Read Kahua JEREMIA 38 Bible Online

JEREMIA 38 - Kahua bible

JEREMIA 38

¹O Sepatia karena o Matana, mo Getalia karena o Pasuri, mo Jehukale karena o Selemia, mo Pasuri karena o Malakia, ngaira ka rongoê, gê tamasi tangara na enoni.

²Inê kê vi tangara na enoni, kê vi, vi na Araha ki tamasi vikê: “Na ani ma na enoni, i gâga so i hinua, ngaia ki page meme renia na hearihatana, se na magêha, se na ringa. Ma na ani ma na enoni, i huhura tenia na hinua ma ki naka marena i ruguhata na ai ni Babilonia, ngaia ki page tahi, naka ma, ma ngaia ki nahunia na mena na mêrihana.

³Inê na Araha kê vi, vi na mane ni me ni Babilonia ka page henahuraua na hinua.”

⁴Ma ngaira na enoni raha ngegana ka hagarongoa na maneraha reniê, ka vi: “Renigi na tamasinga iana ngaia kani katora na mane ni me i hinua, ka tako era. Ngaia ngekana ki pe tako renira na enoni! Ngaia ki obania ma vi erasira!”

⁵Na maneraha o Setekia ki aramira, ki vi: “Ua, i koro ma. Igamu ma! I asa be urapusigamu.”

⁶Hoi, ma ngaira ka meêrâ, ma ka kuniê vato igê na ve karu iana o Malakia karena o Setekia na maneraha. Na ve karu ngekê ki oga igê na mahera na ruma raha. Ngaia ki mamata, ma ki sugusuguraga, ma inê kê kumu igê.

⁷Henaka, ma o Ebeti Meleki ki rongoa, viga bani kuniê vato igê na ve karu. Ngaia ki na ai ni Etiopia, ga voea, ma ki tagara i ruma iana na maneraha. Igê nga na matena ngekana na maneraha o Setekia ki hagatamasira na enoni igê na maanipara, ga hêtana vi Benamino.

⁸Tahema o Ebeti Meleki ki hura tenia na ruma raha ma ki râ i ngekana. Ngaia ki vi tanga na maneraha, ki vi:

⁹“Maneraha, na mane ngegana ka katoa na tarana, i pe oto. Ngaira ka kunia vato o Jeremia na poropete igê na ve karu. Ngaia ki page meme i ngekana renia na magêha, suria i mareha ngavê na ngauha i hinua.”

¹⁰Hoi, na maneraha ki bonasia o Ebeti Meleki ki merarâ me na vere oru na mane, hanana viga okeê hura tenia na ve karu, i era ma kê me igê.

¹¹Tahema o Ebeti Meleki ki merarâ na vere oru na mane tanga na ruma raha iana na maneraha. Ngaira ka banu igê na kiboru ni gahu, ma ka tavogi igê na bani gahu ma na tarisigani. Ngaira ka migirâ me, ma ka kunigi so me tangê.

¹²O Ebeti Meleki ki vi tangê, kê susube renigi na gahu, suria manga vi na varo ki pe koro, i era ma na varo ki rategi na bebeku. Inê kê kato vikana.

¹³Ma ngaira ka okeê hura tenia na ve karu. I murina i ngekana ngaira ka nakê, kê oga i ruma igê na mahera iata na me, ga anumasia na ruma raha.

¹⁴Ta na tangiana nikâ na maneraha o Setekia ki uniê. Ngaia ki oga hagarangia na oruta na maa ni Ruma ni Rotu. Ngaia ki vi tangê, ki vi: “Be hagatego renia ta na marâ, ma kê obania, vigo tamasi igê na monariha. Siana ko pinihia ta na marâ teniê.”

¹⁵Inê kê arami, kê vi: “Manga inê, ma kê visia na monariha tangago, igo ko page hagamesiê. Ma ki manga inê, ma kê visigi tangago na takoha iaku, igo ki asa ngavê, vigu tê viteaku.”

¹⁶Hoi, na maneraha o Setekia ki tohe pinihi tangê, ki vi: “Inê kê tohe renia God mamauri, i vategia na mêriha, vi i asa iaku, be hagamesigo, se vi ve mahatangenigo tangara na mane, ga obania viga hagamesigo.”

¹⁷Ma hemuri inê kê vi tanga o Setekia, kê vi: “Na Araha God raramohaga hunia iata na Isiraelita ki vi vikê: ‘Mango igo, ma ko nakago maremu i ruruhata na maneraha iata na mane ni me ni Babilonia, igo ko page hagatahia na mêrihamu, ma na hinua ikê ki asa, vige page makaka. Igamu, igo ma na ahemata iamu, kamu page tahitahi.

¹⁸Ma ki manga igo, ma ko pe nakago maremu i ruguhata, hoi, na ai ni Babilonia ka page henahuraua na hinua ikê, ma ka page sungia, ke makaka, ma ki asa iamu, vigu page tahi tenira.’”

¹⁹Ma na maneraha ki aramiê, ki vi: “Inê kê magutenira na ai ni Juta, ga aharaga tenigia ma ka pane henira na ai ni Babilonia. I era ma ka tagareniê tangara ma ka kahu hagatavatava reniê.”

²⁰Ma inê kê vi tanga, kê vi: “Igo ki asa, vige page tagarenigo tangara. Inê kê nungigo nga, hanana vigo arâ surigi na tamasinga iana na Araha. Manga go katokato vikana, na ara ni marâ ka page koro tangago ma ko page tahi.

²¹Ma na Araha ki hagamaruteê renigi na tarani, ga page voravora me, manga vi igo ma ko usi, vigu nakago maremu i ruguhata.

²²Igê na maruteha iaku inê kê bâsira na ara ni gete hato, ga hita so igê na ruma raha iana na maneraha ni Juta, ngaira ka ura i murita tangara na araha ni me iana na maneraha ni Babilonia. Rongo. Matena ga râ, ngaira ka vi vikê: ‘Maneraha, na mane, go hagêguri toge renira, ngaira ka hagabekasigo ma ka hagavotarigo. Igê nga na êgamu ga susu igê na sugusugu. Ngaira ka kasi renigo.’

²³Ga page ura i murita na gete hato iamu ma na karemu tangara na ai ni Babilonia, ma igo nikâ ki asa, vigu page tahi tenira. Na maneraha ni Babilonia ki page hagatotongogo, ma na hinua ikê ki page makaka.”

²⁴O Setekia ki arami, ki vi: “Siana ko hagarongoa rârâ ta na enoni renigi na marâ, garu tamasigi, i era ma ko me.

²⁵Manga vi na enoni igê na gavumane ma ka rongoa, vi inê kê megotamasi, ngaira ka page arâ me, ma ka page hagatego renigi na marâ, garu tamasigi. Ngaira ka page vi tangago, ka vivi, ‘Manga igo ma ko visigi na ara ni marâ, ma ko pe pinihia ta na marâ tenigami, hoi, i asa vigami nahuigo ku meme.’

²⁶Hoi, go hagarongora ma, vi igo ko nungiê, hanana vi siana inê kê kasigo aporo igê na ruma ni hagaitangiha, i era ma ko me i ngekana.”

²⁷Ma hemuri ngaira hato na enoni raha igê na gavumane ka râ me ma ka hagateê, ma inê kê hagarongora renigi râ nga na tamasinga iana na maneraha tangê. Ma ngaira ka muni vê ma ka nakê so, suria i mareha rârâ na hitangita, vige rongogi na marâ, muru tamasigi.

²⁸Ma inê kê oga i ruma igê na mahera iata na mane ni me, ga anumasia na ruma raha, mataro me ka henahuraua i Jerusaleme.