Read Kahua JEREMIA 25 Bible Online

JEREMIA 25 - Kahua bible

JEREMIA 25

¹Igê na heta na harisi iana o Jehoiakimo, karena o Josia, ki maneraha i Juta, na Araha ki tamasi tangê renira na enoni hato i Juta. Igê na harisi ngekana o Nebukanesa ki vora renia na maneraha i Babilonia.

²Inê kê tamasi tangara na enoni hato i Juta me Jerusaleme renia na tamasinga iana na Araha.

³Inê kê vi: “Na Araha ki bani tamasi tangê surigi na harisi tangahuru gi rua matare oru, haganega tenia na matena o Josia, karena o Amone, ki maneraha i Juta surigi na harisi tangahuru matare oru, ki tariha me i ngekê nga. I na ara ni mateni na Araha ki tamasi tangê, inê kê hagarongogamu tare renigi. Ma igamu kamu usi, vigamu karingê.

⁴Igamu kamu usi, vigamu rongo, se karinga, naka ma na Araha ki ama ni hagatorangenira nga na poropete na kariana tangagamu.

⁵Ngaira ka bonasigamu, hanana vigamu urisi parongami ma kamu kasigi râ na bagatauhami, hanana vigamu ama ni gâga nga igê na agua, na Araha ki bani vategamu, igamu ma na êvarimi, kamu nahunia gatagata tare.

⁶Ngaira ka vi tangagamu renia, hanana vi siana kamu rahesira ma kamu hagarapera na ataro, na harasita na enoni getera, ma kamu hagamangaria na Araha renigi na vogasiha tangagi na nununi na marâ, mu tahegi. Manga vigamu têtê viteana na Araha, ngaia ki asa, vige hagaitangigamu.

⁷Ma na Araha marena ki bani vi tangagamu, ki vi: ‘Igamu kamu usi ni tê viteaku. Igamu kamu hagamangariê nga renigi na nunuta na ataro. Tahema na hagaitangiha ki tarahugamu.’

⁸“Tahema na Araha raramohaga hunia ki vi:

⁹‘Bâ, suria igamu kamu usi ni karingê, inê be unira me na kariaku o Nebukanesa na maneraha i Babilonia ma na ara ni enoni hato i ngekana. Inê be unira me, hanana ge meraheariha na ai ni Juta ma na agua hagarangia. Inê be mutera na ai ni Juta ma na ai ni agua hagarangia.

¹⁰Inê be hagaruhuruhugi ngavê na agua. I page era ngavê tangagamu. Ka page makimaki tenigamu. Ngaia kani gê visia, inê na Araha. Inê be hagahatungigi na ki ni vagevageha, na magotoha, na mâha ma na ngêra ni hagatakuha. Na ngêra ma na laiti ka page marehasira.

¹¹Na agua hagenani ki page aruhuruhu, ma ka page makimaki tenia. Na maneraha i Babilonia ki page marungigi na agua hagarangigamu surigi na harisi tangahuru gi pi.

¹²“ ‘I na murina i ngekana inê be hagaitangira na ai ni Babilonia henia na maneraha iata, meni na tasi iata. Inê be hagaerasia ngavê na agua ngekana, ke aruhuruhu tare.

¹³Inê be hagaitangia i Babilonia renigi na na ara ni bagabevoani, gê haganunura na enoni igê na agua getigi renigi, matena gê tamasi i harana o Jeremia. Na ara ni bagabevoani hato ngegê ka bani segegi so igê na buka ikê.

¹⁴Inê be katora na ai ni Babilonia ke kasi meni na bagatauhata. Na maneraha ma na enoni i na agua getigi ka page henahuraura, ke vora na kare rakuraku iata.’”

¹⁵Na Araha God iata na Isiraelita ki vi tangê, ki vi: “Ikê na kâkâ na vaini na mangariganiha iaku. Gu têa ma ku torea tangara na enoni hato, gê hagatorangenigo tangara, ma ko hagatonomira igê.

¹⁶Matena ga totono igê, ngaira ka page tariahehu ma ka page bekabekaga, suria ga magutenia na hearihatana, gê page katoa, ke tarahura.”

¹⁷Vikê inê kê tavoa na kâkâ tenia na rimana na Araha, ma kê torea tangara na enoni hato, i hagatorangeniê tangara, ma kê hagatonomira igê.

¹⁸Na ai ni Jerusaleme ma na enoni hato surigi na hinua i Juta henira na maneraha iata ma na tamata na maneraha ka totono igê. Na agua ma na hinua iata ka aruhuruhu. Ki aera ngavê, ma ka makimaki tenigi. Ma na enoni ka hêtata, vi na hagatavaniha. Ngaira ka hêtata mênga vikana.

¹⁹Ikê ki na atata na enoni i na agua hato getigi, ga tono igê na kâkâ: na maneraha i Esipito henira na tamana ma na gavumane iana:

²⁰ngaira hato na ai ni Esipito henira na mahuara hato i ngekana; na maneraha hato igê na apanena i Usu; na maneraha hato i Pilisitia ga oga i hinua i Asekeloni, i Gasa, i Ekeroni, me Asitote, na apanena i pe aruhuruhu;

²¹na enoni hato i Etome, me Moaba, me Amone;

²²na maneraha hato i Taire me Sitone; na maneraha hato surigi na ara ni tarasini hato;

²³na enoni ni Tatana, ni Tema ma Busu; na enoni hato ga tapuru bê

²⁴na maneraha hato i Arabia; na maneraha hato iata na enoni igê na bagamasusu raha;

²⁵na maneraha hato i Simiri, me Elama me Metia;

²⁶na maneraha i Babilonia ma igê na agua getigi i ngekana, naka ma ga hagarangi se hagatê. Ngaira ka totono tatage igê. Na ara ni enoni hato i maveta ka totono igê. Na maneraha i Babilonia ki totono igê hagemuri.

²⁷Ma hemuri na Araha ki tamasi tangê, ki vi: “Go vi tangara na enoni, vi inê na Araha God raramohaga huniê iata na Isiraelita, inê kê bonasira, hanana viga totono, mataro me ki aripo na maata ma ka mamoaga. Ngaira ka page votavota, ma ki asa, vige page aharaga aporo, suria na hearihatana ki page tarahura.

²⁸Ma ki manga vi ngaira, ma ka usi vige tavoa tenigo na kâka, hanana vige tono igê, go vi tangara, vi inê na Araha raramohaga huniê, kê bani vi, vi tuguhira, viga totono igê, naka ma ga pe obania.

²⁹Inê be hagaitangia i nago na hinua iaku mareku. Ngaira ka takusia vari, vi inê ki asa be hagaitangira? Mareha ve! Inê be hagaitangira nikâ ngaira, suria inê be hagatorangenia na hearihatana tangara na ara ni enoni hato i maveta hagenani. Ngaia kani gê visia, inê na Araha raramohaga huniê.

³⁰“Igo Jeremia, gu tarohenigi nga na ara ni marâ, gê bani visigi tangago. Go vi tangara na enoni ngegana, ko vivi: ‘Na Araha ki page ngerengere raha tenia na vavearo. Na ringena ki page rongo raha tenia i pasina. Ngaia ki page ngirira ki ramonira na kariana. Ngaia ki page ngerengere manga na mane, i pupurigi na guani na vaini. Na enoni hato i maveta ka page rongoa.

³¹Na ringena ki page tagitagi igê na maveta hagenani. Na Araha ki page ranganira na enoni hato i maveta. Ngaia ki page hagatamasira na enoni hato ma ki page surira ka meme na ani ga erataga. Ngaia kani visia na Araha.’”

³²Na Araha raramohaga hunia ki vi, vi na bagabevoana ki page tarahugi tatage na agua. Ngaia ki page manga na roga raha, i arâ me tenigi na ara ni akereni na maveta.

³³Na gahuata na enoni, na Araha ki page nahuira igê na tangiana ngekana, ka page tâtâ totoko i maveta hagenani. I asa ta na enoni, vige angi maramara renira, se vige torera ke bagira. Ngaira ka page tâtâ i na ano mangagi na ae.

³⁴Igamu na maneraha, mu angiangi. Igamu na ani mu bêngenira na kariaku, mu angiangi raha. Mu angiangi maramara, ma kamu hekêsi i ano. I râ me noga na matena, ga page nahuigamu igê, ma ka page harasigamu igê mangara na sipi mane.

³⁵I asa iami, vigamu page tahi tenia.

³⁶Igamu kamu page gegege ma kamu page angiangi raha, suria na Araha ki mutera na kariami.

³⁷Igê na mangariaganiha iana ngaia ki hagaruhuruhua na apanena iami, i hagagara koro.

³⁸Na Araha ki huhura me tenia i pasina manga na laione tenia na tahuna, hanana i hagaerasia ngavê na apanena iata na kariana. Na mangariaganiha raha iana ki hagahihirua.