Read Kahua JEREMIA 3 Bible Online

JEREMIA 3 - Kahua bible

JEREMIA 3

¹Na Araha ki vi: “Manga na mane ma ki kasia kaniana, ma ngaia na gete ki arâ pania ma ki auragia na mane getea, ki hega, ngaia na mane ki girara vari, i torea aporo nikâ ka ani akana? Na tarana ngekê ki erasia navê na agua. I hega, i Isiraele ki tagenana ma manga ngekana nikâ? Igo, Isiraele, ko vagogo surira rako na mane. Gu vi vari, vigo kahu aporo me tangê?

²“Gu bâsigi na tarahane na hungani. I hega, igo ko pe gamogamo rârâ vari igê ta na agua i ngegana? Igo ko paronga manga na êrâ, suria igo ko ahehi hekarigi i tara karira na mane mangara na me ni Arabia, ga gamorahira na enoni igê na masusu. Igo ko erasia ngavê na agua, suria go gamogamo.

³Tahema ki pe rangi rârâ, ma ki mareha nikâ na sivo ni hagahisi. Igo ko maratorana ngavê na êrâ. Gu pe girara vigu maki!

⁴“Manga i he ko girara, vigo visiê, ko vivi, ‘Igo ki na vaemaku. Igo ko takuiê, haganega me tenia na matena gê sisite.

⁵I asa, vigu ama ni mangariaga nga tare. I asa vigu oba era tare.’ Hoi, Isiraele, na tamasinga iamu maremu ma ngekana. Ma igo ko ama ni katogi nga na eraha!”

⁶Matena o Josia ki maneraha, na Araha ki vi tangê, ki vi: “Go pe bâsia vari na tauhana i Isiraele. Ngaia ki na gete i pe toto hesuri. Ngaia ki paniê. Ngaia ki râ ki paronga manga na êrâ igê na ara ni hungana ma i ruguhani na ara ni apinige maravarava.

⁷Inê kê vi ma, vi ngaia ki aporo me tangê, i murina i katokato vikana. Ma ki mareha. Ma Juta ki bâsigi na tarani hato ngegana. Juta ki manga vi ka goana, ma ki pe toto hesuri nogana.

⁸Juta ki girara nogana, vi inê kê kasia Isiraele ma kê tarigenia hura, suria ngaia ki pe toto suriê ma ki gamogamo. Ma Juta ki amaka suria ka goana Isiraele, i pe toto hesuri. Ngaia nogana ki haganega ki gamogamo,

⁹ma ki mareha ngavê vige maki. Ngaia ki erasia ngavê na agua. Ngaia ki pe toto suriê, suria i vogasigi na hê ma na apinige. Na tamana ma vi ngaia ki gamogamo.

¹⁰Hato vigana, Juta, ka goana Isiraele i pe toto hesuri, ngaia ki vi, vi obania vi aporo me tangê. Ma hete i hagaparu ma. Ngaia kani gê visia, inê na Araha.”

¹¹Ma hemuri na Araha ki tamasi tangê, ki vi: “Isiraele ki kasi reniê, ma Juta ki pe toto suriê, ma Isiraele ki pe era ngavê manga i Juta.

¹²Vikê gu râ ma ko tamasi tanga i Isiraele, ko vivi: Na Araha ki tamasi vikê: Isiraele, go pe toto suriê, gu aporo me tangê. Inê kê pe obania na siva. Inê be koro tangago hete. I asa iaku ve mangariaga. I asa be ama ni oba era nga tangago.

¹³I tuguhigo ma, vigu tangahurigo, vi igo ko tasi ma ko aritoheê, inê na Araha God iamu. Gu tangahurigo, vi igo ko paronga manga na êrâ, suria go vogasira na harasita na enoni getera, ma ko aharêngigi na ramata iaku. Ngaia kani gê visia, inê na Araha.

¹⁴“Kariaku, mu pe toto suriê, mu aporo me. Igamu ka na aniku. Inê be tavora tani na hitangimi surigi na ara ni hinua ma tani tenigi na ara ni varo ninuni, ma be torera aporo tanga na hungana i Sione.

¹⁵Inê be nakara na maneraha tangagamu, na mane ga têtê viteaku. Ma ngaira ka page marungigamu igê na takoha mataha ma na giraraha.

¹⁶Matena mu rakorako igê na agua, na enoni ki hato, vige page tamasia nikâ na Bokesi na Suruheri. Ngaira ki hato, vige botage nikâ renia. Ngaira ka page tako mu vê renia. Ma ki asa vige tagarahia aporo na urusina, suria ngaira ka vi, vi ngaira ka pe obania.

¹⁷I na matena ngekana ka page hêtana Jerusaleme vi ‘Atohana na Araha,’ ma na enoni hato i maveta ka page hakuhaku me igê, hanana ga rahesia. Ngaira ki hato hagetage, vige page togeaga nikâ, ke râ suri barisuta mareta ma na teniha era iata.

¹⁸Isiraele, ki page hakunia i Juta, ma ngairerua karu page pania na agua, ga bani henahuraurerua tanga, ma karu page aporo tanga na agua, gê bani haganahunira na uvarimi renia, hanana viga gâga igê tare.”

¹⁹Na Araha ki vi: “Isiraele, inê kê obania, vigê taugo manga vi igo ka na kareku ma kê haganahunigo renia na agua, i bâkoro era, teharigi na ara ni agua hato i maveta. Inê kê obanigo, vigo visiê, vi inê ki na vaemamu, ma ko hatohato, vigu kasi reniê nikâ.

²⁰Ma igo ko manga na gete êragi, i pe toto hesuri. Igo ko pe toto suriê. Ngaia kani gê visia, inê na Araha.”

²¹Na enangita igê na tarahane na hungani. Na Isiraelita ka angiangi ma ka avaravara, suria ga bagaparongata ma ka pe botage renia na Araha God iata.

²²Mu aporo tanga na Araha, igamu hato na ani mu pe toto suria. Ngaia ki page hagakorogamu aporo, ma ki page katogamu, kamu tototo suria aporo. Igamu kamu vi: “Ua, igami kami aporo me tanga na Araha, suria ngaia ki na God iaka.

²³Igami kami vogasira na ataro igê na hungani, ma ki asa iata, vige tamanigami. Na rahesiana ngekana ka na tonoha ma na gamogamoha ma. Na hetamaniha tanga i Isiraele ki râ me hete tenia na Araha God iaka.

²⁴Igami kami vogasia o Bala na ataro renira na totoha ni sipi ma ni puruka, renira na karemami, mane ma hehene, renigi na ara ni nahuninga, na êvarimami ka tagara bâraha renigi haganega me tenia i kere vê noga. Na tarani ngegana ka hagamakigami.

²⁵I ararigami, vigami maki ngavê. Ke nahuigami na makiha! Igami ma na uvarimami igami kami haritohea tare na Araha God iaka. I mareha ngavê, vigami tê viteana.”