Read Kahua JEREMIA 34 Bible Online

JEREMIA 34 - Kahua bible

JEREMIA 34

¹Na Araha ki tamasi tangê igê na matena o Nebukanesa na maneraha i Babilonia ma na mane ni me iana ka taharigi igê Jerusaleme ma na hinua hagarangia. Ma na mane ni me surigi na agua hato, ga oga i ruguhana, ka tamania.

²Na Araha God iata na Isiraelita ki vi tangê, ki vi: “Gu râ i pasina o Setekia na maneraha i Juta, ma ku hagarongoa renia na tamasinga iaku ikê: Inê na Araha be tagarenia Jerusaleme tanga na maneraha i Babilonia, ma ngaia ki page sungia, ki makaka.

³Ma igo, Setekia, ki asa, vigu gavatenia. Ga page hagatotongogo hete, ma ka page mahatangenigo tanga. Go page rêra ma ko page tamasi tanga i maana. Ma hemuri ka page torego tanga i Babilonia.

⁴Setekia, go rongo, gê vi tangago. I asa vige nahuigo ku me.

⁵Igo ko page meme suri parongamu ma. Na enoni ka sungigi na marâ, ga sigini koro, matena ga bagira igê na êvarimu, ga maneraha i nago taramu. Tagenana ma nikâ tangago igo. Ngaira ka page angiangi maramara renigo, ka vivi, ‘Evaê, i magahuru na maneraha iaka!’ Ngaia kani gê visia, inê na Araha.”

⁶Hoi, ngaia ka na tamasinga, gê hagarongoa renia o Setekia na maneraha, i oga i Jerusaleme,

⁷matena na mane ni me iana na maneraha ni Babilonia ka taharia igê na hinua ngekana. Ma ngaira ka taharirerua nikâ na hinua i Lagisi me Aseka. Ngaira ka bani henahuraugi na hinua hato i Juta, nga noga ma ngairerua.

⁸Na maneraha o Setekia ma na ai ni Jerusaleme ka heaganari, hanana viga nakara vê

⁹na kare rakuraku iata, na ani ga Siu, na ani mane ma na ani hehene, hanana viga rêra mareta. Ngaira ka kato vikana, hanana vi na Isiraelita ki asa, vige katoa na goana, ke voravora re na kare rakuraku iana.

¹⁰Na enoni hato ma na enoni raha iata ka heaganari, hanana viga nakara vê na kare rakuraku iata, ka rêra mareta, ma hanana siana hagetage ka katora re nikâ na kare rakuraku iata. I monari, ngaira ka nakara vê, ka ura mareta.

¹¹Ma hemuri ngaira ka tako rugu, ma ka torera aporo, ka katora aporo nga re na kare rakuraku iata.

¹²Tahema na Araha God iata na Isiraelita ki hagatorê, kê tamasi tangara na enoni.

¹³Na Araha ki vi tangara, ki vi: “Inê kê naka na suruheri iaku henira na uvarimi, bevoana gê hagatahira tenia i Esipito, matena ga vora re na kare rakuraku igê.

¹⁴Inê kê bonasira, hanana vi igê na ara ni pita na harisi ka nakara vê, ka rêra mareta na ara ni Hebereo, ga bani vora re na kare rakuraku iata surigi na harisi ge ono. Ma na êvarimi ka pe karingê rârâ, se vige tê viteaku.

¹⁵Igê na kere tangiani hato igamu kamu urisi tauhami, ma kamu hagakoro obaku. Igamu hato kamu heaganari, vigamu nakara vê na goami na Isiraelita, ga vora re na kare rakuraku iami, hanana viga rêra mareta. Igamu kamu tohe i maaku, i Ruma ni Rotu, mu rahesiê igê.

¹⁶Ma igamu kamu urisi takoha iami nikâ, ma kamu erasiê. Igamu hato kamu rakura aporo na kare rakuraku iami, mu bani nakara vê, ka ura mareta surigi na obaniha iata. Igamu kamu tugurira, ka vora aporo re na kare rakuraku iami.

¹⁷Tahema, inê na Araha, kê vi, vi igamu kamu haritoheê. Igamu kamu pe nakara vê na goami na Isiraelita, ka ura mareta. Hoita, bâ, inê be nakagamu vê, kamu ura maremi, hanana mu rêra tanga mu meme renigi na hearihatana, na ringa ma na magêha. Inê be katora na enoni surigi na agua hato getigi i maveta, ke makimaki tenigamu renigi na tarani ngegana.

¹⁸Na enoni raha i Juta me Jerusaleme henira na gavumane iana na maneraha, na mane ni vogasiha ma na enoni hato, ngaira ka suruheri heniê. Ngaira ka vurusia na puruka mane, ki vora na mavorana gi rua, ma ka râ i berarogaterua. Ma ngaira ka aharêngia na suruheri, ma ka kasia. Hoi, na tarana, i tarahua na puruka mane, ki page tarahura nogata ngaira.

²⁰Inê be tagarenira tangara na merongata, ga obania viga mutera ngavê. Na manu ma na marâ vasiga ka page ngaugi na gahuata.

²¹Inê be tagarenira nikâ o Setekia na maneraha i Juta ma na gavumane iana tangara na ani, ga obania viga nahuira ka meme. Inê be tagarenira tangara na mane ni me ni Babilonia, ga aporo tenigamu.

²²Ma inê na Araha, inê be bonasira, ke aporo me nikâ tanga na hinua ikê. Ngaira ka page taharia, ka page henahuraua, ma ka page sungia. Inê be ruhuruhugi na hinua i Juta, ke hihiruga. Ngaia kani gê visia, inê na Araha.”