Read Kahua JEREMIA 26 Bible Online

JEREMIA 26 - Kahua bible

JEREMIA 26

¹I murina ma na matena o Jehoiakimo karena o Josia ki vora re na maneraha i Juta,

²na Araha ki tamasi tangê, ki vi: “Gu ura igê na mahera na Ruma ni Rotu, ma ku tamasi tangara na enoni hato, ga râ me tenigi na hinua hato i Juta tanga na hagarahenga. Gu hagarongora renigi na ara ni marâ hato, gê bani hagatorago renigi, vigo visigi tangara. Siana ko tihia ta na tamasinga.

³Vari ngaira ka page têtê ringeku, ma ka page urisi parongata. Manga viga katokato vikana, inê kê page urisia na katoha iaku, vigê hagaitangira meni na bagatauhata.”

⁴Na Araha ki hagatorê, kê tamasi vikê tangara na enoni, kê vi: “Inê na Araha kê bani vi, vi i tuguhigamu, vigamu têtê viteaku, ma kamu arâ surigi na hagesuringa iaku tangagamu,

⁵ma kamu karingagi maninga na tamasinga iata na kariaku na poropete, gê ama ni hagatorangenira nga tangagamu. Ma igamu ki mareha ngavê, vigamu tê viteata.

⁶Manga igamu, ma kamu ama ni haritohe nga, inê be hagaruhuruhua na Ruma ni Rotu ngekê, manga gê hagaruhuruhua i nago i Silo, ma na enoni hato i maveta ka page hêtana na hinua ikê, vi hagatavatavaniha.”

⁷Na mane ni vogasiha, ma na poropete ma na enoni hato ka rongoê, matena gê tarohenigi na marâ ngegê i Ruma ni Rotu.

⁸Ma pusina ma gê visigi hato na marâ, na Araha ki bonasiê renigi, hanana vigê tarohenigi, ma ngaira ka ranguiê. Ngaira ka hagangere, ka vi: “Vikana, go meme nga!

⁹Tanu hega ko vi, vigo tamasi igê na raramohana na Araha? Tanu hega ko vi, vi na Ruma ni Rotu ikê ki page manga i Silo, ma na hinua ikê ki page aruhuruhu ma hihiruga?” Ma na enoni ka aruruhiê.

¹⁰Matena na maneraha i Juta ka rongoa na tarana ngekê, ngaira ka hata ni hura me tenia na ruma raha iata, ma ka râ tanga na Ruma ni Rotu, ka oga so igê na atohata hagarangia na maani ruma haoru na Ruma ni Rotu.

¹¹Ma hemuri na mane ni vogasiha ma na poropete ka tamasi tangara na maneraha ma na enoni, ka vi: “Ngaia ki araria nga i meme, suria i tamasi erasia na hinua iaka, Ngaia mu bani rongoa maremi.”

¹²Ma inê kê vi tangara, kê vi: “Na Araha kani hagatorangeniê, hanana vigê tarohenigi na ara ni bagabevoani, mu rongoê, gê visigi renia na Ruma ni Rotu ikê, ma renia na hinua raha ikê.

¹³I tuguhigamu, vigamu urisi parongami, ma kamu kasigi râ na bagatauhami, ma kamu têtê viteana hete na Araha God iami. Manga mu katokato vikana, ngaia ki page takotako rugu renigamu, ma ki asa, vige hagaitangigamu, manga i bani visia.

¹⁴Tangê inê, igamu kamu ranguiê. Igamu ma! Mu katoa tangê na tarana, mu girara vi oto se i koro.

¹⁵Ma kamu girara, manga vigamu nahuiê kê meme, igamu ma na enoni hato i hinua ikê kamu page tasi ngavê, suria mu nahuia ki meme na ani, i oga suri parongana, renia ngaia nga na Araha kani hagatorangeniê, hanana vigê haganunugamu vikana.”

¹⁶Ma hemuri na maneraha ma na enoni ka vi tangara na mane ni vogasiha ma na poropete, ka vi: “Na mane ikê ki tamasi tangagia igê na raramohana na God iaka. Ngaia ki pe araria, vige meme.”

¹⁷Ma tani na maneraha ka ura aharaga, ma ka vi tangara na enoni, ga bani haku me, ka vi:

¹⁸“Matena o Hesekia ki marungia i Juta, na poropete o Mika ni Moreseti ki bani tamasi tangara na enoni, ki vi: ‘Na Araha raramohaga hunia ki vi vikê: I Sione ka page hikirua manga na mu. Jerusaleme ki page aruhuruhu. Na hungana, i oga igê na Ruma ni Rotu, ki page vapuga.’

¹⁹Na maneraha o Hesekia ma na enoni i Juta ka pe nahuia ke me o Mika. O Hesekia ki hagahigasia hete na Araha, ma ki uhungia vi hagakoro obana, hanana i tamania. Ma na Araha ki tako herua renigi na bagabevoani, i bani surugi tangara. Manga igia ma ka nahuia ke meme o Jeremia, igia ka hagarateka mareka renigi na bagabevoani, ga page aera ngavê.”

²⁰I oga nikâ ta na poropete. Ngaia ki no Uria, karena o Semaia ni Kiriate Jearimi. Ngaia ki tamasi igê na raramohana na Araha, ma ki ramonira na hinua ikê ma na enoni hato igê, manga o Jeremia.

²¹Matena na maneraha o Jehoiakimo ma na gavumane iana ma na mane ni me iana ka rongo tarohani na marâ, i visigi o Uria, na maneraha ki rapasia, hanana vi nahuia ki meme. Ma o Uria ki rongo. Ngaia ki magu ma ki gava tanga i Esipito.

²²Henaka, ma na maneraha o Jehoiakimo ki hagatorangenia o Elenatana karena o Agabori henira tani na mane tanga i Esipito, hanana viga torea aporo o Uria.

²³Ngaira ka torea aporo tanga na maneraha o Jehoiakimo, i bonasira na kariana, ka rete nguria ma ka kasia na gahuana igê na matahuta na enoni purua.

²⁴Ma suria o Ahikamo karena o Sapane ki rohe pusiê, tahema ka pe mahatangeniê tangara na enoni, ke nahuiê be me.