Read Kahua JEREMIA 22 Bible Online

JEREMIA 22 - Kahua bible

JEREMIA 22

¹Na Araha ki vi tangê, kê râ i pasina na maneraha i Juta, na raraha iana o Tavite,

²ma kê tamasi tangara ngaia ma na kariana ma na ai ni Jerusaleme, kê vi: Mu karingagi na tamasinga iana na Araha, i vi:

³“Inê na Araha kê bonasigamu, hanana mu tanugi na tarani, ga koro ma ka oto. Mu hagatahia na enoni, ga hagabekasia, tenira na ani, ga hagamamasiaga. Siana kamu katora bera se hagamamasiagara na mahuara, na kare banogo, se na gete na nâ. Siana kamu nahuira ka meme i hinua apuna ikê i Jerusaleme na enoni, ga oga suri parongata.

⁴Manga igamu, ma kamu arâ maninga surigi na tamasinga iaku, hoi, na raraha iana o Tavite ka page ama ni heheuri nga, ka maneraha. Ma ngaira henira na kariata ma na enoni ka page ama ni bêbanu nga ikê i pasimi igê na kati ma igê na hosi.

⁵Ma ki manga mu pe arâ surigi, ki page aruhuruhu na ruma iami ngekê. Inê kê tohe. Inê nga na Araha kani gê visia.

⁶“Tangê inê, na ruma raha iana na maneraha i Juta ki bâkoro manga i Giliata, se i mangagi na barani i Libanone. Henaka, ma inê be katoa, ke aruhuruhu ma ke hihiruga.

⁷Inê be hagatorangenira na mane, hanana ge erasia ngavê. Ngaira ka page migirâ na akesi iata, ma ka page tapigi erasigi na u na gugura bâkoro, ma ka page sungigi.

⁸“Ma hemuri na mahuara hato, ga riri ikê, ngaira ka page hehagateri so mareta, ka vivi: ‘Tanu hega na Araha ki katoa vikana na hinua raha ikê?’

⁹Ma ngaira ka page aramira so mareta, ka vivi: ‘Suria ngaira ka pe toto suria na suruheri iana God henira, ma ka vogasira ma ka hagarapera ma na ataro.’”

¹⁰Ai ni Juta, siana mu angiangisia na maneraha o Josia. Siana kamu angi maramara, suria i me. Ma kamu angisia bâraha hete o Joahasa o karena, suria ngaia ka page henahuraua. Ngaia ki page arâ su ngavê, ma ki asa vige page rigia nikâ na agua, i vora igê.

¹¹Na Araha ki tamasi renia o Joahasa, i urusia o Josia na vaemana, ki maneraha i Juta, ki vi: “Ngaia ki bani râ tenia ikê. I asa iana, vige page aporo me.

¹²Ngaia ki page meme igê na agua, ga bani henahuraua tanga, ma ki asa vige page rigia nikâ na agua ikê.”

¹³I page era ngavê tangago maneraha Jehoiakimo. Igo ko torea na ruma raha iamu, suria go hagabekasira na enoni. Igo ko ratoratoa ki raha, suria go hahanago tenira na enoni. Igo ko hagatagarahira bâraha na enoni ma ko pe vurira. Igo ko pe vatera na meni na tagaraha iata.

¹⁴I page era ngavê tangago, suria go vi: “Inê be torea na apena na ruma raha tangê inê mareku, ma ka page rakorako na kiboru i rarona, na ani i haha na ruma.” Vikê igo ko nakagi rako na mabaha igê. Igo ko apêa renigi na apinige bâkoro era. Igo ko pupunigi memera.

¹⁵Go takusia vari, vi igo ka na maneraha go koro, suria vi na ruma iamu ki bâkoro teharigi na ruma iata na ani getera? Na vaemamu o Josia na maneraha ngaia ki vagevagesia na ogaha koro iana. Ngaia ki katogi tare na tarani, ga koro ma ka oto. Ngaia ki tavoraha koro tare.

¹⁶Ngaia ki surira igê na otaha na enoni matareha ma na ani i bara tangara. Ngaia ki akê me maninga tare. Na tarana ngekana ki na morana na rotu, ga rahesiê igê, inê na Araha.

¹⁷Ma igo, igo ko takusigo so maremu ma. Igo ko nahuira ka me na enoni, ga oga suri parongata. Igo ko hagamamasiagara bâraha na kariamu, ma ko rurugu tenira na enoni. Ngaia kani visia na Araha.

¹⁸Tahema na Araha ki tamasi renia na maneraha i Juta o Jehoiakimo, karena o Josia, ki vi: “I asa ta na enoni, vige page angisia, i me, se vige vi, ‘E goaku, ge angi maramara,’ I asa ta na enoni vige page angisia, se vige vi, ‘Ge angi maramara renia na araha na maneraha iaka.’

¹⁹Ngaia ka page bagia manga na tonki, i me. Ngaia ka page okea vê i ano ma ka page kasia hura i metara i Jerusaleme.”

²⁰Ai ni Jerusaleme, mu arâ i Libanone ma kamu ngerengere igê. Mu arâ i na apanena i Basani, ma kamu angiangi igê. Mu ngerengere i hungani i Moaba, vi na enoni hato, ga tamanigamu, ka mutemute.

²¹Na Araha ki bani tamasi tangagamu, matena mu gâga mênga igê na ramana, ma igamu kamu pe tê viteana. I ngegana nga na bani tauhami me kere vê noga. I mareha ngavê, vigamu tê viteana na Araha.

²²Na maneraha iami ka page aheahe, manga i ahegenira na roga raha. Ga page henahuaura na enoni, ga tamanigamu. Igamu kamu page maki, suria ga page hagamakigamu renigi na ara ni bagatarihami hato.

²³Mu oga asitatara i ruma, mu toregi renigi na u na gugura tenia Libanone. Ma igamu kamu page gegege ngavê, matena i tarahugamu na mamasiaganiha, na mamasiaganiha i manga na gete, i harate kare.

²⁴Na Araha ki tamasi tanga na maneraha o Jehoiagino karena o Jehoiakimo, na maneraha i Juta, ki vi: “Inê kê tohe reniê mareku, inê na God mamauri. Naka ma igo ko manga na ringi na giraraku igê na kakêku i otoku, inê be tarasigo hura,

²⁵ma be mahatangenigo tangara na merongamu, go magutenira, suria ga bani kato renigo, viga nahuigo. Inê be tagarenigo tangara o Nebukanesa na maneraha i Babilonia ma na mane ni me iana.

²⁶Inê be paigamurua hura igo ma kenamu, i aparago, tanga na agua getea, igo ma kenamu kamuru pe vora igê, ma kamuru page meme vê i ngekana.

²⁷Igamurua kamuru page angisia bâraha i pasimurua, ma ki asa, vigamurua page aporo igê, hanana vigamurua rigia nikâ.”

²⁸Inê kê vi: I hega, na maneraha o Jehoiagino i manga vari na apira, i abota, na enoni ka pe obania ma ka kasia? Tanu hega ga henahuraura ngaia ma na karena tanga na agua, ngaira pe bani mavosia?

²⁹Igamu na ani ni agua ikê, mu karinga nga. Mu karingagi nga na tamasinga iana na Araha.

³⁰Na Araha ki tamasi vikê, ki vi: “Na mane ngekana, ki page manga na mane i pe apara kare, manga na mane i asa ngavê, vige akê me maninga igê na ara ni marâ. Na raraha iana ki asa, vige page urusia, ke marungia i Juta mangara o Tavite ma na raraha iana. Ngaia kani gê visia, inê na Araha.”