Read Kahua JEREMIA 37 Bible Online

JEREMIA 37 - Kahua bible

JEREMIA 37

¹O Nebukanesa na maneraha i Babilonia ki kasia o Setekia karena o Josia ki maneraha i Juta urusia o Jehoiagino karena o Jehoiakimo.

²O Setekia ma na gavumane iana ma na enoni ka mareha ngavê, vige tongesurigi na tamasinga iana na Araha, gê visigi tangara.

³Na maneraha o Setekia ki hagaguhirerua o Jehukale karena o Selemia mo Sepania na mane ni vogasiha karena o Masaia, karu nungiê, kê avarasia na Araha, hanana vi tamania na apanena iaka.

⁴Ga mamênga vige kasiê i ruma ni hagaitangiha, ma kê arârâ asitatara ma i pasita na enoni.

⁵Na mane ni me ni Babilonia ka taharia Jerusaleme, ma ngaira ka aporo, matena ga rongoa, vi na mane ni me iana na maneraha i Esipito, ka bani tavoraha me.

⁶Ma hemuri na Araha God iata na Isiraelita ki vi tangê, ki vivi:

⁷“Gu vi tanga o Setekia na maneraha i Juta, i gari tamasinga tenigo, ko vi: Na mane ni me i Esipito ka bani tavoraha me, hanana viga tamanigamu, ma ngaira ka page aporo i pasita.

⁸Ma na ai ni Babilonia ka page aporo me nikâ, ka page taharia na hinua, ka page henahuraua ma ka page sungia, ke makaka.

⁹Inê na Araha kê vi tangagamu, siana kamu hagabekasigamu maremi, vi na ai ni Babilonia ki asa iata, vige page râ me nikâ. Ngaira hete ka page arâ me nikâ.

¹⁰Henaka igamu ma kamu teharira na ara ni mane ni me hato ni Babilonia, ma ka hitahita so ma na ani ga mamari ma ka tâtâ igê na ruma ni gahu iata, na ani ngegana ka page aharaga ma ka page sungia na hinua ikê, ke makaka.”

¹¹Na mane ni me ni Babilonia ka aporo tenia i Jerusaleme, suria na mane ni me i Esipito ka bani tavoraha me.

¹²Tahema ki hagagara koro tangê, vi gê tavoraha tenia i Jerusaleme tanga na apanena iana o Benamino, hanana inê ma na goaku kami tage tongani na mako ma na nahuninga iamami.

¹³Matena gê mataro râ igê na manipara, ga hêtana vi Benamino, na maneraha iata na mane ni me, i anumasia na maanipara, ki ura hagabarasiê. Na atana ki no Iria karena o Selemia. Virana ki no Ganania. Ngaia ki tamasi me, ki vi: “Igo ko hakunira na ai ni Babilonia!”

¹⁴Inê kê arami, kê vi: “Mareha rârâ! Inê kê pe hakunira.” Ma o Iria ki pe tongesuriê. Ngaia ki hagatotongoê ma hete, ma ki toreê tangara na enoni raha.

¹⁵Ngaira ka mangariaga ngavê tangê, ka ramusiê, ma ka purusiê banu i ruma iana o Jonatana na mane segesege. Na ruma ngekê ka katoa renia na ruma ni hagaitangiha.

¹⁶Ngaira ka kasiê igê na kiboru i rarona na ano, ma inê kê oga borahu i ngekana.

¹⁷Ma hemuri na maneraha o Setekia ki kasi tamasinga tangê, kê râ i pasina. I ruma iana ngaia ki hagateê pinihi, ki vi: “I hega, na Araha ki kasia me ta na tamasinga?”

¹⁸Inê kê arami, kê vi: “Ua. Ga page mahatangenigo tanga na maneraha i Babilonia.” Ma inê nogaku kê hagatea, kê vi: “Na ta kê erasia tenigamu, igo se na enoni raha igê na gavumane, se ta na enoni, tahema mu kasiê i ruma ni hagaitangiha?

¹⁹I he nga na poropete iamu, ga vi tangago, vi na maneraha ni Babilonia ki asa, vige taharia na apanena iamu?

²⁰Hoi, maneraha, inê kê nungigo nga, ko aganaria nga na nunginungiha iaku. Inê kê nungigo, vi siana ko kasiê aporo i ruma ni hagaitangiha, na ruma iana o Jonatana na mane segesege, i era ma kê me i ngekana.”

²¹Hoi, ma na maneraha o Setekia ki bonasira na me iana ka purusiê banu i ta na kiboru i ruma igê na mahera na ruma raha iana. Inê kê oga i ngekana. I na ara ni tangiani ka vateê na guana na bereti tenia na agua ni hanununga, mataro me ki hatohato ngavê na bereti i hinua hagenani.