Read Kahua JEREMIA 27 Bible Online

JEREMIA 27 - Kahua bible

JEREMIA 27

¹I murina ma na matena o Setekia karena o Josia ki vora re na maneraha i Juta, na Araha ki tamasi tangê.

²Ngaia ki vi: “Gu tagarahia na totora henigi na varo na gavona na puruka, ma ko naka hagarabo i riomu.

³Ma hemuri ko kasia na tamasinga tangara na maneraha ni Etome, me Moaba, me Amone, me Taire me Sitone. Na tamasinga ngekê ko vatera renia na urusita, ga oga i Jerusaleme, ga vatugia na maneraha o Setekia, hanana ga hagarongora na maneraha iata.

⁴Go bonasira, ka hagarongora na maneraha iata renia na tamasinga ikê: Inê ka na Araha God raramohaga huniê iata na Isiraelita.

⁵Igê na ramohaku, i raramohaga teha, inê kê hagavorara na maveta, na enoni, ma na ara ni marâ hato, ga oga i maveta. Ma inê kê mahatangenia na maveta tanga na ani ma na enoni, gê obania.

⁶Inê kani gê nakagi na apanena hato iami i rimana na kariaku o Nebukanesa na maneraha i Babilonia, ma na marâ vasiga igê nogata.

⁷Na agua hato ka page oga i ruguhana ngaia, ma o karena, mo karena o karena, mataro me i Babilonia ngaia marena ki votavota, ma ki page oga i ruguhata na agua ma na maneraha igê, ga ramo teharia.

⁸“Manga vi ta na agua, se vi ta na maneraha igê, ma ki usi vige oga i ruguhana na maneraha i Babilonia, i manga na totora, inê be hagaitangira na enoni ngegana renigi na hearihatana, na magêha ma na ringa, mataro me o Nebukanesa ki mutera ngavê.

⁹Siana kamu tongesurira na poropete iami, se ta na enoni i vi, vi ngaia ki girara i hinarugi na mateni i muri me renigi na maruteha, se na matuha, se na marumaruha. Ngaira hato ka vi tangagamu, siana kamu gâga i ruguhana na maneraha i Babilonia.

¹⁰Ngaira ka hagabekasigamu ma, ma ka hagaratemi ka henahuraugamu hagatê tenia i pasimi. Inê be paigamu hura, ma igamu kamu page mutemute.

¹¹Manga vi na enoni igê ta na agua, ma ka gâga i ruguhana na maneraha i Babilonia, i manga na totora, ma ka têtê viteana, inê be nakara ma ke oga i pasita, hanana ge tagarahigi na mu igê na mako iata mareta. Ngaia kani gê visia, inê na Araha.”

¹²Na tarani ngegê inê kê hagarongoa nikâ o Setekia na maneraha i Juta renigi, kê vi: “Gu oga i ruguhana na maneraha i Babilonia, na totora iamu. Gu tê viteana, ma ko tagara tangara na kariana, hanana go page mauri.

¹³I era ma, igo ma na kariamu kamu me renigi na hearihatana ma na magêha, se na ringa. I ngekana ka na hinarunga iana na Araha tangara na enoni hato, ga usi vige oga i ruguhana na maneraha i Babilonia.

¹⁴Siana ko têtê ringeta na poropete, ga vi tangago, vi siana ko gâga i ruguhana. Ngaira ka hagabekasigo ma.

¹⁵Na Araha ngaia marena ki bani vi, vi ngaia ki pe hagatorangenira. Ngaira ka hagaparugo ma, matena ga vi, vi na Araha ki tamasi i harata. Tahema ngaia ki page paigamu hura, ma igamu, igo ma na poropete ga hagabekasigo, kamu page mutemute.”

¹⁶Ma hemuri inê kê vi tangara na mane ni vogasiha ma na enoni, vi na Araha ki vi: “Siana kamu tongesurira na poropete, ga vi, vi na ruruguha na Ruma ni Rotu ki sugia ma, vige aporo me tenia i Babilonia. Ngaira ka hagabekasigamu ma.

¹⁷Siana kamu tongesurira. Mu gâga hete i ruguhana na maneraha i Babilonia, hanana mu page mauri. I era ma, na hinua ikê ki aruhuruhu.

¹⁸Manga vi ngaira ka na poropete monari ma ka tamasi igê na raramohaku, hoi, nakara ke avarasiê, inê na Araha raramohaga huniê, hanana na ruruguha, ga oga mênga i Jerusaleme i Ruma ni Rotu ma i ruma iana na maneraha, siana ka toregi râ nikâ i Babilonia.”

¹⁹Matena na maneraha o Nebukanesa ki henahuraua tanga i Babilonia o Jehoiagino na maneraha i Juta, karena o Jehoiakimo, henira na enoni raha getera i Juta me Jerusaleme, ngaia ki panigi so na u, na apira raha na kapa, na kati ni ve, ma tani na kâkâ, na pi, ma na marâ vigana tanga na hagarahenga.

²¹“Mu rongogi na marâ ngegana, ga hita so i Ruma ni Rotu ma igê na ruma raha iana na maneraha. Inê kê vi vikê:

²²Ga page toregi râ tanga i Babilonia, ma ka page gâga i ngekana, mataro me na matena, gê takusigi aporo igê. Igê na matena ngegana inê be toregi aporo me ikê. Ngaia kani gê visia, inê na Araha.”