Read Kahua JEREMIA 23 Bible Online

JEREMIA 23 - Kahua bible

JEREMIA 23

¹Na avanu ni sipi ki page hagaitangira ngavê na enoni, i kasira ka bâsurira na sipi iana, ma ka erasira ma ka hagatarupera ma.

²Tahema na Araha God iata na Isiraelita ki tamasi renira na maneraha, vige marupera hete na kariana, ma ki mareha. Ngaia ki vi tangara, ki vi: “Igamu kamu pe marupera na kariaku. Igamu kamu tarigenira vê, ma kamu hagatarupera. Bâ, i ngekê inê be hagaitangigamu renigi na bagatarihami.

³Inê be hagahakura na kariaku, na ani ga hita so, tenigi na agua, gê nakara ke totoko surigi, ma be hagapurusira i pasita. Ngaira ka page apara kare ma ka page rakorako.

⁴Inê be kasira na maneraha, ke marupera maninga na kariaku, hanana i hatohato, vige magu, se vige bubununuga, se vige tarupe. Ngaia kani gê visia, inê na Araha.”

⁵Na Araha ki vi: “Ta na matena i muri me inê be atea ta na raraha iana o Tavite, ke maneraha, na ani i oto na parongana. Ngaia ki page tako mataha, ma ki page marungia na agua hagenani igê na koroha ma na otoha.

⁶Matena ngaia ki maneraha, na ai ni Juta ka page asitatara, ma na ai ni Isiraele ka page gâga igê na ramana. Ga page hêtana vi ‘Araha na Tahingaka’.

⁷“Ta na matena i muri me na enoni ki hato, vige page tohe reniê nikâ, inê na God mamauri, gê torera hura na Isiraelita tenia i Esipito.

⁸Ngaira hete ka page tohetohe reniê inê na God mamauri, gê torera hura na Isiraelita tenigi i Babilonia ma na agua getigi, gê tokorenira tange. Vikana ngaira ka page gâga aporo i pasita mareta. Ngaia kani gê visia, inê na Araha.”

⁹I era ngavê na aitangihaku ma ki tata na apeku. Inê kê manga na mane, i ruguhia na tonoha, manga na mane i tono papasi na vaini, suria na Araha God ma na tamasinga iana karu angariê.

¹⁰Na enoni, ga pe toto suria na Araha, ka aharêsia na agua hagenani. Ngaira ka bagaparongata ma, ma ka erataga igê na raramohata. Na agua ki mameaga, ma na pariki na go ka marama, suria na Araha ki hagaitangia.

¹¹Na Araha ki vi: “Na poropete ma na mane ni vogasiha ka pe toto suriê rârâ. Naka ma i Ruma ni Rotu iaku, inê kê tarahua, vi ngaira ka pe botage reniê.

¹²Tahema na tara, ga arâ igê, ka page matari ma ka page rotoroto tenira. Inê be katora, ke tapasu ma ke vota. Inê be hagamamasiagara ngavê. I râ me noga na matena, gê hagaitangira igê. Ngaia kani gê visia, inê na Araha.

¹³“Inê kê bani bâsigi na tasi iata na poropete ni Samaria. Ngaira ka hagata, suria o Bala ki angarira ma ka hagatasira na kariaku.

¹⁴Ma na poropete i Jerusaleme ka era ngavê teharira. Ngaira ka gamoamo ma ka babanga. Ngaira ka hagaramonira na enoni, ka tasitasi. Tahema na enoni ki asa, vige urisi parongata. Tangê inê, ngaira hato ka erataga ngavê mangara na ai ni Sotome me Gomora.

¹⁵Tahema inê na Araha raramohaga huniê kê tamasi renira na poropete i Jerusaleme, kê vi: Inê be hagangêra renigi na rauga ni maheaganiha ma be hagatonomira renia na tonoha ni mera, suria ngaira ka hagaraha na eraha ki râhia na agua hagenani.”

¹⁶Na Araha raramohaga hunia ki vi tangara na ai ni Jerusaleme, ki vi: “Siana kamu têtê ringeta na poropete. I era ma kamu nanasi baguru. Ngaira ka hagaparugamu ma. Ngaira ka tamasigi tangagamu na marâ, ga takusigi kê ma ngaira mareta, mareha vi inê.

¹⁷Ngaira ka vi tangara na ani, ga usitenigi na tamasinga iaku, ka vi: ‘E, na ara ni marâ ka page koro ngavê tangagamu.’ Ma tangara na ani, ga togeaga ka râ suri barisuta mareta, ngaira ka vi tangara, ka vi, ‘E, i asa ngavê, vige tarahugamu na bagabevoani.’”

¹⁸Mareha vê na hitangita na poropete ngegê, vige giraragi na aitangihana na Araha. Mareha vi na hitangita, vige rongogi, se vige aitangisigi, se vige karingagi maninga na tamasinga iana.

¹⁹Na mangariaganiha iana na Araha ki manga na roga raha, manga na maguara ramo, ki page nahuira na enoni, ga erataga.

²⁰Na mangariaganiha iana ki asa, vige page hato, mataro me ka hatohato na ara ni marâ, i bani takusigi. I ta na matena i muri me na kariana ka page aitangisigi maninga na tarani ngegana.

²¹Na Araha ki vi: “Inê kê pe hagatorara na poropete ngegana. Ngaira mareta ma. Inê kê pe hagatorara rârâ renia ta na tamasinga iaku, ma ngaira ka tamasi hagatoreê.

²²Manga vi ngaira ma ke giraragi na aitangihaku, tanu hega, ka pe hagarongora na kariaku renigi na tamasinga iaku, ma ke katora, ke kasigi râ na bagaparongata, ma ke urisi parongata?

²³“Inê nga kê God, ma kê pe hagatê. Inê kê goga hagarangi tare. Inê kê oga i na ara ni agua hato.

²⁴I asa ta na enoni, vige ahi teniê, hanana vi siana be bâsia. Mu pe girara vari, vi inê kê oga i na ara ni agua i vavearo ma i maveta?

²⁵Inê kê bani giraragi na tamasinga iata na poropete ngegana, ga hagaparu ka vi, vi inê kê tamasi i harata ma kê hagamarutera. Ma inê kê pe tamasi rârâ tangara vigana.

²⁶Ngaira ka ama ni hagabekasira nga taraha na kariaku renigi na takoha babanga iata mareta?

²⁷Ngaira ka takusia, vi na maruteha iata ka page katora na kariaku, ka kasikasi reniê mangara na êvarita, ga bani kasi reniê ma ka tari suria o Bala na ataro.

²⁸Na poropete, i marute, ki tuguhia hete, i vivi, ‘Ikê ki na maruteha purua ma.’ Ma na poropete, i rongoa na tamasinga iaku, ki tuguhia, i tarohenia maninga. Na maruteha ki manga na varona ma. Ma na tamasinga iaku ki manga na ganuna.

²⁹Na tamasinga iaku ki manga na gi, se manga na akesi, i paparigi na hê.

³⁰Inê kê merongasira na poropete, ga tarohenigi na tamasinga iata na tamata, ma ka hagatoreê renigi.

³¹Ma nikâ inê kê merongasira na poropete, ga tarohenigi na tamasinga iata mareta, ma ka hagatoreê renigi.

³²Bâ, inê na Araha, inê kê merongasira na poropete, ga tarohenigi na maruteha babanga iata. Ngaira ka tamasigi na maruteha ngegana, ma ka hagatasira na kariaku renigi na hagaparunga iata ma na paroparoha iata. Inê kê pe hagatorangenira. Inê kê pe hagatorara rârâ. Ngaira ki mareha ngavê, vige tamanira rârâ na enoni. Ngaia kani gê visia, inê na Araha.”

³³Na Araha ki vi tangê, ki vi: “Jeremia, manga ta na kariaku, se na poropete, se na mane ni vogasiha, ma ki hagatego, ki vivi, ‘Na Araha ki hagatoragami renia na ta?’, ki tuguhigo, go aramia, ko vivi, ‘Igamu nga ka na toraha iana na Araha, ma ngaia ki page arihatenigamu so.’

³⁴Naka ma vi ta na kariaku, se vi na poropete, se vi na mane ni vogasiha, ma ki vivi, ‘Na Araha ki hagatoragami,’ hoi, inê be hagaitangia ngaia ma na ahemata iana.

³⁵Igamu kamu hehagateri hete, kamu vi, vi inê na Araha kê hagatoragamu, suria, manga ta na enoni, ma ki tamasi vikana, inê be hagamonaria na tamasinga iana tanga.

³⁶Igamu kani mu bani horogi na tamasinga iaku, inê na God mamauri iami, inê na Araha God raramohaga huniê.

³⁷Jeremia, go hagatera na poropete, ko vivi, ‘Na Araha ki aramigamu bâ hega? Na Araha ki vivi mara ta?’

³⁸Manga vi ngaira, ma ka pe têtê viteaku, ma ka vivi, vi inê na Araha kani gê hagatorara, hoi, go vi tangara, ko vivi,

³⁹vi inê be rugunira ma be arihatenira hagatê teniê, ngaira ma na hinua iata, gê bani haganahunira re na êvarita.

⁴⁰Inê be hagamakira ngavê, ki bê ki arâ. Na makiha i asa, vige page hato tenira.”