Read Kahua JEREMIA 33 Bible Online

JEREMIA 33 - Kahua bible

JEREMIA 33

¹Matena gê goga mênga i ruma ni hagaitangiha igê na mahera, na Araha ki tamasi tangê nikâ.

²Na Araha, i hagavora ma ki katoa na maveta ma ki naka ki nganganihaga igê na atohana, ki tamasi tangê. Na atana ki Araha.

³Ngaia ki vi tangê, ki vi: “Gu uniê, ma inê be aramigo. Inê be hagarongogo renigi na marâ, ga koro ngavê ma ka hagakonego, na marâ go pe rongo kuruhani rârâ.

⁴Inê na Araha God iata na Isiraelita, inê kê vi, viga page hogegi na ruma i Jerusaleme ma na ruma raha iana na maneraha i Juta igê na hearihatana.

⁵Na me ni Babilonia ka page banuhigi na ruma, ma ka page meraheariha na enoni igê, ma na ruma ka page vunuvunu mamasuaga renigi na gahuata na enoni, gê page hagamesira igê na mangariaganiha raha iaku. Inê kê rumakaka renia na hinua ikê, suria na enoni igê ka bagaparongata.

⁶Henaka, ma inê be hagakorora aporo na enoni i hinua ikê, ma be hagakomagara. Inê be katora, ke oga igê na marapeha ma ke apeape tatara.

⁷Inê be katora na ai ni Juta me Isiraele ke oga igê na ramana, ma na ogaha iata ki page korokoro aporo manga i nago.

⁸Inê be hagamatarotarora tenigi na bagatarihata hato. Ngaira ka pe toto suriê ma ka haritoheê ma. Ma inê be bonotenigi na tasi iata.

⁹Inê be vagevagesia Jerusaleme, be ageagesia, ma ki page rongo raha na ataku renia. Na enoni hato i maveta ka page magu, ma ka page tatata, matena ga rongogi igê na mahatanga iaku tangara na ai ni Jerusaleme ma na ramana, gê vatera.”

¹⁰Na Araha ki vi: “Na enoni ka vi, vi na hinua ikê ki manga na bagamanihê raha, ga pe oga rârâ igê na enoni se vi na marâ getera ga mauri. Ma ki monari. Na hinua i Juta ma na tara i Jerusaleme ka bagubaguruga. Ga mareha vê igê na enoni, se vi na togoha, se vi na marâ vasiga.

¹¹Ma surigi na hinua hato ngegana na enoni ka page ngerengere vagevage aporo, ma ka page katogi aporo nikâ igê na ngêra ni hagataku ma na mâha. Ngaira ka page kiki aporo nikâ igê, matena ga vogasi ma ka visiê koro i Ruma ni Rotu iaku. Ngaira ka page kiki, ka vivi: ‘Ge visia koro na Araha raramohaga hunia, suria ngaia ki takuigia, ma na takuiha iana ki asa, vige page hato.’ Na ramana ki page aharêsia na agua ikê manga i nago. Ngaia kani gê visia, inê na Araha.”

¹²Na Araha raramohaga hunia ki vi: “Na agua ikê ki manga na bagamanihê raha, ga pe oga rârâ igê na enoni, se na togoha ma na marâ vigana. Naka ma, ma ngaia ka page oga aporo igê na pariki ni go, na avanu ni sipi ka kasira igê na sipi iata.

¹³Surigi na hinua i toro, surigi na hinua i bena i Sepela ma i Negeve, surigi na hinua i na apanena iana o Benamino, surigi na hinua rihia Jerusaleme, ma surigi na hinua i Juta na avanu ni sipi ka page tomanira nikâ na sipi iata. Ngaia kani gê visia, inê na Araha.”

¹⁴Na Araha ki vi: “I ta na matena i muri me inê be hagamonarigi igê na suruha iaku tangara na ai ni Isiraele me Juta.

¹⁵Igê na matena ngekana inê be atea, ke maneraha ta na raraha iana o Tavite, na ani i oto na parongana. Na maneraha ngekana ki page katogi na koroha ma na otoha suria na marê hagenani.

¹⁶Na ai ni Juta me Jerusaleme ka page tahitahi ma ka page asitatara. Ma ka page hêtana na hinua, vi ‘Araha ni Tahingaka’.

¹⁷Inê nga na Araha, inê kê surua, vi tenia na raraha iana o Tavite ke heheuri ke maneraha i Isiraele.

¹⁸Inê kê surua nikâ, vi na mane ni vogasiha ke heheuri tare tenia na raraha iana o Levi, hanana vige susu tangê ma ke vogasiê renigi na ngêra ma na ganiani.”

¹⁹Na Araha ki vi tangê, ki vi:

²⁰“Inê kê naka na ramata tangarerua na tangiana ma na bungiana, ma na ara ni hitangiterua ki nahunia na matena iana. I asa vige mareha. Na ramata iana ki tâ i tâ.

²¹I tagenana ma inê kê naka na suruheri iaku henia o Tavite na kariaku, vi na maneraha ka page heheuri tare tenia na raraha iana. Nikâ inê kê naka na suruheri henira na mane ni vogasiha tenia na raraha iana o Levi, hanana viga tagara tangê. Na suruheri ngegana nikâ karu tâ garu tâ.

²²Inê be hagarakonira na raraha iana na kariaku o Tavite ma nikâ na mane ni vogasiha, na raraha iana o Levi, hanana i asa, vige tomanira. Ngaira ka page rakorako mangagi na higu i vavearo, se mangagi na one i one. I bara vige tomanigi nikâ.”

²³Na Araha ki tamasi tangê, ki vi:

²⁴“Igo ko rongora vari, vi na enoni ka vi, vi inê kê kasi renira na ai ni Isiraele me Juta, gê bani atera? Tahema ngaira ka kitenira na kariaku, ma ka vi ma, viga pe ura getera.

²⁵Ma bâ, inê na Araha, kê nakagi na ramata tangarerua na tangiana ma na bungiana, ma tangarerua nikâ na maveta ma na vavearo.

²⁶Na ramata ngegana ka tâ ga tâ. I tagenana ma nikâ na suruheri iaku ki tâ i tâ henira na raraha iana o Jakobo, ma henia nikâ na kariaku o Tavite. Inê be atera tare na raraha iana o Tavite, ke heheuri, ke marungira na raraha iata o Abaramo mo Isako mo Jakobo. Inê be takuira aporo na kariaku, ma be katora, ke oga aporo igê na ramana.”