Read Kahua JEREMIA 28 Bible Online

JEREMIA 28 - Kahua bible

JEREMIA 28

¹I na matena ngekana, igê na rimata na hageha igê na heta na harisi iana o Hesekia i maneraha surigi, na poropete o Hanania ni Gibeone, karena o Asure, ngaia ki tamasi tangê i Ruma ni Rotu. I maata na mane ni vogasiha ma na enoni ngaia ki vi tangê, ki vi,

²vi na Araha God raramohaga hunia iata na Isiraelita ki vi vike: “Inê kê bani hatungia na raramohana na maneraha i Babilonia.

³I rarona na harisi gi rua inê be toregi aporo me na ara ni ruruguha ni Ruma ni Rotu, na maneraha o Nebukanesa ki bani toregi tanga i Babilonia.

⁴Inê be torea aporo me nikâ o Jehoiagino na maneraha i Juta, karena o Jehoiakimo, henira na enoni hato ni Juta, ga bani henahuraura tanga i Babilonia. Monari, inê be hatungia na raramohana na maneraha ni Babilonia. Ngaia kani gê visia, inê na Araha.”

⁵Ma inê, i maata na mane ni vogasiha ma na enoni hato, ga ura i Ruma ni Rotu, inê kê aramia o Hanania, kê vi:

⁶“Koro era, manga na Araha ma ki katokato vikana! Inê kê obania nga, vi ngaia ke hagamonaria na tamasinga iamu, ma ke torera aporo me tenia i Babilonia na ruruguha hato ni Ruma ni Rotu ma na enoni, ga bani henahuraura.

⁷Hoi, igo ma igamu hato na enoni, mu karingê maninga.

⁸Na poropete, ga hagenago tarakerua inê ma igo, ngaira ka hinarugi na hearihatana, na magêha ma na ringa, hanana viga page tarahura rako na agua henira na maneraha, ga raramohaga.

⁹Ma na poropete, i hinarua na ramana, ngaia ki na poropete monari, matena i vagavaga me mave na hinarunga iana. Ma i ngekana ka kahu tahetara renia, vi na Araha kani hagatorangenia.”

¹⁰Ma hemuri o Hanania ki ragea râ na totora tenia na rioku ma ki barugia.

¹¹Ma ngaia ki tamasi i maata na enoni hato, ki vi: “Na Araha ki bani vi, vi ngaia ki page barugia vikana na totora, na maneraha o Nebukanesa ki bani naka i riota na ara ni enoni hato i maveta, ma ngaia ki page katoa vikana i raroni na harisi gi rua.” Hoi, ma inê kê râ.

¹²I murina ma ngekana na Araha ki vi tangê,

¹³hanana vigê arâ ma kê vi tanga o Hanania, kê vivi: “Na Araha ki vi, vi igo ko girara go barugia na totora na apinige, ma ngaia ki page urusia aporo hete renia na ani na aiani.

¹⁴Na Araha God raramohaga hunia iata na Isiraelita ki bani vi, vi ngaia ki page naka na totora na aiani i riota na ara ni enoni igê na agua hato ngegana, ma ngaira ka page oga i ruguhana o Nebukanesa na maneraha ni Babilonia. Na Araha ki bani vi nikâ, vi naka ma na marâ vasiga, ngaira nogata ka page gâga ruguhana o Nebukanesa.”

¹⁵Hoi, na tarana ngekê inê kê hagarongoa o Hanania renia, ma kê naka banu me, kê vi: “Hanania, gu rongo! Na Araha ki pe hagatorangenigo, ma igo ko hagabekasira ma na enoni ngegê.

¹⁶Tahema na Araha ngaia marena ki vi vi ngaia ki page hagamagahurugo. I nago tarana i hatohato na harisi i ngekê, igo ko page meme, suria go tora paririra na enoni tenia na Araha.”

¹⁷Ma o Hanania ki me igê na pita na hageha igê na harisi ngekana.