Read Kahua JEREMIA 24 Bible Online

JEREMIA 24 - Kahua bible

JEREMIA 24

¹O Nebukanesa, na maneraha i Babilonia, ki bani henahuraua tenia i Jerusaleme tanga i Babilonia o Jehoiagino, na maneraha i Juta karena o Jehoiakimo, henira na tamana ma na mane ni tahenga ma na ani ga manisingenigi na tagaraha getigi. Igê na matena ngekana na Araha ki hagamaruteê renirerua na heni na guani na fiki, garu oga i maana na Ruma ni Rotu.

²Tani na heni ki vunu renigi na guani koro na fiki, na ani ga mamata hagenago. Ma tani ki vunu renigi na guani era na fiki, ga pe arari ngavê, vige ngaugi.

³Ma na Araha ki hagateê, ki vi: “Jeremia, na ta ko basia?” Inê kê arami, kê vi: “Na guani na fiki. Na ani ga koro, ka koro teha ngavê. Na ani ga era, ka erataga ngavê ma ka pe arari ngavê, vige ngaugi.”

⁴Ma na Araha ki vi tangê, ki vi:

⁵“Inê na Araha God iata na Isiraelita, kê vi, vi na enoni, ga bani henahuraura tanga i Babilonia, ngaira ka mangagi na guani koro na fiki, ma inê be marupera.

⁶Inê be anumasira ma be torera aporo tanga na agua ikê. Inê be hagêrasira, ma siana be hagavotarira. Inê be hasira, ma siana be pirira.

⁷Inê be katora, ke aitangisiê i mêrihata hagenani, vi inê nga ki na Araha. Manga ngekê ngaira ka page voravora re na kariaku, ma inê be God iata, suria ngaira ka page tari suriê aporo i mêrihata hagenani.

⁸“Tangara o Setekia na maneraha i Juta ma na tamana igê na gavumane iana, inê na Araha be katora mangagi na guani era na fiki, ga pe arari ngavê, vige ngaugi. Ma ki tagenana ma tangara na ai ni Jerusaleme, na ani ga hita so, ma ka oga mêngara i na agua ikê, se ga râ ka oga i Esipito.

⁹Inê be hagaitangira ngavê, hanana na enoni getera hato i maveta ka page magu. Ma igê na ara ni agua, gê tokorenira surigi, na enoni ka page têtê hagaru renira, ma ka page têtê hagatara renira, ka page tamasi erasira ma ka page hêtata vi hagatavaniha.

¹⁰Inê be katogi na hearihatana, na magêha ma na ringa, ke tarahura, mataro me ka mutemute ngavê tenia na agua, gê bani haganahunira ngaira ma na êvarita renia.”