Read Kahua JEREMIA 21 Bible Online

JEREMIA 21 - Kahua bible

JEREMIA 21

¹O Setekia, i marungia i Juta, ki hagatorangenirerua me i pasiku o Pasuri, i karena o Malakia, mo Sepania na mane ni vogasiha karena o Masea. Ngairerua karu nungiê, karu vi:

²“Gu vi tanga na Araha, ke tamanigami, suria o Nebukanesa, i marungia i Babilonia, henira na me iana ka taharigami. Vari na Araha ki page katoa ta na mena, hanana i hagatahigami, ma ki katora ka gavagava tenigami.”

³Ma na Araha ki tamasi tangê, ma inê ke tamasi urusia tangarerua na mane, garu tora tamasinga tangê, kê vi: “Muru hagarongoa o Setekia,

⁴vi na Araha God iata na Isiraelita ki vi vikê: Setekia, inê be katoa na maneraha i Babilonia henira na me iana ke teharigamu. Ngaira ka page megamu heariha i metara i hinua. Ma ngaira ka page sugarira na me iamu bê aporo banu i hinua, ma igê na mahera na me iamu ka page rurugi haku igê na tangaruha iata, suria ga tuturiha.

⁵Inê mareku nga be megamu heariha igê na ramoha iaku hagenani. Inê be mangariaga ngavê tangagamu. Inê be mahemaheaga tangagamu, ma be hagaitangigamu ngavê.

⁶Inê be hagamagahurura ngavê na ara ni marâ hato i hinua ikê. Na enoni ma na togoha iata nikâ ka page meme renia na ringa raha.

⁷Na merongami, o Nebukanesa ma na me iana, ka obania, viga mutegamu. Ngaira ka page hagatotongogamu igamu hato, igo, ma na kariamu, ma na enoni ga tahi tenigi na hearihatana, na magêha ma na ringa. Ngaia ki page nahuigamu nga kamu meme. I asa iana, vige page hagahita na hitangimi. Ngaia kani gê visia, inê na Araha.”

⁸Ma hemuri na Araha ki bonasiê, kê tamasi vikê tangara na enoni, kê vi: “Karinga! Inê na Araha kê nakarerua na tarani gi rua tangagamu; na mêriha ma na mera. Mu atea maremi.

⁹Na ani, i goga so i hinua, ngaia ki page meme renia na hearihatana, se renia na magêha, se renia na ringa. Ma na ani i huhura ma ki tagarenia marena tangara na ai ni Babilonia, ga taharia na hinua i ngekê, ngaia ki page tahi. Ngaia ki page garia manavana marena, mareha vi ta na marâ nikâ vari.

¹⁰Inê kê bani takusia, hanana vi inê kê pe hagatahia na hinua ikê ma kê hagaerasia ngavê hete. Na maneraha i Babilonia ki page taua ma ki page hagamakakaria renia na gi. Ngaia kani gê visia, inê na Araha.”

¹¹Igamu na raraha iana o Tavite, mu marungia i Juta, mu karinga na tamasinga iana na Araha tangagamu.

¹²Ngaia ki vi: “Mu girara hanana mu surira na enoni igê na otoha tare i na ara ni mateni. Mu tamanira na ani ga mamasiaga, suria na enoni getera ka hagaparura ma ka hanago tenira. Manga i mareha, igamu kamu katoa na eraha. Na eraha ngekana ki page hagamangariê ngavê, kê manga na anguruna na gi, i asa ta na enoni, vige page hunuia.

¹³Igo, Jerusaleme, ko oga bê vato renigi na maruguni manga na hungana i riki kê tenia na bena. Inê na Araha be mego heariha. Igo ko vi, vi i asa ta na enoni, vige teharigo, se vige hogegi na maani para iamu.

¹⁴Inê be hagaitangigo meni na bagatarihamu. Inê be sungia na ruma raha iamu ma na gi ke ngêa na hinua hagenani. Ngaia kani gê visia, inê na Araha.”