiha ikana! Nika, ge rangania! Rangania!” Na tamaku koro ka obania nogata, vigê votavota, suria ga vi: “Igia ka girara, ga hagabeka vari, hanana igia ka teharia ma ke marabarua.”

¹¹Ma igo, Araha, ko ngahisiê. Igo ko raramohaga hunigo. Na ani ga merongasiê ke vota hete. Na makiha ki page nahuira ngavê, suria i asa, vige akê me na katoha iata. Na makiha iata i asa, vige page hato.

¹²Igo, Araha raramohaga hunigo, igo ko uhungira na enoni igê na otoha. Igo ko girara erasigi na aitangihata. Hoi, ve bâsigo, gu hagaitangira na merongaku, suria inê kê hagêgurigo, ko roherohe pusiê.

¹³Kiria na Araha! Hagarahasia na Araha! Ngaia ki hagatahira na enoni matareha tenira na enoni era, ga hagamamasiagara.

¹⁴Gê gahanita ma kani gê vora me! Kenaku ki gahanita ma kani aparê me!

¹⁵Na mane ki gahanita ma kani hagakoro obana vaemaku, ki vi: “Rongoha koro tangago vego! Na kere mane nga! Gu têa na kare mane!”

¹⁶Naka ke mangara na enoni i hinua, na Araha ki pe takuira ma ki mutemutera ngavê hete. Naka ke rongogi na hagagegeha i mavoraro ma na ngerengereha ni hearihatana i manurahi,

¹⁷suria ngaia ki pe bani nahuiê, be me, matena gê oga mênga i obana kenaku, hanana na obana kenaku ke manga na matahuku.

¹⁸Renia ta kê vora me? Tanga vari na bagabevoani? Tanga vari na mamasiaganiha? Ke nahuiê vari na makiha?