Read Kahua JEREMIA 36 Bible Online

JEREMIA 36 - Kahua bible

JEREMIA 36

¹Igê na heta na harisi iana o Jehoiakimo, karena o Josia, i marungia suria i Juta, na Araha ki tamasi tangê, ki vi:

²“Gu torea na buka ma ku segegi igê na ara ni tamasinga iaku, gê bani visigi tangago renira na ai ni Isiraele me Juta ma na agua hato i maveta. Gu segegi so na ara ni marâ, gê bani visigi tangago, haganega me tenia na matena, gê tamasi moramora igê tangago, matena o Josia ki maneraha suria, mataro i ngekê.

³Vari, manga na ai ni Juta ma ka rongogi na bagabevoani hato, gê katogi tangara, ngaira ka page urisi parongata. Manga ngekana, inê be bonotenigi na bagaparongata ma na tasi iata.”

⁴Hoi, inê kê unia me o Baruku karena o Neria, hanana i segegi so igê na buka na ara ni marâ hato, na Araha ki bani visigi tangê. Inê kê tamasigi, ma ngaia ki segegi.

⁵Ma hemuri inê kê hagatora o Baruku, kê vi: “Inê ka manimaniê, siana kê bêbanu i Ruma ni Rotu.

⁶Inê kê obanigo, vigo arâ i ngekana igê na ani hemuri na tangiana ni hariharinga. Go tomania raha na buka i maata na enoni, hanana ngaira ka rongogi na ara ni marâ, i bani visigi tangê na Araha, gê bani tamasigi tangago, ko segegi. Igo ko tomatoma i ngekana, hanana ngaira hato na ai ni Jerusaleme me Juta, ga oga i ngekana, ka karingago.

⁷Vari ngaira ka page avarasia na Araha, ma ka page urisigi na bagaparongata, suria na Araha ki mangariaga ngavê tangara na enoni ngegana, ma ki page hagaitangira bâraha ngavê.”

⁸Ma o Baruku ki tê viteaku, ma ki râ i Ruma ni Rotu, ma ki tomanigi igê tangara na tamasinga iana na Araha.

⁹I na sivata na hageha igê na rimata na harisi iana o Jehoiakimo i marungia igê i Juta, na enoni ka harihari, hanana viga hagakoro obana na Araha. Ngaira hato na enoni i Jerusaleme ma na ani, ga râ me tenigi na hinua getigi i Juta, ngaira ka hari.

¹⁰Ngaira hato ka karinga, matena o Baruku ki tomania tangara na buka, i segegi igê na ara ni marâ, gê bani visigi tanga. Ngaia ki kato vikana i Ruma ni Rotu, i maana na kiboru iana o Gemaria, karena o Sapani na mane segesege. Na kiboru ngekê ki oga kerekê igê na mahera hagarangia na maana na Manipara Haoru ni Ruma ni Roru.

¹¹O Mikaia ki rongoa o Baruku, i tomania na buka, i segegi igê na tamasinga iana na Araha. O Mikaia ki no karena o Gemaria, ma o virana ki no Sapani.

¹²Ngaia ki râ tanga na ruma raha iana na maneraha, tanga na kiboru iana na mane segesege, ga hekarigi igê na ara ni enoni raha. I ngekana ka oga igê o Elisame na mane segesege, o Telaia karena o Semaia, o Eleatani karena o Akabore, mo Gemaria karena o Sapani, mo Setekia karena o Ganania, ma na gavumane hato getera.

¹³O Mikaia ki hagarongora renigi na ara ni marâ, i tomanigi o Baruku tangara na enoni.

¹⁴Ma hemuri na gavumane ka hagatorangenia o Jehuti, hanana i guhia o Baruku, ki torea me na buka, i bani tomania tangara na enoni. O Jehuti ki no karena o Netania mo virana o Selemia karena o Kusi. O Baruku ki merâ me na buka tangara.

¹⁵Ngaira ka vi tanga, ka vi: “Oga so, ma ku tomania na buka tangagami.” Ma o Baruku ki tomania.

¹⁶I murina i tomania hato, ngaira ka anumanuma ma ka hetamatamasi, ma ka vi tanga o Baruku, ka vi: “Igami kami hagarongoa nga na maneraha renigi na tamasinga hato igê na buka.”

¹⁷Ma ngaira ka hagatea nikâ, ka vi: “Gu visia tangagami, manga i he kanigo segegi na tamasinga hato ngegana? I hega, o Jeremia vari ki tamasigi tangago, ko segegi?”

¹⁸O Baruku ki arami, ki vi: “O Jeremia ki tamasigi na tamasinga hato ngegê tangê, kê segegi so igê na buka ikê.”

¹⁹Ma ngaira ka vi tanga, ka vi: “Igo mo Jeremia kamuru arâ kamuru ahiahi. Siana ta na enoni ki girara na agua, muru ahiahi igê.”

²⁰Na enoni raha ka naka na buka igê na kiboru iana o Elisame na mane segesege. Ngaira ka râ i pasina na maneraha, hanana ga hagarongoa renigi na ara ni marâ hato.

²¹Ma hemuri na maneraha ki hagaguhia o Jehuti, i torea na buka. Ngaia ki torea tenia na kiboru iana o Elisama, ma ki tomania tangara na maneraha ma na enoni raha, ga ura rihia.

²²Ngaia ki na matena na rogaroga ahuru, ma na maneraha ki rangia na gi igê na ruma, i bani gâga tare igê mateni na rogaroga ahuru.

²³I na ara ni matena o Jehuti ki tomanigi hato na ahani ge oru se ge he na buka, na maneraha ki retegi râ renia na kere gê, ma ki kasigi kê igê na gi. Ngaia ki kato rârâ vikana, mataro me na buka hagenani ki makaka.

²⁴I mareha rârâ ta na enoni, vige magu, se vige tangahuria. Na maneraha ki mareha, ma na enoni raha ki mareha nogata.

²⁵Henaka o Elenatana mo Telaia mo Gemaria ka tamasi pusia na maneraha, vi siana ki sungia na buka, ma ngaia ki pe tê ringeta.

²⁶Ma hemuri ngaia ki bonasia o Jeramele o vesina henirerua o Seraia karena o Asiriele mo Selemia karena o Abatele, hanana viga hagatotongamirua inê mo Baruku na mane segesege iaku. Ma na Araha ki katora, ka pe tarahugamirua.

²⁷I murina na maneraha o Jehoiakimo ki bani sungia na buka, o Baruku i segegi igê na marâ, gê tamasigi tanga, na Araha ki vi tangê, ki vi:

²⁸“Gu tavoa ta na buka nikâ, ma ko segegi igê na ara ni marâ, ga oga igê na bani buka, i sungia na maneraha.

²⁹Go hagarongoa na maneraha o Jehoiakimo renigi na tamasinga iaku tanga, ko vivi: Jehoiakimo, na Araha ki tamasi vikê. Igo ko sungia na buka. Igo ko hagatea o Jeremia, vi tanu hega ngaia ki sege, vi na maneraha i Babilonia ki page arâ me, hanana i ruhuruhua na agua, ma ki mutera na enoni ma na togoha iata igê.

³⁰Tahema inê na Araha be vi tangago o Jehoiakimo: I mareha rârâ na hitangita na raraha iamu, vige maneraha igê na agua, o Tavite ki marungia i nago. Na gahuamu ka page kasia hura i metara tanga na babahana na arito igê na tangiana, ma tanga na anumagaha igê na bungiana.

³¹Inê be hagaitangigamu, igo ma na raraha iamu ma na gavumane iamu, renigi na bagatarihami igamu hato. Mareha ngavê ta na enoni, vige tongesurigi na hinarunga iaku. Igo ki mareha, ma na ai ni Jerusaleme me Juta ki mareha nogata. Tahema inê be katogi na bagabevoani, gê bani visigi, ke tarahugamu igamu hato.”

³²Ma hemuri inê kê tavoa ta na buka nikâ, ma kê vatea o Baruku na mane segesege iaku, ma ngaia ki segegi igê na ara ni marâ, gê tamasigi tanga. Ngaia ki segegi so igê na ara ni marâ, ga oga igê na bani buka, na maneraha o Jehoiakimo ki sungia. Ma ngaia ki segegi so igê nikâ na tamasinga haoru, gê kahu visigi tanga, ma ka tagenani ma henigi na bani ani.