Read Kahua JEREMIA 4 Bible Online

JEREMIA 4 - Kahua bible

JEREMIA 4

¹Na Araha ki vi: “Ai ni Isiraele, manga mu urisi parongami, mu aporo me tangê. Manga mu kasikasi râ na nununi na ataro, gê kitenigi, ma kamu tototo suriê aporo,

²hoi, i oto tangagamu, vigamu tohetohe reniê igê na otoha ma igê na monariha. Ma na enoni hato i maveta ka page avarasiê, hanana vigê mamahata tangara, ma ngaira ka page visiê raha.”

³Na Araha ki vi tangara na ai ni Juta me Jerusaleme, ki vi: “Mu maningaigi na mu. Siana kamu ata ni hasihasi mavê i gupuni na rauga era.

⁴Ai ni Jerusaleme me Juta, mu tototo suriê, inê na Araha iami. Mu tari suriê i mêrihami hagenani. Manga i mareha, na mangariaganiha iaku ki page manga na anguruna na gi renigi na bagatarihami. Ngaia ki page ngatongato tare, ma ki asa ta na enoni, vige page hunuia.”

⁵Ai ni Juta me Jerusaleme, mu uhigi na ahuri suria na agua hagenani. Mu ngere raha, ke rongo mataha. Mu aretaku me, kami rukuruku igê na hinua nganganihaga.

⁶Mu râ i Sione. Mu tangotango ma kamu rukuruku. Siana kamu babeaga, se mu parepare. Na Araha ki nakagi na bagabevoani ni hagamuteha ma ni hagaruhuruhunga, ga arâ me tenia i Babilonia.

⁷Na ani, i hagamutera na enoni i maveta, ki bani tavoraha me noga, manga na laione tenia na tahuna. Ngaia ki arâ me, hanana i hagaerasia ngavê i Juta. Na hinua i Juta ka page aruhuruhu ma ka page hihiruga.

⁸Mu hagesuru tatari. Mu angiangi ma kamu gegege, suria na mangariganiha raha iana na Araha ki tâ nga tanga i Juta.

⁹Na Araha ki vi tangê, ki vi: “Igê na matena ngekana na maneraha henira na kariata ka page bubununuga ngavê. Na mane ni vogasiha ma na poropete ka page gasuga ma ka page tugupu.”

¹⁰Ma inê kê aramia, kê vi: “Araha God, igo ko hagahagaparura ngavê na ai ni Jerusaleme, suria igo ko surua, vi na ramana tangara, ma hete i tarahura ma na henahuita.”

¹¹Ta na tangiana na Araha ki page vi tangara na ai ni Jerusaleme, ki vivi: “Na roga mahana ki arâ me tangagamu tenigi na hareni na hungani igê na masusu. Ngaia ki mareha vê, vi na roga ni hatanga, hanana vi ahegenigi vê na momo. Mareha!

¹²Ngaia ki na roga raha raramohaga hete, suria inê nga ka na roga ngekana. Inê kê râ me, hanana gê surigamu.”

¹³Bâ, na meronga ka rotorotoaga me. Na kati ni me ka manga na maguara. Na hosi iata ka gaha teharira na ahetaronga. I era ngavê tangagia! Igia ka meme!

¹⁴Ai ni Jerusaleme, mu urisi parongami, ma hanana mu tahitahi. Na bagatauhami ki angarigamu arihu taraha?

¹⁵Na rongoha era ki râ me tenia na hinua i Tane ma tenigi na hungani i na apanena i Eparaimi.

¹⁶Haganunura na enoni i maveta. Haganunua i Jerusaleme, vi na merongana ka râ me noga tenia na agua hagatê. Ngaira ka page hagaramo ma ka page taharigi na hinua i Juta.

¹⁷Ngaira ka page ura rihuia Jerusaleme mangara na mane ga anumasia na mu, suria na enoni igê ka haritohea na Araha. Ngaia kani visia na Araha.

¹⁸Juta, igo ko hagaratemu maremu renigi na bagatarihamu. Na meni na bagatarihamu ngegana. Tahema i tarahugo na mamasiaganiha, i nahuia na aitangihamu.

¹⁹Hara! Hara! Inê kê hiote! Bunaniaku! I tata! I asa be ape haritagi. Inê kê rongogi na ahuri ni me. Na mane ni me ka hagaramo.

²⁰Na bagabevoani ka râ me hesurisuri. Na agua hagenani ki erataga ngavê. Ga parama na ruma ni gahu, ma ka aruhuruhu. Na gahu na ruma iaka ka tatari tarome.

²¹Inê kê rigia arihu taraha na hearihatana? Inê kê rongogi arihu taraha na ahuri ni me?

²²Na Araha ki vi: “Na kariaku ka beka ngavê. Ngaira ka pe aitangisiê. Ngaira ka mangara na kare bonobonoga. Ngaira ka pe nahuni takoha. Ngaira ka manisingenigi na eraha, ma ka hitenia na koroha.”

²³Inê kê rigia na ano. Ngaia ki mamao ma ki hagagara era. Inê kê rigia na vavearo. Ngaia ki mareha igê na marara.

²⁴Inê kê rigigi na barani. Ngaigi ki gisigisi. Inê kê rigigi na hungani. Ngaigi ki angingi.

²⁵Na maveta ki hihiruga. Na manu ka magahuru nikâ.

²⁶Na mako ango ki aruga. Na hinua igê ka aruhuruhu. Na mangariganiha iana na Araha ki hagarateni na tarani ngegana.

²⁷Na Araha ki vi: “Na maveta hagenani ki page manihêga, ma ki asa vigê hagamagahurua ngavê.

²⁸Na maveta ki page angingi. Na vavearo ki page roto hono. Ngaia kani gê visia, inê na Araha. Na katoha iaku ki tâ i tâ. I asa ve urusia nikâ.”

²⁹Na enoni hato ka page gava tenia na hinua, matena ga rongora na mane ni me igê na hosi ma na mane ni hananiha, ga nagiakuruhi me. Tani ka page gava tangagi na vapuni, ma tani tangagi na vaba, ka ahiahi igê. Na ara ni hinua ka page hihiruga, ma ki asa ta na enoni, vige ogasigi aporo nikâ.

³⁰Jerusaleme, i era ngavê tangago. Hega, go tuguni rotorotoaga memera? Hega, go rêni renigi na golo? Renia ta go pupuni? Igo ko maningaigo maremu purua ma kego! Na mane, go gogogo surira tare, ka kitenigo ngavê i ngêke, ma ka obania, viga nahuigo ko meme.

³¹Jerusaleme, inê kê rongogo, go ngere, manga na gete i harate kare. Manga na gete i hagâkani ki apara kare. Igo ko ngerengere, suria go manava tanga na matumu. Igo ko gusigi na rimamu, ko vi: “E, gê meme! Ga râ me ka nahuiê!”