Read Kahua JEREMIA 31 Bible Online

JEREMIA 31 - Kahua bible

JEREMIA 31

¹Na Araha ki vi: “I ta na matena i muri me inê kê page God iata na ara ni varo ninuni iana o Isiraele, ma ngaira ka page voravora re na kariaku.

²Inê kê takuira na enoni, ga bani gava igê na bagamasusu raha, ma kê hagatahira tenia na mera.

³Matena na Isiraelita ka obania, viga mamaro, inê kê vatugira igê na agua hagatê ngekana. Ai ni Isiraele, inê kê bani takuigamu me tare, ma kê ama ni takuigamu tare nga.

⁴Inê be hagakorogamu aporo, igamu ma na apanena iami. Igamu kamu page tahutahuru nikâ surigi na ki, ma kamu page vagevage ma kamu page mâmâ.

⁵Igamu kamu page hasihasi nikâ na pariki ni vaini igê na tarihani na hungani i Samaria, ma na ani, ga hasihasi, ka page ngaugi na guani.

⁶Monari, i ta na matena i muri me na mane ni anumasiha igê na hungani i Eperaimi ka page ngerengere raha, ka vivi, ‘Nika, ge akê i Sione i pasina na Araha God iaka.’”

⁷Na Araha ki vi: “Mu kiki vagevage renia i Isiraele, i raha teharigi na agua getigi i maveta. Mu kiki, ma kamu tarohenia, kamu vivi, Na Araha ki bani hagatahira na kariana, na ani ga tahitahi mêngara.

⁸Inê be torera aporo me tenia i Babilonia. Inê be hagahakura me tenigi na agua hato i maveta. Na ani ga guru ma na ani ga tavi ka page arâ me henira, ma nikâ na gete, ga obara, ma na ani ga sugi apara. Ngaira hato ka page aporo me, ma ki rongo raha ngavê na atata.

⁹Na kariaku ka page aporo me. Ngaira ka page angiangi ma ka page nunginungi, matena gê bêngenira aporo me. Inê be bêngenira tanga na ve oto surigi na tara manamanaga. I asa iata vige tapasu. Inê kê manga na vaemana o Isiraele, ma o Eperaimi ki manga na bêbê ni kare mane iaku.”

¹⁰Na Araha ki vi: “Enoni i maveta, mu karingê. Mu tarohenigi na tamasinga iaku tangara na enoni igê na agua hagatê. Inê kê bani tokorenira na kariaku, ma inê be hagahakura aporo me, ma be marupera manga na avanu ni sipi.

¹¹Inê kê bani rupasira na kariaku, ma kê bani hagatahira tenira na enoni, ga ramo teharira.

¹²Ngaira ka page arâ me ma ka page kiki vagevage i hungana i Sione. Ngaira ka page vagevagesigi na mahatanga iaku: na ngêra, na vaini ma na oile ni olive, na sipi ma na puruka. Ngaira ka page manga na mu magarohaga. I asa ta na marâ, vige marehasira.

¹³Na kere gete ka page obakoro ma ka page mâmâ. Na mane, na gapu haoru ma na meraha, ka page vagevage. Inê be haganaku parongata. Ki hato vige angi maramara, ma ka vagevage hete. Ki hato vige obaera, ma ka obâbakoro hete.

¹⁴Inê be hagangêra na mane ni vogasiha renigi na ngêra mora ma be hagamasura na kariaku renigi na mahatanga iaku. Ngaia kani gê visia, inê na Araha.”

¹⁵Na Araha ki vi: “Na enangiha ki rongo raha i Rama: na enangiha maramara. Ka Ragele ki angisira na karena. Ngaira ka bani magahuru. Ngaia ki usi, vige haganaku parongana.

¹⁶Siana ko angi. Taruhigi râ na tavoni na maamu. Igo ko page taugi na meni na tagaraha iamu tangara na karemu. Ngaira ka page aporo me tenia na apanena iata na merongata.

¹⁷I na murina ki page korokoro tangago. Na karemu ka page aporo me i pasita. Ngaia kani gê visia, inê na Araha.

¹⁸“Na ai ni Isiraele ki rugu na obata. Inê kê rongora ga gege, ka vi: ‘Araha, igami kami manga na puruka vasiga, ma igo ko hagamanatagami. Gu hagaporosigami tangago, suria igami kami obanigo, igo na Araha God iamami.

¹⁹Igami kami murisigego, ma ki sugia ma vigami tako aporo. I murina go hagaitangigami, igami kami haganahuigami maremami. Igami kami maki ma kami tangahurigami surigi na bagatarihamami, matena mi karekare mêngagami.’

²⁰“Isiraele, igo nga na kareku hetakui, iê? Inê kê takuigo ngavê, iê? Na ara ni matena gê rongoa na atamu, inê kê takusigo, kê takuigo, ma kê angisigo. Inê be tamanigo nga.

²¹Gu nakagi na girarana na tara, hanana siana ko hagatasia. Gu bâsia maninga na tara, go râ suria. Ai ni Isiraele, mu aporo me, mu aporo me tange i pasimi.

²²Mu pe toto suriê arihu me tariha? I arihu manga i he, ma kamu kahu aporo me? Inê kê bani hagavora na tarana haoru, na tarana i tora getea ngavê, manga na gete i anumasia na mane.”

²³Na Araha God raramohaga hunia iata na Isiraelita ki vi: “Matena gê torera aporo na kariaku tanga i pasita, ngaira ka page vi nikâ i na apanena iata i Juta ma surigi na hinua igê, ka vivi: ‘Na Araha ke koro tanga i Jerusaleme, tanga na hungana apuna, na agua i oga igê.’

²⁴Na enoni ka page oga i Juta ma surigi na hinua igê. Tani ka page tagarahigi na mu, ma tani ka page nahunira na totoha ni sipi.

²⁵Inê be hagaramonira aporo na ani, ga memega, ma be hagangêra na ani, ga magê hunira.

²⁶Tahema na enoni ka page vi, ‘Inê kê râ kê mauru, ma na matena gê riterite, inê kê ramoramo aporo.’

²⁷Inê na Araha kê vi vikê: I ta na matena i muri me inê kê page katora na enoni ma na togoha iata ka gahuia na agua hagenani i Isiraele me Juta.

²⁸Tagenana manga i nago inê kê aruma, hanana gê pirigi akê na raramohata, kê okegi vato, kê horogi, kê hogegi ma kê hagaerasigi, i ngekê inê be aruma, hanana ve hasigi ma be hagêrasigi.

²⁹I na matena ngekana na enoni ki hato iata, vige vi: ‘Na enani kare ka ngêgi na guani mahe na vaini, ma ki mangurira na kareta.’

³⁰Mareha. Na enoni, i ngaugi na guani mahe na vaini, kani manguria so marena hete. Na enoni ki page meme renigi na tasi iana marena ma, mareha vi renigi na anina na enoni getea.”

³¹Na Araha ki vi: “I na matena i muri me inê be naka na suruheri haoru henira na ai ni Isiraele me Juta.

³²Ngaia ki page tora hegetigi tenia na bani suruheri, inê kê naka henira na êvarita, matena gê urura ma kê bêngenira hura tenia i Esipito. Naka ma gê kato manga vi inê ka na vaemata, ma ngaira ka aharêngia na bani suruheri ngekana.

³³Na suruheri haoru, gê page naka henira na ai ni Isiraele, ki page manga ikê: Inê be nakagi na ramata iaku i obata, ma be segegi igê na aitangihata. Inê kê page God iata, ma ngaira ka page voravora re na kariaku.

³⁴I asa ta na enoni, vige hagesuria na tamana se vi na goana, hanana vige girarê, vi o ti inê, suria ngaira hato ka page aitangisiê, na enoni raha ma na enoni purua ma na kare nikâ. Inê be bonotenigi na tasia iata, ma ki asa be takusigi aporo na bagaparongata. Ngaia kani gê visia, inê na Araha.”

³⁵Na Araha ki vi: “Inê kê hagavora na arito, ki mavesigi na tangiani. Inê kê hagavoragi na hageha ma na higu, ka mave igê na bungiani. Inê kê aronga na asi, ki arobo ma ki maguhu. Ataku ki na Araha raramohaga huniê.

³⁶Inê kê vi, na Isiraelita ka na kariaku tare, mataro me ka magahuru na marâ, gê bani hagavoragi.

³⁷Ma i ta na tangiana ta na enoni ke hagavorea na vaveraro ma ke hahariria na gatana na maveta, hoi, igê na tangiana nga ngekana inê be kasi renira igê na Isiraelita renigi na bagatauhata. Ngaia kani gê visia, inê na Araha.”

³⁸Na Araha ki vi: “I ta na matena i muri me ka page tagarahia aporo na hinua iaku, Jerusaleme hagenani, i haganega kereso igê na Bebetehe iana o Gananele tariha igê na Manipara na Ariruguna.

³⁹Ma ka page gurua râ nikâ na taritarihana i kereso tariha igê na hungana i Garebe, ma ki arigu tanga i Goa.

⁴⁰Ka page nakagi tangê na maruguna hagenani, ga bêbagi nuni igê ma ka kasikasi roro igê, ma na mu hato i papana na ve i Kiteroni, tariha i kerekê igê na Manipara ni Hosi. Ngaigi ka na aniku, ma ki apu tangara na enoni. Na hinua ki asa hagetage, vige page ahoge, se viga page aruhuruhu.”