Read Kahua JEREMIA 29 Bible Online

JEREMIA 29 - Kahua bible

JEREMIA 29

¹Inê kê segea na leta tangara na mane ni vogasiha, na poropete, na enoni raha i pasita na enoni, ma tangara hato na ani getera, o Nebukanesa ki bani henahuraura tenia i Jerusaleme tanga i Babilonia.

²Inê kê segea na leta ngekê, i murina ga bani henahuraura na maneraha o Jehoiagino, ma na kenana, ma na kariana, ma na enoni raha i Juta me Jerusaleme, ma na mane ni tahenga, ma na ani ga maninsingenigi na tagaraha getegi.

³Inê kê tagarenia na leta tangarerua o Elasa, karena o Sepana, mo Gamaria, karena o Hilikia, suria o Setekia na maneraha i Juta ki hagatorangenirerua tanga o Nebukanesa na maneraha i Babilonia.

⁴Inê kê sege, kê vi: “Na Araha God raramohaga hunia iata na Isiraelita ki tamasi tangara na enoni hato, o Nebukanesa ki henahuraura tenia i Jerusaleme tanga i Babilonia, suria na Araha ki hagamarumungenia, ki kato vikana.

⁵Ngaia ki vi: ‘Mu tagarahigi na ruma ma kamu gâga tonge. Mu tagarahigi na mu ma kamu ngêngê igê.

⁶Mu auragi ma kamu apara kare. Ma hemuri kamu hagauragingenira na karemi, hanana ga apara kare nogata. Mu tataka, ma siana kamu pe tataka.

⁷Mu tagara tanga na ramana tangagi na hinua, ga henahuraugamu tange suria na katoha iaku. Mu avarasiê, hanana gê tamanira na enoni i ngegana, suria manga vi ngaira ma ka gâga igê na ramana, igamu nogami kamu page manga ngekana nikâ.

⁸Inê, na Araha God iata na Isiraelita, inê kê vi tangagamu, siana kamu nakara ka hagaparugamu na poropete i berarogami, se vi na enoni getera, ga vi, vi ngaira ka girara ga hinarugi na mateni i muri me. Siana kamu tongesurigi na maruteha iata.

⁹Ngaira ka hagaparugamu, naka ma ngaira ka vi, viga tamasi igê na raramohaku. Inê kê pe hagatorangenira rârâ. Ngaia kani gê visia, inê na Araha God raramohaga huniê.’

¹⁰“Na Araha ki vi: ‘Matena ga hatohato igê na tangahuri harisi gi pi, i raramohaga surigi i Babilonia, inê be botage renigamu, ma be hagamonaria na suruha iaku tangagamu, hanana ve toregamu me aporo tanga i pasimi.

¹¹Inê geteê ma kê giraragi na katoha iaku tangagamu. Inê be katogamu, kamu oga igê na ramana, ma siana vi igê na bagabevoani. Na bevoana i muri me ki page koro ngavê tangagamu, manga vigamu gunahia ngavê.

¹²I na matena ngekana inê kê page aganarigamu igê na ara ni mateni, mu avarasiê igê ma kamu nungiê igê.

¹³Igamu kamu page gariê, ma kamu page tarahuê, suria mu gariê i mêrihami hagenani.

¹⁴Monari, inê kê vi, vi igamu kamu page tarahuê, ma inê be toregamu aporo tanga i pasimi. Inê be hagahakugamu me tenigi na ara ni hinua ma na ara ni agua hato, gê tokorenigamu tange. Inê be toregamu aporo tanga na apanena iami, gê paigamu hura tenia. Ngaia kani gê visia, inê na Araha.’

¹⁵“Igamu kamu vi, vi na Araha ki hagatorangenira na poropete tangagamu, mu oga i Babilonia.

¹⁶Mu karingagi na tamasinga iana na Araha renia na maneraha, i marungia na agua, o Tavite ki bani marungia i nago, ma renira na enoni i hinua ikê, na goami, ga pe henahuraura henigamu.

¹⁷Na Araha raramohaga hunia ki vi vikê: ‘Inê be rapasigi na hearihatana, na magêha ma na ringa tangara, ma be katora, ke mangagi na guani na apinige na fiki, ga kakaga ngavê ma ki pe araria, vige ngaugi.

¹⁸Inê be ama ni rapasigi nga na hearihatana, na magêha ma na ringa tangara, ma na enoni hato i maveta ka page kakahuru renira. I na ara ni agua, gê tokorenira surigi, na enoni ka page makimaki tenira, ma ka page kakahuru renira. Na enoni ka page rurusira ma ka page hêtata vi hagatavaniha.

¹⁹Na tarana ngegana ka page tarahura, suria ngaira ka haritohegi na tamasinga iaku tangara, gê hagatorangenira na kariaku na poropete renigi. Ngaira ka usi, vige karingê.

²⁰Igamu hato, na ani ga bani henahuraugamu tanga i Babilonia, mu karingagi na tamasinga iaku, inê na Araha.

²¹“Na Araha God raramohaga hunia iata na Isiraelita ki bani tamasi renirerua o Agaba, karena o Kolaia, mo Setekia, karena o Maseia. Ngairerua karu vi, vi garu tamasi igê na raramohana, ma hete garu hagaparugamu ma. Ngaia ki bani vi, vi ngaia ki page tagarenirerua tanga o Nebukanesa na maneraha i Babilonia, hanana viga nahuirerua karu meme i maami.

²²Manga na enoni, ga bani henahuraura tenia i Jerusaleme tanga i Babilonia, ma ka obania, viga hagatava ta na enoni, ngaira ka page vivi, ‘Na Araha ke katogo mangarerua o Setekia mo Agaba, na maneraha i Babilonia ki hanunu mamêrigaterua!’

²³Na tarana ngekana ki page tarahurerua renigi na bagaparongaterua. Ngairerua karu gamogamo, ma karu vi, vi ngairerua ka na poropete monari, ma hete garu hagaparu ma. Ma ngairerua mareterua ma hete kani garu kato vikana, mareha vi ngaia na Araha. Ma na Araha ki bani giraragi na bagatarihaterua, ma ki ranganirerua. Ngaia kani visia na Araha.”

²⁴Na Araha God raramohaga hunia iata na Isiraelita ki bonasiê, kê ramonia o Semaia ni Nehelama, suria ngaia marena so ma kani segea na leta tangara na enoni hato i Jerusaleme, ma tanga o Sepania na mane ni vogasiha, karena o Maseia, ma tangara na mane ni vogasiha hato getera. Igê na leta ngekana o Semaia ki sege tanga o Sepania, ki vi:

²⁶“Na Araha ki kasigo, ko mane ni vogasiha urusia o Jehoiata, ma i ngekê igo ko vora renia na maneraha, go bâsuria na Ruma ni Rotu. Ki tuguhigo, vigo rakua na ani mavê na mane, i bekabekaga ma ki vi, vi ngaia ka na poropete, ma ko baroa i riona renia na seni.

²⁷Renia ta ko pe rakua hete o Jeremia ni Anatote, i tamasi poropete tangara na enoni?

²⁸Gu vi pusia, suria ngaia ki vi tangara na enoni, ga bani henahuraura tanga i Babilonia, vi ngaira ka page oga arihu i ngekana, ma ki tuguhira, viga tagarahigi na ruma ma ka gâga tonge, ka tagarahigi igê na mu ma ka ngêngê igê.”

²⁹I murina o Sepania ki bani tomania na leta tangê,

³⁰na Araha ki bonasiê, ki vi:

³¹“Go kasia na tamasinga renia o Semaia ikê tangara na enoni hato, ga bani henahuraura tanga i Babilonia, ko vivi: Inê na Araha be hagaitangira o Semaia ma na raraha hato iana. Ngaia ki tamasi poropete tangagamu, ma inê kê pe hagatorengenia râra. Ngaia ki hagabekasigamu ma.

³²Na raraha iana ka page mutemute i berarogami. Ngaia ki asa, vige tahi togâni, ma ki asa, vige vagevagesigi na marâ koro, gê page katogi tangara na kariaku, suria ngaia ki tora paririra teniê. Ngaia kani gê visia, inê na Araha.”