Read Kahua JEREMIA 32 Bible Online

JEREMIA 32 - Kahua bible

JEREMIA 32

¹Matena o Setekia ki maneraha i Juta surigi na tangahuri harisi, mo Nebukanesa ki maneraha nogana i Babilonia surigi na harisi tangahuru matare varu, na Araha ki tamasi tangê.

²Igê na matena ngekana na mane ni me iana na maneraha i Babilonia ka taharia i Jerusaleme, ma inê kê oga igê na ruma ni hagaitangiha igê na mahera na ruma iana na maneraha i Juta.

³Na maneraha o Setekia ki purusiê i ngekana, suria i mangariaga tangê, renia inê kê tarohenia na tamasinga iana na Araha. Inê kê vi, vi na Araha ki tamasi vikê: “Inê be hagamarumungenia na maneraha ni Babilonia, ke henahuraua na hinua ikê,

⁴ma na maneraha o Setekia ki asa, vige tahi tenira na me. Ngaira ka page tagarenia tanga na maneraha i Babilonia. Ma ngaia o Setekia ki page rêra ma ki page tamasi tanga i maana.

⁵Ga page torea o Setekia tanga i Babilonia, ma ki page oga i ngekana, mataro me kê page botage renia nikâ. Henaka vi ngaia, ma ki meraheariha na me ni Babilonia, ngaia ki page meraheariha hagaborâ ma.”

⁶Na Araha ki vi tangê, ki vi:

⁷“Jeremia, vesimu tonge o Ganamele karena o Salumu ki page vatugigo, ma ki page nungigo, vigo vuria na mako iana i Anatote igê na apanena iana o Benamino, suria igo nga ka na mona, ma ki oto tangago, hanana vigo vuria, ko nahunia.”

⁸Ma ki tâ vikana, manga i visia na Araha. Vesiku o Ganamele ki vatugiê me igê na mahera ngekana, ma ki rângenia tangê na mako iana i Anatote. Tahema inê kê girara, vi na Araha ki tamasi tangê monari.

⁹Ma inê kê vuria na mako tenia o Ganamele, ma kê vatea na haga tangahuru matare pi na siliva.

¹⁰Inê kê segea na ataku igê na pepa ni vuriha, ma kê puruia i maata na ani ga hagatanga monari reniê, ma kê toma na haga na mena na mako.

¹¹Inê kê segererua na ani gi rua na pepa ni vuriha. Na pepa ni vuriha ngegê i raroterua ka oga igê na tamasinga renia na vuriha ma manga i he na vurina. Tani kê puruia ma tani ki mareha.

¹²Inê kê torererua tanga o Baruku. Vaemana o Baruku ka no Neria, mo virana ka no Maseia. Inê kê vatea renirerua i maata o Ganamele ma na ani ga hagatanga monari reniê, ma ka bani segegi nogata na atata igê na pepa ni vuriha, ma i maata na enoni, ga oga i ngekana igê na mahera.

¹³I maata na enoni hato ngegana inê kê vi tanga o Baruku, kê vi:

¹⁴“Na Araha God raramohaga hunia iata na Isiraelita ki bonasigo, hanana vigo nakarerua i rarona na pi na hê na pepa ni vuriha, na ani gê puruia ma na ani i mareha, hanana garu gâga arihu.

¹⁵Na Araha God raramohaga hunia iata na Isiraelita ki vi, vi igê na agua ikê ka page vurivuri nikâ na ruma, na mako ma na pariki ni vaini.”

¹⁶I murina gê vatea o Baruku na pepa ni vuriha, inê kê nunginungi, kê vi:

¹⁷“Araha raramohaga hunigo, igo ko hagavorarerua na maveta ma na vavearo renia na raramohamu raha. Igo ko teha ngavê. I mareha ta na marâ, vige bara tangago.

¹⁸Igo ko bani takuira me na rehagaro ma na rehagaro na enoni. Na takuiha iamu ki asa, vige page hato. Ma igo ko hagaitangira nikâ na enoni renigi na tasi iata na enata. Igo ki na God, go raha teha ma ko raramohaga ngavê. Na atamu ki na Araha raramohaga hunigo.

¹⁹Na katoha iamu ka mataha. Igo ko katogi na mena. Igo ko giraragi na tauhata na enoni, ma ko vurira renigi.

²⁰I nago kere vê noga igo ko katogi na mena ma na tagaraha raha i Esipito, ma ko ama ni katogi nga mataro me i ngekê, ikê i Isiraele ma igê na agua hato getigi nikâ. Tahema ki rongo raha na atamu i maveta hagenani.

²¹Igo ko torera hura na Isiraelita tenia i Esipito renia na raramohamu raha, suria go katogi na mena ma na tagaraha raha, ga hagamagusira na merongamami.

²²Igo ko haganahunira renia na agua ikê, na agua ni mako koro ma ni ngauha, manga go bani surua tangara na êvarita.

²³Matena ga kahu nahunia na agua ikê, ngaira ka aharêngigi na ramata iamu, ma ka pe râ surigi na hagesuringa iamu. Ngaira ka pe botage renigi na tamasinga iamu tangara. Tahema na bagabevoani hato ngegana ka tarahura.

²⁴“Na ai ni Babilonia ka rapia na hinua renigi na mako, ga akugi rihia, hanana viga henahuraua. Ma ngaira ka taharia. Na hinua ki page vota renigi na hearihatana ma na magêha ma na ringa, ma na me ni Babilonia ka page taharia. Bâ, na marâ, go bani visia, ka vora me i ngekê nga.

²⁵Henaka, ma igo Araha raramohaga hunigo ko bonasiê, gê vuria na mako i maata na ani, ga hagatanga monari reniê, naka ma na ai ni Babilonia ki sugia ma, vige henahuraua na hinua.”

²⁶Ma na Araha ki tamasi tangê, ki vi:

²⁷“Inê nga ki na Araha God iata na enoni hato i maveta. Mareha ta na marâ, vige bara tangê.

²⁸Inê be tagarenia na hinua ikê tanga o Nebukanesa na maneraha i Babilonia henira na mane ni me iana. Ngaira ka page henahuraua,

²⁹ma ka page naka igê na gi. Ngaira ka page sungia henigi na ruma, ga hagamangariê igê na enoni, suria ga susu igê tanga o Bala ma ka vogasira igê na ataro getera renia na vaini.

³⁰Haganega me tenia i nago kere vê noga, na ai ni Isiraele me Juta ka bani hagaera obaku, ma ka bani hagamangariê renigi na bagatauhata, ga vogasira na ataro.

³¹Na ai i na hinua ikê ka bani hagamangariê me tenia na matena, ga tagarahia moramora igê na hinua.

³²Ma inê kê mangariaga ngavê. Hoi, be ruhuruhua nga, suria ngaira hato na ai ni Juta me Jerusaleme henira na maneraha ma na enoni raha iata, henira na mane ni vogasiha ma na poropete iata ka tasi bâraha ngavê.

³³Ngaira ka murisigeê. Naka ma gê ama ni hagesurira nga, ma ngaira ki asa ngavê, vige karingê, se vige tê viteaku.

³⁴Ma ta na tarana nikâ ki era ngavê. Ngaira ka nakagi na nunuta na ataro i rarona na Ruma ni Rotu, ga tagarahia, hanana viga rahesiê inê igê. Igê na tarana ngekana ngaira ka hagaerasia ngavê.

³⁵Ngaira ka tagarahigi na bea ni vogasiha tanga o Bala igê na maruguna i Hinome, hanana ga vogasi renira igê na kareta, mane ma na gete, tanga o Moleki na ataro. Inê kê pe bonasira ke kato vikana. Inê kê vi ma, vi ngaira ki asa, vige katokato vikana ma ke hagatasira na ai ni Juta.”

³⁶Na Araha God iata na Isiraelita ki tamasi tangê nikâ, ki vi: “Jeremia, na enoni ka vi, vi na hearihatana, na magêha ma na ringa ka page tarahua na hinua ikê, ma na maneraha ni Babilonia ki page henahuraua. Hoi, be visia vê nikâ ta na marâ. Gu rongo!

³⁷Inê be hagahakura me na kariaku tenigi na agua hato, gê bani tokorenira surigi igê na mangariaganiha raha iaku, ma be torera me aporo ikê, ke oga asitatara tare igê.

³⁸Ma ngaira ka page voravora re na kariaku, ma inê be God iata.

³⁹Inê be katora, ke obahaku, ma ke togeaga, hanana ge hagahigasiê tare, ki bê ki arâ. Igê na tarana ngekana ngaira ka page tarahua na ramana, ngaira ma na raraha iata.

⁴⁰Inê be naka henira na suruheri, i asa hagetage vige page hato. Inê be ama ni korokoro nga tangara, ma be katora, ke hagahigasiê i mêrihata hagenani, hanana i asa vige page kasi reniê.

⁴¹Inê be obakoro, hanana ve mamahata tangara, ma be katoa na ogaha iata, ke nganganihaga igê na agua ikê.

⁴²“Tagenana ma inê kê katogi na bagabevoani, ke tarahura na enoni ngegana, inê be vatera renigi nikâ na ara ni marâ koro hato, gê bani surugi.

⁴³Na enoni ka vi, vi na agua ikê ki page manga na bagamanihê raha. Na enoni ma na totoha iata ki asa, vige page oga igê, ma ka vi nikâ, vi na ai ni Babilonia ka page henahuraua. Ma na enoni ka page vurigi nikâ na mako igê na agua ikê.

⁴⁴Na enoni ka page vurigi, ma ka page segegi na atata igê na pepa ni vuriha, ma ka page puruigi i maata na ani, ga hagatanga monari renigi. Ngaira ka page katokato vikana i na apanena iana o Benamino, surigi na hinua rihia Jerusaleme, surigi na hinua i Juta, ma surigi na hinua i toro, surigi na hinua i bena i Sepela, ma surigi na hinua i Negeve. Na ogaha iata ki page koro ngavê. Ngaia kani gê visia, inê na Araha.”