Read Kahua JEREMIA 30 Bible Online

JEREMIA 30 - Kahua bible

JEREMIA 30

¹Na Araha God iata na Isiraelita ki tamasi tangê,

²ki vi: “Gu segegi so igê na buka na ara ni tamasinga iaku tangago,

³suria inê kê suru, vigê hagakoroa aporo na ogaha iata na kariaku, na ai ni Juta me Isiraele. Inê be torera aporo tanga na agua, gê bani haganahunira na uvarita renia, ma ngaira ka page nahunia aporo nogata. Ngaia kani gê visia, inê na Araha.”

⁴Na Araha ki tamasi tangara na ai ni Isiraele me Juta, ki vi:

⁵“Inê kê rongora na enoni, ga bagangengere. Ngaira ka magu ma ka heasiasi. Ngaira ka pe ape haritagi.

⁶Muni! Mu takotako! I hega, na mane ki girara vari, i harate kare? Tanu hega, gê bâsira na mane hato, ka hirisigi na obata manga na gete i harate kare? Ngaira hato ka rahari ma ki mahui na apeta.

⁷Na matena ki page erataga ngavê. I mareha vi na ta ke maratorana. Na matena na bagabevoani tangara na kariaku. Ma ngaira ka page tahitahi.”

⁸Na Araha raramohaga hunia ki vi: “Igê na matena ngekana inê be barugia na totora i riota na kariaku, ma be musigi na seni tenira, ma ngaira ki hato, vige vora re nikâ na kare rakuraku iata na ai mahuara.

⁹Ma ngaira ka page tagara tangê hete, inê na Araha God iata, ma ka page tari suria ta na raraha iana o Tavite, gê page kasia ki maneraha.”

¹⁰Na Araha ki vi: “Kariaku, siana kamu magu. Ai ni Isiraele, siana kamu bubununuga. Inê be hagatahigamu tenia na agua hagatê ngekana, tenia na agua, gê bani henahuraugamu tanga. Igamu kamu page aporo i pasimi, ma kamu page oga igê na marapeha. Igamu kamu page asitatara, ma ki asa ta na enoni, vige page hagamagusigamu.

¹¹Inê na Araha be ngahisigamu ma be hagatahigamu. Inê be hagaerasira ngavê na enoni igê na agua, gê bani tokorenigamu surigi. Ma ki asa be hagaerasigamu igamu. Inê be hagaitangigamu, ma na hagaitangiha iaku ki page hagaotogamu. Ngaia kani gê visia, inê na Araha.”

¹²Na Araha ki tamasi tangara na kariana, ki vi: “Na maara iami ki asa vige page mavo. Na mamasiganiha iami ki asa, vige page manguaga.

¹³Mareha ta na enoni, vige marupegamu. Mareha na meresini tangagi na garumi. I asa iami, vigamu komaga aporo.

¹⁴Na tamami hato ka bani tako mu renigamu. Ngaira ka pe botage renigamu. Inê kê bani taharigamu, manga vi inê ka na merongami. Inê kê bani hagaitangigamu bâraha ngavê, suria na tasi iami ka rako, ma na bagaparongami ki aharêsigamu ngavê.

¹⁵Siana kamu hagagege renigi na haraniha iami. I asa vige manguaga. Inê kê hagaitangigamu vikana, suria na tasi iami ka rako ma na bagaparongami ki aharêsigamu ngavê.

¹⁶Ma i ngekê ngaira hato, ga mutegamu, ka page mutemute ngaira hete, ma ka page henahuraura na merongami hato. Ngaira hato, ga hagamamasiagagamu, ka page mamasiaga ngaira hete. Ngaira hato, ga hanago tenigamu, ka page hanago tenira ngaira hete.

¹⁷Inê be hagakomagagamu. Inê be hagamavogi na maara iami, naka ma na merongami ka vi, ‘I Sione ka bani kasi renia. Mareha ta na enoni, vige botage renia.’ Ngaia kani gê visia, inê na Araha.”

¹⁸Na Araha ki vi: “Inê be botage renira na kariaku ma be torera aporo tanga i pasita. Ngaira ka page tagarahia aporo Jerusaleme ma ka page hagêrasia aporo igê na ruma iana na maneraha.

¹⁹Ma i ngekana na enoni ka page kiki aporo, ma ka page visiê raha. Ngaira ka page ngerengere vagevage. Inê be hagarakonira na kariaku. Inê be hagarahasira, ke rongo raha na atata.

²⁰Inê be tamanira, hanana ga ramoramo aporo manga i nago, ma ka page rêra nganganihaga aporo. Inê be hagaitangira na enoni hato, ga hagamamasiaga apeta.

²¹Na maneraha iata ki page rêra akê i berarogata ngaira mareta. Mareha vi na mahuara. Inê be unia, ke râ me i pasiku, suria i asa ta na enoni, vige ara me i pasiku, manga vigê pe unia.

²²Ngaira ka page voravora re na kariaku ma inê kê page God iata. Ngaia kani gê visia, inê na Araha.”

²³Na mangariaganiha iana na Araha ki manga na roga raha, manga na maguara ramo, ki page nahuira na enoni erataga.

²⁴Na mangarigananiha iana ki asa, vige page hato, mataro me ka hatohato na ara ni marâ, i bani takusigi. I ta na matena i muri me na kariana ka page aitangisigi maninga na tarani ngegana.