Read Kahua JEREMIA 39 Bible Online

JEREMIA 39 - Kahua bible

JEREMIA 39

¹Igê na tangahuruta na hageha igê na sivata na harisi o Setekia ki marungia igê i Juta, o Nebukanesa na maneraha ni Babilonia ki merarâ me na mane ni me hato iana, ma ki taharia i Jerusaleme.

²Igê na sivata na tangiana igê na heta na hageha igê na tangahuru matare tage na harisi iana o Setekia ki maneraha, ngaira ka tahakurugi igê na para ni hinua.

³Matena Jerusaleme ki vota, ngaira hato na araha iata na mane ni me iana na maneraha ni Babilonia ka râ me ma ka oga igê na maani para, ga hêtana vi Gupu. Tani na hitangita ka no Neregale Saresere, mo Samagare Nebo, mo Saresikimo, ma ani nikâ na Naregale Saresere.

⁴Matena na maneraha o Setekia ma na mane hato ni me iana ka rigia na tarana ngekana, ngaira ka guna, viga gavagava tenia na hinua igê na bungiana. Ngaira ka gava ka aharê igê na mu ni hagamahe rihia na ruma raha iana na maneraha. Ngaira ka hura tenia na maani para, i ratorerua na para gi rua, ma ka gava tanga na maruguna i Jotano.

⁵Ma na mane ni me ni Babilonia ka tarigenira, hanana viga taura. Ngaira ka hagatotongoa o Setekia igê na bena hagarangia i Jeriko, ma ka torea tanga na maneraha o Nebukanesa, i oga i hinua i Ribila igê na apanena iana o Hamata. Ma i ngekana o Nebukanesa ki suria igê.

⁶Ngaia ki bonasira na me iana, hanana viga hagamesira na karena o Setekia. Ngaira ka nahuira i maana. Ma ngaira ka hagamesira nikâ na enoni raha i Juta.

⁷Ma hemuri ngaira ka akarogi na maana o Setekia, ma ka rakua renigi na seni, ma ka torea vê tanga i Babilonia.

⁸I ngekana na me ni Babilonia ka sungia ki makaka na ruma raha iana na maneraha henigi na ruma iata na enoni, ma ka hogegi na para ni hinua.

⁹Ma hemuri o Nebusaratana na araha ni me ki henahuraura tanga i Babilonia na enoni, ga hita so i hinua, henira na ani ga bani hura ka pane henira.

¹⁰Ngaia ki panira so i Juta na ani ga matareha ngavê, ma ka pe tongasira rârâ ta na marâ. Ngaia ki haganahunira renigi na mako ma renigi na pariki ni vaini.

¹¹Ma tangê inê, na maneraha o Nebukanesa ki bonasia o Nebusaratana na araha ni me, ki vi:

¹²“Gu râ ku garia o Jeremia, ma ko bâbâsuria maninga. Siana ko têtê raharaha renia. Go arâ surigi na obaniha iana.”

¹³Tahema o Nebusaratana henirerua na araha ni me o Nebusasabana mo Neregale Saresere ma henira na araha hato ni me getera,

¹⁴ngaia ki toreê tenia na mahera na ruma raha. Ngaira ka bonasia o Getalia, hanana i anumasiê. Vaemana o Getalia ki no Agakama, mo virana ki no Sapana. I tuguhia, vi toreê maninga tanga i pasiku. Ma inê kê oga i ngekana henira na enoni.

¹⁵Matena gê gâga mênga i ruma ni hagaitangiha igê na mahera na ruma raha iana na maneraha, na Araha ki tamasi tangê.

¹⁶Ngaia ki vi tangê, kê torea na tamasinga iana tanga o Ebeti Meleki na ai ni Etiopia. Ngaia ki tamasi vikê: “Na tarani gê bani visigi, inê na Araha God raramohaga huniê iata na Isiraelita, ka page voravora me. Na hinua ikê ki page tarahua na eraha, mareha vi na ramana. Igo ko page bâsigi maremu, matena ga voravora me.

¹⁷Ma inê nga na Araha, inê be anumasigo, hanana siana ka mahatangenigo tangara na mane, go magutenira.

¹⁸Inê be tamanigo nga, ma ki asa iata, vige hagamesigo. Igo ko page tahitahi, suria igo ko hagêguri togo reniê. Ngaia kani gê visia, inê na Araha.”