Read Kahua JEREMIA 35 Bible Online

JEREMIA 35 - Kahua bible

JEREMIA 35

¹Matena o Jehoiakimo, karena o Josia, i marungia igê i Juta, na Araha ki tamasi tangê, ki vi:

²“Gu râ i pasita na Rekabita ma ko tamasi tangara, ga râ me henigo. Ma hemuri ko merabanu igê na hitangini na kiboru i Ruma ni Rotu, ma ko vatera igê na vaini ka totono.”

³Hoi, inê kê merarâ ngaira hato na Rekabita: o Josania, karena na ani getea o Jeremia, karena o Gabasinia, ma ngaira hato o goana ma na kareta.

⁴Inê kê merarâ tanga na Ruma ni Rotu, ma kê merabanu igê na kiboru iata na kariana na poropete o Ganani, karena o Igitalia. Na kiboru i oga hagarangia na anita na enoni raha, ma i avorana na kiboru iana o Maseia, karena o Salumu. O Maseia ki bâsurira na enoni, ga tagara i Ruma ni Rotu.

⁵Inê kê nakagi i maata na kâkâ ma na apira, ga vunu renigi na vaini, ma kê vi tangara, kê vi: “Mu tono.”

⁶Ma ngaira ka arami, ka vi: “Igami kami pe totono na vaini. O Jonataba, na êvarimami karena o Rekaba, ki vi tangagami, vi igami ma na raraha iamami ki apu, vigami tono na vaini.

⁷Ma ki apu tangagami nikâ, vigami tagarahigi na ruma, se vi na mu, se vigami hasihasi na pariki ni vaini, se vigami vurigi. Ngaia ki bonasigami, kami oga ma igê na ruma ni gahu, hanana vigami mi gâga tare igê na agua, mi mamahuara igê ikê.

⁸Igami kami bani râ surigi me na ramata, i nakagi tangagami o Jonataba. Igami ki asa hagetage, vigami tono na vaini, igami maremami, ma na gete iamami, ma na karemami, mane ma na hehene.

⁹Igami kami pe tagarahigi rârâ na ruma mora. Igami kami oga ma igê na ruma ni gahu. Igami kami pe nahunigi rârâ na pariki ni vaini, se vi na mu. Igami kami pe hasihasi ngêra. Igami kami râ surigi ngavê na ramata, i nakagi tangagami o Jonataba na êvarimami.

¹¹Na matena na maneraha o Nebukanesa ki taharia igê na agua, igami kami takusia, vigami arâ me ikê i Jerusaleme, hanana vigami tahitahi igê tenira na mane ni me ni Babilonia me Siria. Tahema igami kami oga i Jerusaleme.”

¹²Ma hemuri na Araha God rararamohaga hunia iata na Isiraelita ki hagatorê, kê tamasi tangara na ai ni Juta me Jerusaleme. Na Araha ki vi tangara, ki vi: “Inê be hagategamu, tanu hega kamu usi, vigamu karingê ma kamu pe tê viteaku?

¹⁴Na raraha iana o Jonataba ka bani râ surigi na ramata iana tangara, hanana vi siana ka totono na vaini. Ma ki mataro me i ngekê nga ki mareha rârâ na hitangita, vige tono na vaini. Ma ki naka ma, inê kê ama ni tamasi nga tangagamu, ma igamu kamu ama ni haritoheê nga.

¹⁵Inê kê ama ni hagatorangenira nga na kariaku na poropete tangagamu, ma ngaira ka bonasigamu, vigamu kasigi râ na bagatauhami, ma kamu katogi ma hete na tarani, ga oto. Ngaira ka manimanigamu, hanana siana kamu vogasira ma kamu hagarapera na ataro, hanana mu ama ni gâga nganganihaga nga igê na agua, gê haganahunigamu renia, igamu ma na uvarimi. Ma igamu kamu pe karingê, ma kamu pe tê viteaku.

¹⁶Na raraha iana o Jonataba ka bani râ suria me na ramata, i naka tangara na êvarita, ma tangagamu igamu, igamu kamu haritoheê ma.

¹⁷Hoi, i ngekê, inê na Araha God raramohaga huniê iata na Isiraelita, inê be nakagi na bagabevoani, gê bani surugi, ke tarahugamu na ai ni Juta me Jerusaleme. Inê be kato vikana, suria igamu kamu usi, vigamu karingê, matena gê tamasi tangagamu. Matena inê kê unigamu, igamu kamu pe aramiê.”

¹⁸Ma hemuri inê kê hagarongora renigi na tamasinga iana na Araha God raramohaga hunia iata na Isiraelita. Ngaia ki vi tangara na Rekabita, ki vi: “Igamu kamu bani râ suria me maninga na ramata, i naka tangagamu o Jonataba, na êvarimi, ma kamu bani râ surigi me na ara ni hagesuringa iana ma na ara ni marâ, i bonasigamu renigi.

¹⁹Tahema, inê na Araha God raramohaga hunia iata na Isiraelita, inê kê surua, vi page gâga tare na raraha iana o Jonataba karena o Rekaba, na ani mane, hanana i toto suriê.”